Jeremiah 37

Dagbani Bible (Naawuni Kundi Kasi)

← Chapter 36 Jump to: Chapter 38 →

1Jɔsia bia Zɛdɛkia ka Babilɔn Naa Nɛbukadnɛza daa zaŋ leei Juda naa n-zali Jɛhoyakim bia Jɛhoyachin zaani.

2Amaa o min’ o kpambaliba ni tiŋgbɔŋ maa ni niriba daa bi wum Yawɛ yɛligu shɛli o ni daa chɛ ka anabi Jɛrimia zaŋ yɛli ba maa.

3Ka Naa Zɛdɛkia daa tim Shɛlɛmia bia Jɛhukal mini Maasɛya bia Zɛfania ŋun daa nyɛ maligumaana la anabi Jɛrimia sani ni bɛ ti yɛl’ o, “Jaande, suhimi Yawɛ ŋun nyɛ ti Naawuni ŋɔ ti ti!”

4Di saha Jɛrimia daa kul gɔrila o yubu niriba maa sani, dama bɛ daa na bi kpɛh’ o duu.

5Amaa ka Firawuna tɔbbihi daa yi Ijipti na, ka Babilɔnnim’ bɛn daa teei gili Jɛrusalɛm maa daa wum bɛ yɛla ka zo n-yi Jɛrusalɛm.

6Di saha ka Yawɛ daa yɛli anabi Jɛrimia,

7“Man’ Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: Yi niriba ayi shɛba Juda naa ni tim n sanna ni yi ti bɔhi baŋ din be n sani ŋɔ, yi ni ti yɛn yɛl’ o shɛm m-bɔŋɔ: Firawuna tɔbbihi bɛn yina ni bɛ ti sɔŋ a ŋɔ ni labi kuli Ijipti bɛ tiŋgbɔŋ ni.

8Ka Babilɔnnim’ maa ni labina ti tuhi tiŋ’ ŋɔ nima. Bɛ ni tuhi deei li, ka nyo li buɣim.”

9Yawɛ yɛliya, “Miriya ka yi yɔhim yimaŋ’ yɛra, ‘Babilɔnnim’ maa shiri zoya ka chɛ ti, dama bɛ ku zo ka chɛn ya.

10Hal yi yi nyaŋ Babilɔn tɔbbi’ shɛb’ bɛn tuhiri ya maa zaa, ka di ti kpalimla bɛn nya dansi kɔŋko bɛ suɣa ni gba, bɛ ni yiɣisina ti nyo ya ŋɔ buɣim.’ ”

11Babilɔn tɔbbihi ni daa yi Jɛrusalɛm zo saha shɛli Firawuna tɔbbihi ni daa kanna la,

12ka Jɛrimia daa yi Jɛrusalɛm ni o kuli Bɛnjamin zuliya tiŋgban’ ni nti deeg’ o tarili nimaani niriba maa sani.

13O ni daa paai Bɛnjamin zuliya tiŋgbani maa dunɔdali gbini, ka Shɛlɛmia bia Irija ŋun daa nyɛ Hanania yaaŋa ka nyɛ dunɔgul’ la daa be nimaani, ka o daa gbaai anabi Jɛrimia ka yɛra, “A zɔrimi doli Babilɔnnim’ maa ni a chaŋ.”

14Ka Jɛrimia yɛl’ o, “Di nyɛla ʒiri. M bi yɛn zo n-doli Babilɔnnim’ maa chaŋ.” Amaa ka Irija daa zaɣisi ni o ku wum o yɛligu maa, ka gbaai Jɛrimia n-zaŋ o ti ti kpambaliba.

15Ka kpambaliba maa suhuri daa yiɣisi bahi Jɛrimia zuɣu, ka bɛ chɛ ka bɛ bu o, ka zaŋ o ti kpɛhi duu Jɔnatan ŋun daa nyɛ gbaŋŋmar’ la yiŋa, dama bɛ daa zaŋ o yiŋ’ maa leela jɛriyali.

16Ka bɛ daa zaŋ Jɛrimia ti niŋ bɔɣili ni jɛriyali maa ni, ka o daa be di puuni niŋ daba ayi.

17Di nyaaŋa ka Naa Zɛdɛkia daa ti tim ka bɛ chaŋ ti yih’ o na ka o deeg’ o. Ka naa maa daa bɔh’ o ashilɔni o yiŋ’ maa ni, “Yawɛ yɛli yɛtɔɣ’ shɛli?” Ka Jɛrimia garigi yɛli, “O yɛli shɛli.” Di saha ka o daa yɛli, “Bɛ ni zaŋ a niŋ Babilɔn naa nuu ni.”

18Ka Jɛrimia daa bɔhi Naa Zɛdɛkia, “Taali bɔ ka n lee tum’ a bee a kpambaliba bee niriba ŋɔ ka yi chɛ ka bɛ kpɛhi ma duu maa?

19A daanab’ shɛb’ bɛn daa tɔɣisiri anabitali yɛtɔɣa yɛri ni Babilɔn naa ku kana ti tuh’ a bee n-tuhi tiŋgbɔŋ ŋɔ nim’ la lee be ya?

20Pumpɔŋɔ n dana, jaande wummi n ni yɛn yɛl’ a shɛm ŋɔ. Niŋmi ania wum n fabila ŋɔ, ka di lan chɛ ka bɛ zaŋ ma labisi Jɔnatan yiŋ’ maa ni ka n ti kpi nimaani.”

21Lala zuɣu ka Naa Zɛdɛkia daa bahi noli ka bɛ zaŋ Jɛrimia ti niŋ yiliguliba dundɔŋ ni, ka chɛ ka bɔrɔbɔromaaniba tir’ o bɔrɔbɔro kpillikpilli biɛɣukam hal ka bɔrɔbɔro daa ti lan ka tiŋgbani maa ni. Dinzuɣu Jɛrimia daa kul kpalim bela yiliguliba dundɔŋ maa ni.

← Chapter 36 Jump to: Chapter 38 →