Jeremiah 4

Dagbani Bible (Naawuni Kundi Kasi)

← Chapter 3 Jump to: Chapter 5 →

1Yawɛ yɛliya, “Izraɛlnima, yi yi ni labi n sanna, yi yi chɛ din chihira n sani maa tumbu, ka chɛnya ʒiɛhi gili,

2yi yi ni po Yawɛ ŋun be ŋɔ ni yi ni gbibi yɛlimaŋli, ka doli zaligu ni wuntitali, dindina o ni niŋ alibarika niŋ zuliya shɛb’ ni yi zuɣu, ka bɛ ti mal’ o nyuri bara.”

3Dama Yawɛ ni yɛli Judanim’ mini Jɛrusalɛmnim’ shɛm m-bɔŋɔ: “Jarimiya yi kɔbiti din bi jari ŋɔ, ka miriya ka yi biriti yi bimbira niŋdi gɔhi ni.

4Malimiya yimaŋ’ ti Yawɛ. Yinim’ Judanim’ mini Jɛrusalɛmnima, gunimiya yi suhuri ni, di yi pa lala n suhu ni yiɣisi bahi yi zuɣu kaman buɣim la n-diri ka so ku tooi kpihi li, yi ni tum tuumbiɛ’ shɛŋa maa zuɣu.”

5Molimi molo Juda mini Jɛrusalɛm yɛli: Piɛbimi kikaa gili tiŋgbani maa ni, ka tahiri pampam yɛra, “Laɣimmiya taba ka ti chaŋ ti kpe bɛ ni me goma gili fɔntin’ shɛŋa ni.”

6Tirimiya wuhi soli din kuni Ziɔn. Zomiya yomyom tiligi, ka di niŋya zinchili, dama n yɛn chɛmi ka zaɣ’ biɛɣu yi nuzaa polo na. Ka di ni ti di niriba pam.

7Di ni ti ŋmanila gbuɣinli n-yiɣisi o sɔɣisili shee yina; ŋun yɛn ku zuliya pam yi palo. O yi o biɛhigu shee na ni o bahi yi tiŋgbani yoli. Yi fɔntinsi ni wurim, ka so ku lan be di ni.

8Dimbɔŋɔ zuɣu somiya buri, ka kum ka fabili, “Yawɛ suhuyiɣisili titali maa na bi miligi ka chɛ ti.”

9Yawɛ yɛliya, “Dindali maa, naa mini kpambaliba ti ku lan mali suhukpeeni. Dabiɛm ni ti gbahi maligumaaniba, ka di niŋ anabinim’ alahiziba.”

10Di saha ka n daa yɛli, “Mbaye, Yawɛ ŋun nyɛ ti Duuma ŋɔ, a daa yɔhim Jɛrusalɛmnim’ pam n-yɛli, ‘Shɛli ti ku niŋ ya,’ amaa ka takɔbi ti be bɛ kukoya ni.”

11Di saha bɛ ni ti yɛli Jɛrusalɛmnima, “Pɔhim tulli ni ti yi n sani daboya zuɣusaa n-ʒe n-yi tiŋgban’ nɛli ni na nti ʒe n-kpa n niriba bɛn yɛla mali nambɔɣu ŋɔ polo, di pala pɔhim shɛli din ni yɛli binyara bee din ni pɔbisi binyara saɣiri chaŋ.

12Di ni ti nyɛla pɔhim shɛli din mali kpiɔŋ gari lala. Mani n-kari ba saria pumpɔŋɔ maa.”

13Nyama, o kanimina kaman sagbana la, o chɛchɛbunsi ŋmanila pɔhimʒiɛpiliŋga, ka o yuri zɔri yomyom gari tɔrili. Mbusim be ti zuɣu, dama ti bahi yoli.

14Jɛrusalɛmnima, yihimiya ninvuɣ’ biɛtali yi suhuri ni ka tiligi. Nia biɛri maa kul yɛn bela yi ni sahakam?

