Revelation 22

Ahirani (आहिराणी नवा करार) - No Year

← Chapter 21 Jump to:

1मंग स्वर्गदूत नि मले जीवन ना पाणी नि नदी दाखाळी, आणि ती नदी काच ना सारखी चमकत होती, आणि ती नदी परमेश्वर आणि कोकरा ना सिंहासन पासून वाहत होती.

2हय नदी त्या नगर ना सडक ना मधमाइन वाहत होती, आणि नदी ना दोनी बाजू जीवन ना झाड होता, जेनामा बारा प्रकार ना फय शे आणि दर महिना ले आलग प्रकार ना फय उत्पन्न होतस. या झाड ना पानस्मा देश ना लोकस्ले बरा करानी योग्यता शे.

3त्या नगर मा कोणी बी परमेश्वर ना श्राप ना आधीन नई होवाव. परमेश्वर आणि कोकरा ना सिंहासन त्या नगर मा राहीन, आणि परमेश्वर ना सेवक तेनी सेवा करतीन.

4त्या परमेश्वर ले समोरा-समोर देखतीन, आणि परमेश्वर ना नाव तेस्ना कपाय वर लिखेल राहीन.

5तठे परत कदी रात नई होवाव, नईत तेस्ले दिवा ना उजाया नि गरज होवाव आणि नईत सूर्य ना उजाया नि कारण कि स्वता प्रभु परमेश्वर तेस्ना उजाया हुईन, आणि त्या राजास्ना सारखा कायम ना साठे राज्य करतीन.

6येणा नंतर त्या स्वर्गदूत नि मले सांग, “या सर्वा गोष्टी सत्य शे आणि निश्चित पुरा होतीन. प्रभु परमेश्वर, जेनी भविष्यवक्तास्ले आपली आत्मा दियेल होता, तेनी आपला दूत ले आदेश दिसन धाळेल शे कि आपला दासस्ले त्या गोष्टी दाखाळो जेस्न लवकर होण जरुरी शे.”

7येशु सांगस, “आयका, मी लवकर येणार शे, धन्य शे तो, जो या पुस्तक नि भविष्यवाणी नि गोष्टी ना पायन करस.”

8मी तोच योहान शे, जो या सर्वा गोष्टी देखा आणि आयकेल शे, आणि जव मनी आयक आणि देख, त जो स्वर्गदूत मले या गोष्टी दाखाळत होता, मी तेना पाय वर तेनी उपासना कराना साठे पडी ग्या.

9पण तेनी मले सांग, “देख, अस नको करू, कारण कि मी तुना आणि तुना भावू भविष्यवक्ता आणि या पुस्तक ना गोष्टी ना पायन करणारस्ना संगी दास शे. परमेश्वर नीच उपासना कर.”

10मंग तेनी मले सांग, “या पुस्तक नि भविष्यवाणी ना गोष्टी ले गुप्त नको ठेवू, कारण कि या गोष्टी ना पुरा होवाना टाईम जोळे शे.

11जो वाईट काम करस, तो वाईटच काम करत राहो, जो अपवित्र शे, तो अपवित्र बनेल राहो. जो चांगला काम करस, तो चांगला काम करत राहो, आणि जो पवित्र शे, तो पवित्र बनेल राहो.”

12येशु सांगस, “आयक, मी लवकर येणार शे. हरेक माणुस ले तेना काम ना नुसार जो प्रतीफय देवामा ईन, ते मी मना संगे लयी ऱ्हायनु.

13मी अल्फा आणि ओमेगा, पयला आणि शेवट, सुरुवात आणि समाप्त शे.”

14धन्य शे त्या, ज्या आपला कपळा ले कोकरा ना रक्त कण धुई लेतस, कारण कि तेस्ले त्या नगर ना दार मधून मधमा येवाना अधिकार भेटीन, आणि तेस्ले झाड ना फय खावाना अधिकार बी भेटीन.

15पण जेस्ना काम लाज ना शेतस, आणि हत्या, व्यभिचार, टोना, मूर्तिपूजा, आणि सर्वा खोटा बोलणारा, बाहेर राही जातीन.

16“मी, येशु, मीच मंडळी ना विषय मा या गोष्टी प्रगट कराना साठे आपला स्वर्गदूत ले तुमना जोळे धाळेल शे. मी दाविद ना मुळ वंशज व संतान शे, सक्काय ना चमकणारा तारा शे.”

17परमेश्वर नि आत्मा आणि कोकरा नि नवरी सांगस, “ये.” आणि जो कोणी येले आयकस तो बी सांगो, “ये.” आणि जो प्यासा शे तो येवो, आणि जेनी कोणी येले पिवानी ईच्छा शे, त्या या जीवन ना पाणी ले फुकट मा प्या.

18मी हरेक ले, जो या पुस्तक नि भविष्यवाणी नि ले आयकस, सावध करस, जर कोणी एनामा काही बी जोडस, त परमेश्वर तेनी विपत्ती ले, जेना वर्णन या पुस्तक मा लिखेल शे, वाढावी दिन.

19आणि जर कोणी या भविष्यवाणी नि पुस्तक मधून काही बी काळस त परमेश्वर जीवन ना झाड व पवित्र नगर मधून, जेना वणर्न या पुस्तक लिखेल शे, तेना भाग तून तेले दूर करी दिन.

20येशु, जो या गोष्टी नि साक्षी देस, तो हय सांगस, “हा, मी लवकरच येणार शे.” मी, योहान, उत्तर मा सांगस, आमेन. हे प्रभु येशु ये.

21प्रभु येशु नि कृपा परमेश्वर ना लोकस्ना संगे राहो. आमेन.

← Chapter 21 Jump to: