1 Kings 3

Chin TBR17 (Tedim Bible Revision 2017)

← Chapter 2 Jump to: Chapter 4 →

1Solomon in Egypt kumpipa Faro tawh numei-a kizopna bawl hi. Amah in Faroʼ tanu la a, ama inn le Topaʼ biakinn le Jerusalem kimkot a kulhpi a lam a zawh mateng David khuapi sungah tua nu paipihin omsak hi.

2Ahi zongin Topa adingin biakinn kilam nai lo ahih manin mite in mual tunga biaknate ah biakna pia uh hi.

3Solomon in Topa itin, a pa Davidʼ thukhamte zui hi. Ahi zongin amah in mual tunga biaknate ah biakna pia-in paknamtui hal hi.

4Tua ciangin biakna a pia dingin Gibeon ah kumpipa pai hi; bang hang hiam cih leh mual tunga biakna mun a lian pen ahi hi. Solomon in tua biakna tau tungah meihal biakna tam veipi tak a piaknasa mun ahi hi.

5Gibeon ah zanin mang sungah Solomonʼ tungah Topa kilang hi. Pasian in, “Nang kong piak ding hong ngen in,” a ci hi.

6Solomon in, “Na nasem ka pa Davidʼ tungah a lian itna kip na lak hi. Bang hang hiam cih leh cihtakna, thumanna tawh nangma mai ah gamta-in, nangma tungah lungsim thutang hi. Nangmah in ama adingin hih a lian itna kip koihsakin, tu ni-in ama tokhom tungah a tu ding tapa khat na pia hi.

7Tu-in, Topa ka Pasian aw, kei pen naupang no khat hi napi-in ka pa Davidʼ munah kumpi-in na nasem pa nong koih hi. Bangci gamtatin bangci nasep ding cih ka theih khat zong om lo hi.

8A lian, a phazah a kisim zo lo, a tamna a kiseh thei lo, nangmah in na teel sa na mite lakah na nasem pa om hi.

9Tua ahih ciangin keimah in a sia le a pha ka theihtheih nadingin na mite uk nading thu theihtelna lungsim na nasem pa hong pia in. Bang hang hiam cih leh hih a lian a tam na mite kua in uk zo ding ahi hiam?” a ci hi.

10Solomonʼ thungetna in Topa lungkimsak hi.

11Pasian in ama kiangah, “Nangmah in hih thu hong ngenin, nangma adingin khansauna ahi a, hauhna ahi a, na galte thah zawh nading ahi zongin hong ngen loin, a man thu na theih nadingin nang adingin thu theihtelna hong ngen na hih manin,

12en in, nangma hong ngetna bangin kong pia ding hi. En in, nangma hun ma-in nang tawh a kibang a om loh nading le nangma khit ah zong nang tawh a kibang hong khan loh nadingin pilna le theihna lungsim kong pia ding hi.

13Nangma hunsung tawntung kumpi dang nang tawh a kiteh theih loh nadingin nangma hong nget loh hauhna le pahtawina zong nang kong pia ding hi.

14Na pa David in a tot bangin nangmah in ka lampite tawnin, ka thukhamte le ka thupiaknate na zuih nakleh na khan ka sausak ding hi,” a ci hi.

15Tua ciangin Solomon khanglo a, hih pen a mang na hi hi. Tua ciangin Jerusalem ah amah pai a, Topaʼ Thuciamna Singkuang mai ah amah dingin meihal biaknate le thunuam a biakna te pia-in, a nasemte khempeuh adingin pawi khat a kham hi.

16Tua ciangin kumpipa kiangah numei paktat nih hong pai-in a mai ah ding uh hi.

17A numei khat in, “Aw, ka topa aw, hih numei le kei, inn khat sungah ka om khawm uh hi; amah zong inn ah a om sungin keimah in ta khat ka nei hi.

18Ka ta neih khit ni thum ni ciangin hih numei in zong ta hong nei hi. Ko gel bek a om ka hi uh a, kote tawh inn sungah kuamah dang om lo hi.

19Amah in delhphah kha ahih manin zanin hih numeiʼ tapa a si hi.

20Tua ciangin zankim laitakin amah tho-in, na nasem nu ka ihmut laitakin ka kiang panin ka tapa la-in ama ang ah koih a, ama tapa si keiʼ ang ah hong koih hi.

21Zingsangin ka ta nawi a pia dingin ka thawh ciangin, a si sa na hi hi. Ahih hangin limtakin ka et ciangin, amah pen keima sung pan a suakta na hi lo hi,” a ci hi.

22Ahih hangin a numei dang khat in, “Hi lo hi; a hing naupang keima aʼ hi a, a si naupang nangma aʼ ahi hi,” a ci hi. Tua ciangin a masa nu in, “Hi lo hi; a si naupang nangma aʼ hi a, a hing naupang keima-aʼ ahi hi,” a ci hi. Tua bangin kumpipaʼ mai ah amau tegel in thu gen tuak uh hi.

23Tua ciangin kumpipa in, “Khat in, ‘A nungta pen keima tapa hi a, nangma tapa si hi,’ ci hi. Tua ciangin a dang khat in, ‘Hi lo hi; nangma tapa si a, keima tapa a hing pen ahi hi,’ ci hi,” a ci hi.

24Tua ciangin kumpipa in, “Namsau khat hong la un,” a ci hi. Tua ahih ciangin kumpipaʼ mai ah namsau khat hong kipaipih hi.

25Tua ciangin kumpipa in, “A nungta naupang khen nih suah unla, khat tungah alang pia-in, a dang khat tungah alang pia un,” a ci hi.

26Tua ciangin a tapa a nungta numei in a lungsimah a tapa khasiat ahih manin kumpipa kiangah, “Aw ka topa aw, a nungta naupang amah pia zaw in; bangbang hitaleh amah that kei in,” a ci hi. Ahih hangin a khat in, “Hih pen kei ka hi a, amah in ahi zongin tang thei lo ding hi; hong hawmsak un,” a ci hi.

27Tua ciangin kumpipa in dawngin, “A masa numei tungah naupang hing pia un; bangbang hitaleh that kei un; amah pen a nu ahi hi,” a ci hi.

28Tua ciangin Israel mi khempeuh in kumpipaʼ piak thukhenna za uh hi. Thutang a sem dingin ama tungah Pasian in pilna pia hi, ci-in phawk uh ahih manin amaute in kumpipa lamdang sa-in a om uh hi.

← Chapter 2 Jump to: Chapter 4 →