Jeremiah 18

Dagbani Bible (Naawuni Kundi Kasi)

← Chapter 17 Jump to: Chapter 19 →

1Yawɛ ni daa yɛli Jɛrimia shɛm m-bɔŋɔ:

2“Cham’ yaɣimɛra yiŋa ka n ti zaŋ n yɛtɔɣa tɔɣis’ a nimaani.”

3Lala zuɣu ka n daa chaŋ yaɣimɛra maa yiŋa ka o ti bela yaɣiri mɛbu ni.

4Ka o ni daa zaŋ yaɣiri mɛri duɣ’ shɛli maa daa saɣim o nuu ni, ka o daa zaŋ li taɣi me o ni daa nya ka duɣ’ shɛli viɛl’ o sani.

5Di saha ka Yawɛ daa yɛli ma,

6“N ku tooi niŋ yinim’ Izraɛlnim’ kaman yaɣimɛra maa ni niŋ shɛm maa?” Yawɛ lan yɛli, “Yaɣiri maa ni kul be yaɣimɛra maa nuu ni shɛm maa, lala ka yinim’ Izraɛlnim’ gba be n nuu ni. Yawɛ n-yɛli lala maa.

7Shɛli ni n ni tooi yɛli zuliya shɛli bee nam shɛli niriba ni n ni vuɣi ba bee n-wurim ba ka ku ba,

8amaa n ni yɛli zuliya shɛli maa nim’ yi chɛ zaɣ’ biɛɣu tumbu, n ni taɣi n tɛha, ka ku lan chɛ ka n ni lo ni alɔbo shɛli lu bɛ zuɣu maa paai ba.

9Ka shɛli ni n ni tooi yɛli zuliya shɛli bee nam shɛli niriba ni n ni chɛ ka bɛ zani viɛnyɛliŋga,

10amaa di zuliya maa nim’ yi tumdi zaɣ’ biɛɣu n sani, ka zaɣisi ni bɛ ku wum n yɛligu, dindina n ni taɣi n tɛha zaŋ chaŋ zaɣ’ viɛl’ shɛli n ni di yɛn niŋ ba maa polo.

11Dinzuɣu pumpɔŋɔ yɛlim’ Judanim’ mini Jɛrusalɛmnima ni Yawɛ yɛliya, “N nyɛla yaɣimɛra, ŋun’ maani zaɣ’ biɛɣu shili n jɛndiri ya, ka lɔri di nia zaŋ chaŋ yi sani. Pumpɔŋɔ yi zaa zomiya yi zaɣ’ biɛɣu maa tumbu ni, ka taɣi yi biɛhigu mini yi tuma.”

12Amaa bɛ ni garigi yɛli, “Di ka buchi, ti ni gbibila ti ni lo nia shɛŋa, ka sokam tumd’ o tipawumli tuumbiɛri.”

13Dinzuɣu Yawɛ ni yɛli shɛm m-bɔŋɔ: “Bɔhimi zuliya kam, ŋuni n-lee na mi n-wum yɛlli ŋɔ tatabo? Izraɛlnim’ bɛn ŋmani paɣipiɛliga ŋɔ tum zaɣ’ biɛ’ titali.

14Binshɛŋa din ŋmani sakuɣa la na mi n-kɔŋ Lɛbanɔn tampima la lɔna ni? Ka zoya ni kulibɔŋ maha la kɔzɔrim na mi n-nyuui?

15Amaa ka n niriba bɛn’ tam n yɛla, ka mali binyara nyɔri buɣim maani sara tiri binshɛŋa din nyɛ ʒiri binyara. Bɛ tuui bɛ so’ shɛli din nyɛ so’ kurili maa zuɣu, ka taɣi doli so’ kpansi, din pa so’ lɔɣu.

16Bɛ zaŋ tiŋgbɔŋ ŋɔ leela dabiɛm shee, ka niriba lihi ʒiɛm li sahakam. Bɛnkam zaa gari nimaani, dabiɛm gbahi ba mi ka bɛ viini bɛ zuɣuri.

17N ni wurim ba bɛ dimnim’ tooni bahi kaman pɔhim n-yi gbinni polo na ti ʒe ba chaŋ la. Bɛ zaɣ’ biɛɣu nyabu dali, n ni ti lɛbi n nyaaŋa biri ba ka pa ni n tooni.

18Di saha ka bɛ daa yɛli, “Chɛliya ka ti lo Jɛrimia nia biɛɣu, dama maligumaaniba kul ni beni wuhiri ti, ka yɛnnima beni n-tiri ti saɣisigu, ka anabinim’ beni n-tɔɣisiri ti anabitali yɛtɔɣa. Chɛliya ka ti niŋ din ni chɛ ka ti nya o taali, ka di chɛliya ka ti lan wum o yɛligu.”

19Di saha ka n daa yɛli, “Yawɛ, wummi n suhigu, ka wum n dimnim’ ni yɛri shɛm.

20Nira ni tooi zaŋ zaɣ’ biɛɣu yo zaɣ’ viɛlli samli? Amaa bɛ gbi ma la zamba bɔɣili. Teemi n ni daa zani a tooni n-tɔɣisi bɛ zaɣ’ viɛlli yɛla shɛm ni di chɛ ka a miligi a suhuyiɣisili ka chɛ ba la.

21Dinzuɣu chɛ ka kum ku bɛ bihi, ka chɛ ka bɛ zaŋ takɔbi ku ba, ka bɛ paɣiba leei pakoya ni bɛn kɔŋ bɛ bihi. Chɛ ka alɔbo ku bɛ dɔbba, ka chɛ ka bɛ zaŋ takɔbiri ku bɛ nachimba tɔbu ni.

22Chɛ ka ŋmɛnditoya liri ba libigi ba, ka chɛ ka kunsi mɔni bɛ yinsi, dama bɛ gbi bɔɣili sɔŋ ni n lu di ni, ka bari zana ni bɛ gbaai ma.

23Amaa nyin’ Yawɛ mi bɛ ni lo nia biɛ’ shɛŋa zaa ni bɛ ku ma. Di chɛ bɛ taali maa, a mi di kpihim bɛ daalahichi a sani. Chɛ ka bɛ lu a tooni, ka a darigi bɛ tibili a suhuyiɣisili ŋɔ saha.”

← Chapter 17 Jump to: Chapter 19 →