15Dama molo yi Dan tiŋgbani polo na n-yɛra ni alɔbo yi Ifriim tiŋgbani zoli polo na.

16Yɛlim’ niriba, “Bɛna m-bɔŋɔ!” Molimi molo jɛndi Jɛrusalɛmnim’ yɛli, “ Bɛn yɛn teei gili ya yi tiŋgban’ shɛli ni katiŋ’ kanna. Bɛ tahirila Juda tinsinim’ zuɣu.

17Bɛ teei gili ba kaman puguliba ni niŋdi shɛm la, bɛ ni taai duŋ zaɣisi ma la zuɣu.” Yawɛ n-yɛli lala maa.

18Yi biɛhigu mini yi tuma m-bo yɛlli ŋɔ tin ya. Di mali ya. Di biɛri pam! Di nyooi yi suhuri.

19N niŋgbunzabili ŋɔ, n niŋgbunzabili ŋɔ! Biɛrim mali ma, ka n lɛbiri ginda. Mbaye, n suhu ni, n suhu kul tɔrila pampam. N ku tooi shini, dama n wumla kikahi kumsi, di nyɛla tɔbuchiriga.

20Alɔbɔnima n-doli taba, tiŋgbani maa zaa bahila yoli. Yim ka bɛ daa ti dii saɣim n suɣa, ka chahi m pateesanima.

21Ka daɣila n kul yɛn lihirila tɔbu tuhibu, ka wumdi kikahi kumsi sahakam?

22Dama n niriba maa nyɛla jɛra; bɛ bi mi ma. Bɛ nyɛla bi’ jɛra, bɛ bi baŋdi binyɛra gbinni. Bɛ mali yɛm din tumdi tuumbiɛri, amaa ka lee bi mi tuun’ viɛla tumbu.

23N daa lihi dunia ni n-nya ka di bahila yoli, ka binshɛli lan ka di ni, ka n lihi zuɣusaa, ka neesim kani.

24N daa lihi zoya zuɣu n-nya ka di sɔhirimi, ka daboya zaa daa chani tooni ka labiri nyaaŋa.

25N daa lihiya n-nya ka so kani, ka noonsi zaa yiɣi.

26N daa lihiya n-nya ka tiŋgban’ shɛli din daa mali atam pam la leela tiŋgban’ nɛli, ka di fɔntinsi la zaa wurim do Yawɛ tooni, o suhuyiɣisili din galisi zuɣu.

27Yawɛ Yɛliya, “Tiŋgbɔŋ zaa ni ti kpalim dabari, amaa n ti ku saɣim di zaa.

28Dimbɔŋɔ zuɣu, tiŋgban’ ni ti fabili, ka zuɣusaa ti zibigi. Mani n-yɛli lala, m mi pun lola di nia. N ku chɛ n ni lo ni n niŋ shɛli bee n-labi nyaaŋa.

29Wɔribariba mini peentɔriba vuri ni ti chɛ ka fɔŋ kam niriba zo, bɛ ni ti zo n-kpe mɔɣu ni, ka shɛb’ du tampima. Bɛ ni ti zo ka chɛ fɔndi maa zaa, ka so ku lan be di ni.

30Ka nyin’ ŋun zani dabari ŋɔ, bɔzuɣu ka a zaŋ situr’ ʒiɛkpain niŋ amaŋa? Bɔzuɣu ka a zaŋ salima nɛma niŋ amaŋa, ka bali chilo? A kul dihirila amaŋ’ nachiinsi yoli, dama a mamanim’ lihi ʒiɛm a, ka bɔri ni bɛ ku a.

31Dama n wumla kuhigu kaman paɣa n-wolisiri ni o dɔɣi la. Ka di biɛrim maa ŋmanila paɣ’ ni yɛn tuui dɔɣi la. Ziɔn bipuɣiŋga n-tarigi vuhibu ka kuhira, ka teeg’ o nuhi ka yɛra, ‘Mbusim paai ma! N tarigiri lurila bɛn yɛn ku ma tooni.’ ”

← Chapter 3 Jump to: Chapter 5 →