Jeremiah 12

Dagbani Bible (Naawuni Kundi Kasi)

← Chapter 11 Jump to: Chapter 13 →

1Yawɛ, n yi yɛn galim’ a, a ni mali yɛlimaŋli, amaa chɛ ka m bɔh’ a m bɔhigu ŋɔ. Bɔzuɣu ka tuumbiɛrilana tɔŋda? Bɔzuɣu ka ʒiŋmariba kul tɔŋda?

2Nyini n-nam ba, ka bɛ beni, ka zooi n-dɔɣi bihi, ka a yɛla kul be bɛ noya ni, amaa ka bɛ suhuri lee be katiŋ’ ni nyini.

3Amaa Yawɛ, a mi ma; a nyari ma, ka buɣisiri ma, ka n suhu bela a ni. Vom’ ba yihina kaman piɛri ka bɛ vɔri ni bɛ ti kɔrigi la. Woligim’ ba zali gu kɔrigibu dali.

4Saha yuusim wula ka tiŋgbɔŋ ŋɔ lee yɛn fabili? Ka saha yuusim wula ka luɣilikam mɔri yɛn kuui? Dama ninvuɣ’ shɛb’ bɛn be di ni tuumbiɛri zuɣu chɛ ka biŋkɔbiri mini noombihi zaa kpira; ka din pahi nyɛla, niriba yɛra, “O nini bi nyari ti ni niŋdi shɛli.”

5A mini bɛn zɔri bɛ naba zuɣu yi zɔri ka di wum’ a, wula ka a mini yuri ni tooi kpaɣi zo? Ka a yi ku zani viɛnyɛliŋga palo ni, wula ka a lee yɛn tooi zani viɛnyɛliŋga Jɔɔdɛn nyɔŋ puuni?

6Dama hal a min’ a mabihi bɛn be dundɔn’ yin’ ni nyɛla bɛn lo a zaɣ’ biɛɣu. Bɛ kul yimi zani a zuɣu; hal bɛ yi kul paɣir’ a gba nyin’ di niŋ ba yɛda.

7N zaɣisi n yiŋa. N zaŋ n ni su shɛli bahi. N zaŋ n suhu ni yuri ninvuɣ’ shɛb’ pam niŋ bɛ dimnim’ nuu ni,

8N ni su ninvuɣ’ shɛb’ maa ŋmanila gbuɣinli ŋun be mɔɣu ni n sani. Bɛ ŋumdimi bahiri n zuɣu, dinzuɣu ka n je ba.

9N niriba ŋmanila wubiga ka tɔra laɣim gili ni bɛ di o. Cham’ ti laɣim mɔɣu ni biŋkɔbiri zaa, n-zaŋ ba na ka bɛ ti ŋub’ o.

10Piɛguliba pam saɣim n wain tihi puu, bɛ no n ni su shɛli sɔŋ tiŋa. Bɛ chɛ ka n tiŋgbɔn’ shɛli din viɛli pam la leei dabari ni tiŋgban’ nɛli.

11Bɛ chɛ ka di zanila dabari, ka di nyɛ dabari n-fabindi niŋdi ma. Tiŋgbɔŋ maa zaa zanila dabari, amaa ka so baɣa kani.

12Ŋmɛnditoya kana ti bela tiŋgbɔŋ maa ni zoya zuɣu zaa, dama Yawɛ tɔbu n-lu tiŋgbɔŋ maa ni luɣilikam; ka so ku tiligi.

13Bɛ daa birila alikama, ka ti chɛla gɔhi. Bɛ tum tuma ka di wum ba, amaa ka bi nya shɛli. Bɛ yi ti kpuɣi bɛ puri atam, vi ni gbahi ba, Yawɛ suhu ni yiɣisi pam maa zuɣu.

14Man’ Yawɛ ni yɛli Izraɛlnim’ ʒiʒiinitab’ bɛn nyɛ ninvuɣ’ biɛri ka saɣim n ni daa zaŋ tiŋgbɔn’ shɛli ti n niriba Izraɛlnim’ ni bɛ su li la shɛm m-bɔŋɔ: “N yɛn vuɣi ba la bɛ tiŋgban’ ni, ka yihi Judanim’ bɛ sunsuuni.

15Ka n yi vuɣi ba, di nyaaŋa n ni lan zo ba nambɔɣu, ka zaŋ bɛ zaa labisi bɛmaŋmaŋ’ ni su tiŋgbɔn’ shɛli ni.

16Di nyaaŋa bɛ yi ni bɔhim n niriba maa soya ni bɛ suhuri zaa, ka zaŋdi n yuli pɔri bɛ pɔri yɛra, ‘Yawɛ ŋun be ŋɔ zuɣu’ kaman bɛ ni daa wuhi n niriba maa ka bɛ pɔri Baal shɛm la, dindina bɛ ni pahi n niriba ni.

17Amaa zuliya shɛli niriba yi zaɣisi ni bɛ ku wum, dindina n ni vuɣi di zuliya maa zaa n-ku ba.” Man’ Yawɛ n-yɛli lala maa.

← Chapter 11 Jump to: Chapter 13 →