2 Corinthians 4

Ahirani (आहिराणी नवा करार) - No Year

← Chapter 3 Jump to: Chapter 5 →

1एनासाठे, जव आमना वर अशी दया हुयनी, कि आमले परमेश्वर ना संदेश ना प्रचार करानी सेवा भेटणी, त आमी हिंमत नई सोळतस.

2पण आमी लज्जा ना गुप्त कामस्ले सोळी टाकेल शे. नईत आमी हुशारपणा कण चालतस आणि नईत परमेश्वर ना वचन मा मिश्रण करतस, पण परमेश्वर ना समोर आमी फक्त खर बोलतस, आणि दुसरास्ले ले विश्वास शे कि आमी विश्वास योग्य शेतस.

3कारण कि जी सुवार्ता आमी प्रचार करतस जर दपेल शे, त ती नाश होणारस साठेच दपेल शे.

4ह्या जग ना शासक सैतान नि त्या अविश्वासीस्नी बुद्धी ले अंधा करी टाकेल शे, कारण कि ख्रिस्त जो परमेश्वर ना प्रतिरूप शे, तेना तेजमय सुवार्ता ना प्रकाश तेस्ना वर नई चमको.

5कारण कि आमी स्वता ले नई पण ख्रिस्त येशु ले प्रचार करतस, कि येशु ख्रिस्त प्रभु शे. आमी स्वता ले ख्रिस्त येशु मुळे तुमना सेवक समजतस.

6एनासाठे, कि परमेश्वर नि सांगेल शे, “अंधकार मधून उजाय चमको,” आणि तेनीच आमना हृदयस्मा आपला उजाया चमकाळा एनासाठे कि आमी परमेश्वर नि महिमा ले देखी सकोत जी येशु ख्रिस्त ना द्वारे प्रगट होस.

7आणि त्या माती ना भांडा ना सारखा शेतस जेनामा हय धन भरेल शे, हय दाखाळा साठे, कि हय अपार सामर्थ्य आमना कळून नई, पण परमेश्वर कळूनच शे.

8आमी कईक प्रकार ना कष्टस्ले भोगतस, पण संकट मा नई पडतस, चिंतीत त शेतस, पण निराश नई होतस.

9आमले कईक सावा त्रास त देवामा उना पण परमेश्वर आमले एखटा नई सोळत. कईक सावा आमले गैर मारा मा त येस पण परमेश्वर आमले नाश नई होवू देत.

10आमी प्रत्येक टाईम ले आपला शरीर मा येशु ना दुख व मृत्यु ना अनुभव करतस, एनासाठे कि लोक आमना कामस्ना द्वारे देखी सकोत कि ख्रिस्त आमना मा जित्ता शे.

11आमी जित्ता ऱ्हातांना येशु मुळे कायम मृत्यु ना सामना करतस, एनासाठे कि येशु ना जीवन आमना शारीरिक देह मा प्रकट होवो.

12एन अर्थ हय शे कि आमी कायम मृत्यु ना सामना करतस, पण एना परिणाम हय शे कि तुमले कायम ना जीवन भेटो.

13पण आमी प्रचार करत ऱ्हातस कारण कि आमना मा तीच विश्वास नि आत्मा शे जी भजनस्ना लिखणार मा होती, जस पवित्र शास्त्र मा लिखेल शे, “मनी परमेश्वर वर विश्वास कर, एनासाठे मी सांगस.”

14कारण कि आमले माहित शे, जस परमेश्वर नि प्रभु येशु ले मरेल मधून परत जित्ता करा, तसाच तो आमले बी येशु ना संगे परत जित्ता करीन, आणि तुमना संगे आमले बी आपली उपस्थिती मा ली जाईन.

15कारण कि सर्व काही तुमना चांगला साठे शे, कि ज्या प्रकारे परमेश्वर नि कृपा जास्ती जास्त लोकस्मा पसरत जाई ऱ्हायनी, त्याच प्रकारे परमेश्वर नि महिमा ना साठे धन्यवाद नि प्रार्थना बी वाढत जावो.

16एनासाठे आमी हिंमत नई सोळतस, जरी आमना बाहेर ना मनुष्यत्व नाश हुई जास, तरी बी आमना आत्मिक मनुष्यत्व दिवसानुदिवस नवा होत जास.

17हवू थोळा टाईम ना हलकासा क्लेश आमना साठे गैरा महत्वपूर्ण आणि कायम नि महिमा उत्पन्न करस, जेना आमी विचार बी नई करू सकतस.

18एनासाठे आमना डोया दिखणारी वस्तूस्ले नई पण नई दिखणारी वस्तूस्वर टिकेल शे. कारण कि ज्या वस्तू आमी देखतस, त्या थोळासाच दिन ना शेतस. पण नई दिखणारी वस्तू कायम लोंग बनेल ऱ्हास.

← Chapter 3 Jump to: Chapter 5 →