Proverbs 25

Edo ((E Baibol Ẹdo) Version 1996)

← Chapter 24 Jump to: Chapter 26 →

1Ye vbe ghe eso vbe uwu itan e Solomọn ne emwa gbẹnnẹ ye otọ vbe ẹguae Hẹzekaia ne Ọba e Juda.

2Emwi ne Osanobua viọ lẹre ọ re ọ ya ima yi ọghọ nẹẹn, emwi ne avbe ọba rhan otọ ẹre, ọ re ọ ya ima rhie ọghọ ne iran.

3A i sẹtin rẹn emwi ne ọ rre ọba ẹko, iro ẹko ẹre yo sẹẹ ima zẹ vbene uyomwẹ iso ye, ra udinmwimwẹ okun.

4Viọ ivbivbi emwi ni rre uwu esiliva hinrre, avbe owinna gha sẹtin ya ẹe ru emwi ne ọ mose.

5Viọ avbe emwa ni bu ọmwa ude dan hin ehe ne ọba ye rre, uyinmwẹ ẹmwata ọ re a ra ya rẹn arriọba ẹre.

6U gha mudia ye odaro ọba, ghẹ gha ru emwi wẹ ne ọ ba bẹghe ruẹ ra ne u gha rhie ma wẹ okpọmwa ọre u khin.

7A tie ruẹ wẹ ne u do tota ye ehe ne ọ sikẹ odaro sẹẹ, ọre ọ maa sẹẹ ne a tama ruẹn wẹ ne u kpaegbe ne ọmwa ne ọ ru okpọmwa sẹ ruẹ tota.

8Ghẹ gha rhulẹ yo iko ba ẹmwẹ emwi ne arọ ruẹ sẹe. Adeghẹ osẹe ọvbehe ghi do rhan otọ ẹre, a na ghi do miẹn wẹ ohoghe ọ re u ta vbo, vbua ghi ra ru hẹ?

9Adeghẹ wẹ vbe ọmwa ẹdogbo ruẹ muan ẹmwẹ ye emwi ọkpa, wa tobọ uwa bu ẹre ne egbe uwa, wa ghẹ vbe ya gha we oro.

10Ne a ghẹ miẹn wẹ te emwa hia ghi rẹn ruẹn ye a i ye okhuo yo uma ne ẹ i vẹ, egbe ruẹ i rrọ re hiehiere ighe ekhue ne ọ rrọ.

11Ẹmwẹ ne a ta la owa ẹre, te ọ yevbe iwinna ona igoru ne a ma yan esiliva.

12Ude ne ọmwa ne ọ kpẹ agbọn rhie ne ọmwa ne ọ mu egbe ne ọ ya danmwehọ, ọ re ọ maa sẹẹ avbe oroka igoru emwitegbe ne a ye igoru ne ọ maa sẹẹ ru.

13Ọmwa ẹmwata ne a gie ẹre uhunmwu, te ọ fu ọmwa ne ọ gie ẹre uhunmwu egbe rre zẹ vbe ne amẹ ne ọ furre fu ọmwa egbe rre vbe ẹghẹ owowo ẹghẹ emwiorhọ.

14Emwa ni gha ve emwi ne iran i hae, te iran yevbe ẹhoho ra amẹ ne ọ bi ne ẹ i rhọ.

15Arhẹrhẹ, izin egbe, gha sẹtin dọ ohu I i kue ne ọ ghi wegbe sẹẹ yọ, uhin ighe te ọ vbe sẹtin fi enigie ekhọe werriẹ.

16Ghẹ lalọ amẹ owọn gberra vbene ọ ke ne uẹn sẹ, ọ gha bun gbe, ọ sẹtin ya a gha bi.

17Ghẹ kpẹkpẹ gbe vbe otuẹ ne u mu gie emwa ẹdogbo ruẹ, egbe ruẹ sẹtin wọ ẹre, ọ ghi do gha mu ohu ruẹ.

18Ẹmwẹ ne a zẹ ba ọmwa, emwi ne ọ sẹtin gbe ọmwa ran nọ, zẹ vbene umozo ye ra orhokhua ra ifẹnmwẹ ne ọ mu.

19Ọmwa ne ọ ya aro kọ ọmwa ne ẹ i gia muẹtinyan vbe ẹghẹ asobọyegbe, te ọ yevbe ọmwa ne ọ ye akọn ne ọ rueghe rri evbare, ra ne ọ ye owẹ ne ọ suke khian.

20A gha so ihuan ne ọmwa ne iro han rẹn, te ọ yevbe ne a ban ọmwa ukpọn rhie fua vbe ẹdẹ ne oni fi, ra ne a zẹ umwẹ wo ọmwa ẹtẹ.

21Ohanmwẹ gha gbe oghian, rhie evbare nẹẹn re, ovbamẹ gha gbẹe, sa amẹ nẹẹn wọn.

22U gha ye vbe rrio mu erhẹn ekhue tọẹn, e Nọyaẹnmwa gha vbe san ruẹn ẹse.

23Ewẹwẹwẹ, ẹ i mwẹ ọ ma ya ohu mu ọmwa, zẹ vbene ẹ i mwẹ amẹ ma lele ẹhoho odẹ okuọ rre.

24A wa ya di okpo ya ọ re ọ fu egbe sẹ ne a gu okhuo ne ọ vian gha rre owa.

25Iyẹn oghọghọ ne ọ ke ehe ne ọ rrei sẹ ehe ne ọmwa ye, te ọ ye vbe amẹ ne ọ furre ne ọmwa wọẹn vbe ẹghẹ ne ovbamẹ na kaka ọmwa ẹho.

26Ọmwa esi gha rhie otọ ne ọmwa dan, te ọ ye vbe ẹzẹ ne ọ tughu ra uhae ne a zẹ eruan yi.

27Owọn gha bun gbe, ẹ i ghi maa ne ọmwa, erriọ ọ re ọ vbe ye vbe ọmwa a vbe gha ho gbe ne a gha tian irẹn.

28Adeghẹ u i guara ziengbe vbe ohu a mu uẹn, te u wa mu egbe fua, zẹ vbe ẹvbo ne a ma gbe ekẹn gaa, ẹ i sọn emwa guẹ gbinna.

← Chapter 24 Jump to: Chapter 26 →