Jeremiah 11

Dagbani Bible (Naawuni Kundi Kasi)

← Chapter 10 Jump to: Chapter 12 →

1Yawɛ ni daa zaŋ yɛtɔɣ’ shɛŋa yɛli Jɛrimia m-bɔŋɔ:

2“Wummi alikauli yɛtɔɣa ŋɔ, ka zaŋ li yɛli Judanim’ mini Jɛrusalɛmnima.

3Yɛlim’ ba ni Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: Ninvuɣ’ so ŋun bi gbibi alikauli

4shɛli n ni daa lo yi yaannim’ saha shɛli n ni daa yihi ba Ijipti tiŋgbɔŋ ni na la, noli ni di o. N daa yihi ba la kuriti nyɛligibu daaŋa ni na ka yɛli ba, ‘Wummiya n yɛligu, ka niŋ n ni zali ya ni yi niŋmi shɛlikam zaa, ka di zuɣu chɛ ka yi leei n niriba ka m mi leei yi Naawuni,

5din ni chɛ ka n gbibi n ni daa po pɔ’ shɛli yi yaannim’ sani ni n ni zaŋ tiŋgban’ shɛli din mali bihim mini shiri pam ti ba kaman di ni nyɛ shɛm zuŋɔ ŋɔ.” Di saha ka n daa garigi yɛli, “Yawɛ, lala n-nyɛ li.”

6Ka Yawɛ daa yɛli ma, “Molimi yɛtɔɣa ŋɔ zaa Juda fɔntinsi ni mini Jɛrusalɛm pala zuɣu n-yɛra, ‘Wummiya alikauli ŋɔ yɛtɔɣa ka gbibi li.’

7Dama n ni daa yihi yi yaannim’ Ijipti tiŋgbɔŋ ni na saha shɛl’ la n daa saɣisi ba ni nimmoo, ka kul saɣisiri ba waawaayili hal ni zuŋɔ dabisili ŋɔ n-yɛra, ‘Deemiya n noli.’

8Amaa ka bɛ daa bi deei n noli bee n-wum n yɛligu. Sokam daa niŋ tipawumli n-tumdi tuumbiɛri kaman bɛ suhuri ni bɔri shɛm. Dinzuɣu ka n daa chɛ ka tibidarigibo shɛŋa zaa yɛla n ni daa yɛli n daalikauli lɔbu puuni la lu bɛ zuɣu.”

9Ka Yawɛ daa yɛli ma, “Judanim’ mini Jɛrusalɛmnim’ lola nia biɛɣu jɛndi ma.

10Bɛ lan labimi ti tumdi tuumbiɛ’ shɛŋa bɛ yaannim’ bɛn daa zaɣisi n nol’ la ni daa tumdi kurimbuni ha la. Bɛ jɛmdila wuna. Izraɛlnim’ mini Judanim’ saɣim n ni daa lo bɛ yaannim’ alikauli shɛli maa.”

11Dinzuɣu Yawɛ ni yɛli shɛm m-bɔŋɔ: “Biɛhiŋ kani, n ni chɛ ka alɔbo lu bɛ zuɣu, ka bɛ ku tooi zo n-yi di ni, hal bɛ yi kuhi niŋ ma gba n ku garigi ba.

12Di saha Juda fɔntinsinim’ mini Jɛrusalɛmnim’ ni ti chaŋ ti kuhi niŋ bɛ ni tuɣindi tulaale zim niŋdi wun’ shɛŋa maa, amaa bɛ kul ku tooi tiligi ba bɛ muɣisigu saha.

13Dama Judanima, yi wuna kul galisimi kaman yi fɔntinsi ni galisi shɛm, ka yi sara maligu bimbin’ shɛŋa yi ni me n-zali m maani maligu tiri Baal ka di nyɛ vi la mi galisi kaman Jɛrusalɛm pala ni galisi shɛm.

14Nyini, miri ka a suhi ma ti niriba ŋɔ bee n-kum bee n-zani bɛ zaani suhi ma, dama bɛ yi ti kuhi boli ma bɛ muɣisigu saha, n ku garigi ba.”

15N ni yuri so yi tum ma tuumbiɛɣu, o mali soli ni o lan be n yiŋa? Pɔri pɔbu bee biŋkɔbiri sara maligu ni tooi vuui mbusim maa? O ni tooi mali suhupiɛlli?

16Yawɛ daa booni ya la olivi ti’ mahali din mali wal’ viɛla, amaa sanʒiɛ’ titali puuni o ni niŋ buɣim dab’ li, ka di di di wula.

17Man’ Yawɛ ŋun nyɛ Tɔbbihi Naa, ka nyɛ ŋun daa zali ya ŋɔ yɛli yɛtɔɣ’ biɛɣu zaŋ chaŋ yi polo Izraɛlnim’ mini Judanim’ ni tum tuumbiɛ’ shɛli la zuɣu. Bɛ maanila maligu tiri Baal n-yiɣisiri n suhu.

18Yawɛ n-daa wuhi ma, ka m baŋ, di nyaaŋa ka o daa wuhi ma bɛ tuumbiɛri maa.

19Amaa n daa ŋmanila piɛ’ tarim’ so bɛ ni zaŋ chaŋ ni bɛ ti kɔrigi. N daa bi baŋ ni mani ka bɛ lɔri nia biɛɣu maa yɛra, “Chɛliya ka ti ŋmaai tia maa mini di wala luhi. Chɛliya ka ti yih’ o dunia ni, ka so ku lan teeg’ o yuli yɛla.”

20Amaa nyini Yawɛ ŋun nyɛ Tɔbbihi Naa ŋɔ, nyini n-nyɛ ŋun kariti saria ni wuntia; nyini n-nyɛ ŋun mi din be ninsal’ suhu ni min’ o tɛha ni; chɛ ka n nya a ni yɛn darigi bɛ tibili shɛm, dama n zaŋla di binshɛɣukam niŋ a nuu ni.

21Dinzuɣu Yawɛ ni yɛli shɛm zaŋ chaŋ Anatɔtnim’ bɛn bɔri ni bɛ ku a la polo m-bɔŋɔ. Bɛ yɛra, “Miri ka a lan zaŋ Yawɛ yuli tɔɣisi anabitali yɛtɔɣa yaha, di yi pa lala ti ni ku a.”

22Dinzuɣu Yawɛ ŋun nyɛ Tɔbbihi Naa ŋɔ ni yɛli shɛm m-bɔŋɔ: “N ni darigi bɛ tibili; bɛ ni zaŋ takɔbi ku bɛ nachimba, ka kum ku bɛ bidibisi mini bɛ bipuɣinsi

23hal ka bɛ ni so ti ku kpalim. Dama Anatɔtnim’ tibidarigibo yuuni yi ti paai, n ni chɛ ka alɔbo lu bɛ zuɣu.”

← Chapter 10 Jump to: Chapter 12 →