Proverbs 31

Edo ((E Baibol Ẹdo) Version 1996)

← Chapter 30 Jump to:

1Ẹmwẹ ẹwaẹn ne iye Lemuẹl ne Ọ ba tama rẹn:

2“Ovbi mwẹ ne ọ ghan ọ re u khin, emwi ne a ya họn erhunmwu mwẹ. Demwi ne I gha tama ruẹn?

3Ghẹ lo ẹtin ruẹn hia ye okhuo ne a tie ẹre ovbe ra ne u viọ igho ruẹ hia ne ikhuo, ọba nibun ọ re ọ he ya uhunmwu khiọ ẹmwẹ iran.

4Danmwehọ, Lemuẹl ọ ma kei ne avbe ọba gha da ayọn ra ne ayọn ne ọ fian gha khọn iran.

5Iran gha da ayọn, iran ghi mianmian uhi, iran i ghi vbe ye emwi ne ọ khẹke avbe ivbiogue rre.

6Ayọn ne ọ fian, avbe emwa ni ra ghi wu ọ re ọ ke na, iran ni rre uwu agbọn ọrhiae.

7Gie iran da ayọn ne iran ta mianmian ogue kevbe usẹ ne iran ye.

8“Guan ne avbe emwa ni i sẹtin guan ne egbe iran. Khọn ekhae ne avbe emwa ni i sẹtin rria ikhi egbe iran.

9Guan ne iran, ne u do gha re nọbuohiẹn ẹmwata. Mu ẹzọ avbe ivbiogue kevbe ni i mwẹ gui.”

10Ọ wa lọghọ a te do miẹn amwẹ ne iye owa, ive ẹ re sẹ emwi itegbe ighobioye ni bun.

11Ọdọ ẹre mu ẹtin yan rẹn, ẹ i khin ovbiogue ẹdẹ.

12Vbe ẹghẹ hia ne iran gba ya rre agbọn, ọ maa ọ re ọ ho ye ọre egbe, ẹ i vbe ho emwi ikuanegbe ghe ẹre.

13Ọ ghi gha ya obọ ẹre winna vbe ẹghẹ hia, ọ ghi gha do ukpọn eto ohuan kevbe ukpọn eto ovbiohuẹ.

14Ọ ghi gha la erhan la irri ya gha rhọ evbare rre zẹ vbene okọ avbe iduẹki ru.

15Ẹdẹ i he gbe vbe ọ kpaegbe ya gha le evbare ne emwa owa ẹre, kevbe ne ọ vbe tama avbe eguọmwadia ikhuo ni gue ẹe iwinna ne iran gha winna.

16Ọ gha ghe otọe, ọ ghi dẹ ọe, ọ ghi ya igho ne ọ khuaẹn kọ emwiokọ yọ.

17Ọmwa ne ọ mu aro ye iwinna nọ, ọ wegbe ọ vbe fu ẹro iwinna.

18Ọ rẹn ive emwikemwi ne ọ ru, ọ ghi wa gha winna sẹ ogiasọn.

19Rẹn ọ re ọ tobọ ọre sin oru ẹre, rẹn ọ vbe do ukpọn rẹn.

20Ọ zẹ emwi obọ ne avbe ivbiogue ke ni i mwẹ.

21Esia ne ọ si oni gha dee, ẹ i vbe si osi rhunmwuda, emwa rẹn mwẹ ukpọn ni mwẹ imi ne iran ya hin egbe.

22Ọ do ukpọn ne a ya wa ukpo, ukpọn ododo eto ovbiohuẹ ne a ma gua.

23Agbọn hia rẹn ọdọ ẹre ẹsẹse, usun emwa ni dekpe vbe ore ẹvbo nii ọre nọ.

24Ọ gha do avbe ukpọn kevbe ọza, ọ ghi khiẹnnẹ ọẹn ne avbe ekpatẹ.

25Ọmwa ne ọ wegbe ne a ya ọghọ na nọ, ẹ i vbe si osi ye ẹdẹ nakhuẹ.

26Ẹwaẹn ọmẹhẹ ọre ọ ya guan.

27Te ọ wa winna vbe ẹghẹ hia, ọ ghi vbe gha koko emwa rẹn.

28Avbe emwa rẹn vbe kpọnmwẹ ọ re ẹse, ọdọ ẹre ghi vbe gha tian rẹn.

29Wẹẹ, “Ikhuo nibun ọ re ọ wa re ikhuo esi sokpan, wẹ ọ re ọ maa sẹẹ ehia.”

30Te ose rẹrẹ ọmwa, te ukhuegbe vbe khian ne a ho bẹkun, sokpan okhuo ne ọ ya ọghọ ne Nọyaẹnmwa, te ọ kere ne a tian rẹn.

31Tian rẹn ye emwi ne ọ ru hia. Ọmwa ne ọ kere ne emwa hia gha ya ọghọ na ọre nọ.

← Chapter 30 Jump to: