1 Kings 9

Chin TBR17 (Tedim Bible Revision 2017)

← Chapter 8 Jump to: Chapter 10 →

1Solomon in Topaʼ biakinn le kumpi inn le a lam nop khempeuh a lam a man khit ciangin,

2Gibeon-a ama tungah a kilah sa bangin Solomon tungah Topa a nih veina kilang hi.

3Topa in ama kiangah, “Keima mai ah na hih sa na thungetna le na thumnate ka za khin hi. Na lam sa hih biakinn ka ap khin hi. A tawntungin tua biakinn sungah kei hong kibia dinga, a tawntungin tua biakinn ka hu ding hi.

4Nang na hih leh, na pa David a gamtat bangin lungsim thupina le thumanna tawh ka mai ah gamta-in, nang kong thupiak khempeuh bangin sem a, ka thukhamte le ka ngeina kipte na zuih leh,

5na pa David tungah, ‘Israel kumpi tokhom tungah mi khat zong na tasam kei ding hi,’ ci-in ka ciam sa bangin Israel-te tungah na kumpi tokhom ka kipsak paisuak ding hi.

6Ahih hangin nang na hi a, na tate ahi zongin, keimah zuihna panin pialin, note mai ah ka koih ka thupiaknate le ka thukhamte na zuih kei uh a, pasian dangteʼ na a sem ding le a bia dingin na pai uh leh,

7amaute ka piak sa leitang panin Israel mite ka la khia ding hi. Tua ciangin ka min dingin ka ap sa biakinn pen ka muhna panin ka lawn khia dinga, Israel-te pen mi khempeuh lakah paunak le thu gentehna suak ding hi.

8Tua ciangin hih biakinn pen ninbu lomtang suak dinga, a nawk kha mi khempeuh in lamdang sa-in, eh! ci ding uh hi. Amaute in, ‘Bang hangin Topa in hih leitang le hih biakinn hih bangin hih ahi hiam?’ ci ding uh hi.

9Tua ciangin amaute in, ‘Egypt panin a pu a pate uh a paikhiatpih Topa a Pasian uh amaute in nusia-in pasian dangte len uh a, tuate bia-in a na a sepna hang uh ahi hi. Tua ahih ciangin Topa in hih siatna khempeuh amaute tungah tungsak hi,’ ci ding uh hi,” a ci hi.

10Solomon in inn nihte, Topaʼ biakinn le kumpi inn a lam kum sawm nih a beina,

11Taia kumpi Hiram in Solomonʼ deih zahzah taamtak sing le taaksan sing le kham a piak khit ciangin, Kumpi Solomon in Galilee gam sunga om khuapi sawm nih, Hiram tungah a pia hi.

12Ahih hangin Solomon in amah a piak sa khuapite a en dingin Taia panin Hiram hong pai ciangin, tua khuapite tawh amah lungkim zo lo hi.

13Tua ahih ciangin amah in, “Ka sanggam aw, kei nong piak hih khuapite a bangci khuapi ahi hiam?” a ci hi. Tua ahih ciangin tu ni dongin tuate Kabul gam kici hi.

14Hiram in kumpipa kiangah a piak kham talen za khat le talen sawm nih a pha hi.

15Topaʼ biakinn, ama inn, Jerusalem kulh le Hazor, Megiddo le Gezer khuate a lam dingin Kumpi Solomon in aana tawh na a semte a la hi.

16(Egypt kumpi Faro pai to a, Gezer la-in mei tawh hal a, a khuapi sunga teeng Kanaan mite thatin Solomonʼ zi, a tanuʼ tungah mo kenin a khuapi a piak ahi hi.

17Tua ahih manin Solomon in Gezer khua lamkik hi). Tua banah Beth-horon nuainung

18le Baalath le Judah gam sung gamlak ah Tamar,

19le Solomon in a neih vankoihna khuapi khempeuh le a leengte-aʼ ding khuapite le a sakol tung tuangte ading khuapite le Jerusalem sung, Lebanon sung le ama ukna gam sung khempeuh ah zong Solomon in a lam nop khempeuh a lamkik hi.

20Israel mi ahi lo Amor mite, Hit mite, Perez mite, Hiv mite le Jebus mite sung panin a om lai mi khempeuh,

21Israel mite in a suksiat khit siang zawh loh, tua gamah amauʼ nung a a om lai a suanlekhakte uh, Solomon in aana tawh na a sem salin bawl ahih ciangin tu ni dongin tua bangmahin amaute om uh hi.

22Ahih hangin Solomon in Israel mite salin bawl lo hi. Amaute pen galkapte, ama nuai ah a uliante, a galkap maangte, a leeng ukte le a sakol tung tuangte ahi uh hi.

23Solomonʼ inn lam nasep a uk ulianpite mi za nga le sawm nga ahi hi.

24Faro tanu adingin Solomon in a lamsak ama inn ah a om dingin David khuapi panin amah a paikhiat khit ciangin Solomon in Millo a lam hi.

25Solomon in Topa adingin a lam biakna tau tungah meihal biakna le thunuam a biakna kum khatin thum vei pia-in Topaʼ mai ah paknamtui a hal hi. Tua ahih ciangin amah in a biakinn a zo hi.

26Kumpi Solomon in Edom gam sung San Tuipi gei dunga om Eloth nai-a Ezion-geber ah teembaw hon khat a bawl hi.

27Tua ciangin Hiram in tua teembaw honte tawh tuipi tung nasep a thei tuipi mi a nasemte, Solomonʼ nasemte tawh sawl khia hi.

28Tua ciangin amaute Ofir ah pai-in tua lai panin kham talen za li le sawm nih hong pua uh a, amaute in Kumpi Solomon kiangah tuate tunpih uh hi.

← Chapter 8 Jump to: Chapter 10 →