Jeremiah 24

Dagbani Bible (Naawuni Kundi Kasi)

← Chapter 23 Jump to: Chapter 25 →

1Yawɛ daa wuhi ma fiig tiwala piɛr’ ayi din daa ʒe Yawɛ jɛmbu duu tooni. Babilɔn Naa Nɛbukadnɛza ni daa gbahi Jɛhoyakim bia Jɛhoyachin ŋun daa nyɛ Juda naa la min’ o kpambaliba ni o nuhi tuumbaŋdiba ni machɛlinima n-zaŋ ba yi Jɛrusalɛm kuli Babilɔn la nyaaŋa ka dimbɔŋɔ daa niŋ.

2Piɛ’ yini daa malila fiig tiwal’ viɛla kaman fiig tiwal’ daŋda din mooi, amaa piɛ’ din’ la din’ daa malila fiig tiwala din bie pam, ka di biɛbu maa zuɣu chɛ ka so ku tooi di li.

3Ka Yawɛ daa bɔhi ma, “Jɛrimia, bɔ ka a lee nya?” Ka n gari yɛli, “N nyala fiig tiwala din viɛl’ pam, ka nya fiig tiwala din bie pam, ka di biɛbu maa zuɣu chɛ ka so ku tooi di li.”

4Di saha ka Yawɛ daa yɛli ma,

5“Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: Kaman fiig tiwal’ viɛla maa ni be shɛm maa, lala ka n lihi Juda ninvuɣ’ shɛb’ n ni daa chɛ ka bɛ gbahi n-zaŋ ba kpe chaŋ Babilɔn tiŋgbɔŋ ni la ka bɛ viɛla.

6N ni zaŋ n zaɣa niŋ bɛ ni, ka niŋ ba din viɛla, ka ti lan zaŋ ba labisi tiŋgbɔŋ ŋɔ ni na. N ni chɛ ka bɛ zani, ka ku lan daai ba luhi. N ni zaŋ ba sa, ka ku lan sibigi ba.

7N ni ti ba suhu shɛli din ni chɛ ka bɛ baŋ ni mani n-nyɛ Yawɛ. Ka bɛ ti leei n niriba, ka m mi leei bɛ Naawuni; dama bɛ ni ti labi n sanna ni bɛ suhuri zaa.”

8Amaa Yawɛ ni yɛli shɛm m-bɔŋɔ: “Kaman fiig tiwal’ biɛri din bie pam ka so ku tooi di li la ni be shɛm, lala ka n yɛn niŋ Juda naa Zɛdɛkia min’ o kpambaliba ni Jɛrusalɛm ninvuɣ’ shɛb’ bɛn kpalim be tiŋgbɔŋ ŋɔ ni mini bɛn be Ijipti tiŋgbɔŋ ni la.

9N ni chɛ ka bɛ leei binshɛli din bie, ka mali dabiɛm dunia ŋɔ zuliya kam zaa sani, ka nya filiŋ mini ansarisi malibo ni turi, ka noli ni di ba n ni kari ba tahi luɣ’ shɛlikam zaa.

10Ka n ti chɛ ka tɔbu mini kum ni alɔbo lu bɛ zuɣu hal nti naai bɛ birili n ni daa zaŋ tiŋgbɔn’ shɛli ti bɛ mini bɛ yaannim’ ŋɔ ni.”

← Chapter 23 Jump to: Chapter 25 →