Jeremiah 1

Dagbani Bible (Naawuni Kundi Kasi)

Jump to: Chapter 2 →

1Hilikia ŋun daa nyɛ Bɛnjamin tiŋgban’ ni tin’ shɛli din yuli booni Anatɔt la maligumaaniba ni yino la bia Jɛrimia yɛtɔɣa m-bɔŋɔ.

2Ŋuna ka Yawɛ daa tɔɣisi yɛtɔɣa Juda naa Amɔn bia Jɔsia nam dibu yuun’ pinaata saha la.

3Yawɛ daa lan tɔɣis’ o yɛtɔɣa Jɔsia bia Jɛhoyakim ni daa di Juda nam saha shɛli la. O daa kul tɔɣisir’ o la yɛtɔɣa hal ni Jɔsia bia Zɛdɛkia Juda nam dibu yuun’ piniyini naabu saha hal ka bɛ daa ti gbahi Jɛrusalɛmnim’ chaŋ ti leei daba gol’ so ŋun pahir’ anu la ni.

4Yawɛ daa yɛli ma,

5“N daa pun mi a mi pɔi ka naanyi ti nam a a ma puli ni. N daa pun piig’ a mi zali pɔi ka bɛ ti naanyi dɔɣ’ a; ka n zaŋ a leei zuliya kam anabi.”

6Di saha ka n daa garigi yɛli, “Yaa n Duuma Yawɛ, yɛlimaŋli, m bi mi n ni yɛn tɔɣisi yɛtɔɣa shɛm, dama n na nyɛla bia.”

7Amaa ka Yawɛ daa yɛli ma, “Di yɛra, ‘N na nyɛla bia,’ dama a ni chaŋ n ni tim’ a ni a chaŋ ninvuɣ’ shɛb’ zaa sani nti yɛli ba n ni zal’ a ni a yɛlim’ ba shɛlikam.

8Di zɔri ba dabiɛm, dama n ni be a sani din ni fa a bahi.” Yawɛ n-yɛli lala maa.

9Di saha ka Yawɛ daa teeg’ o nuu shihi n noli ka yɛli ma, “Pumpɔŋɔ n zaŋ n yɛtɔɣa niŋ a noli ni.

10Nyama, zuŋɔ dabisili ŋɔ n zaŋ a leei zuliya pam mini nanim’ zuɣulana, ni a vuɣi, ka daai luhi, ni a wurim ka ŋme m-paai, ni a me ka sa.”

11Yawɛ daa bɔhi ma, “Jɛrimia, bɔ ka a lee nya?” Ka n yɛli, “N nyala alimɔnd tiwulli.”

12Di saha ka Yawɛ yɛli ma, “A nyaya viɛnyɛliŋga, dama n lihirimi ni n nya ka n yɛligu niŋ pali.”

13Di nyaaŋa ka Yawɛ daa lan bɔhi ma pahi buyi, “Bɔ ka a lee nya?” Ka n garigi yɛli, “N nyala duɣu ni bini ni kpeera, ka gbiligi yi nuzaa polo na.”

14Di saha ka Yawɛ daa yɛli ma, “Alɔbo ni yi nuzaa polo na ti lu tiŋgbani maa ni niriba zaa zuɣu.”

15Yawɛ daa lan yɛli, “Pumpɔŋɔ n yɛn bolila zuliya shɛb’ bɛn be nuzaa polo ŋɔ nanima, ka bɛ zaa kana ti kpa bɛ nam ʒiishɛhi Jɛrusalɛm dunɔdaya gbini. Bɛ ni ti teei gili di goondahi din gil’ li la mini Juda fɔntinsi zaa.

16Ka n ni ti kari ba saria bɛ ni zaɣisi ma bɛ ninvuɣ’ biɛtali kam puuni la zuɣu. Bɛ mali maligu ti buɣa, ka jɛm bɛmaŋmaŋ’ ni zaŋ bɛ nuhi mali binshɛŋa.

17Amaa nyini malimi shili n-yiɣisi zani yɛli ba n ni zal’ a ni a yɛli ba shɛlikam zaa. Di zɔri ba dabiɛm, di yi pa lala n ni chɛ ka dabiɛm gbaag’ a pam bɛ sani.

18Zuŋɔ dabisili ŋɔ man’ zaŋ a leela bɛ ni me gooni gili tin’ shɛli, ka zaŋ a leei kurugu daantaliga mini daanya gooni n-jɛndi tiŋgbɔŋ maa nim’ zaa; ka lan zaŋ a jɛndi Juda nanim’ mini di kpamba ni di maligumaaniba ni tiŋgbɔŋ maa ni niriba zaa.

19Bɛ ni ti lo tɔbu tuh’ a, amaa bɛ ti ku tooi nyaŋ a. Dama m be a sani ni n fa a bahi.” Yawɛ n-yɛli lala maa.

Jump to: Chapter 2 →