Jeremiah 39

Dagbani Bible (Naawuni Kundi Kasi)

← Chapter 38 Jump to: Chapter 40 →

1Juda Naa Zɛdɛkia nam dibu yuma awɛi ni, gol’ so ŋun pahiri chir’ pia puuni ka Babilɔn naa Nɛbukadnɛza min’ o tɔbbihi zaa daa kana ti liri Jɛrusalɛm n-teei gil’ li.

2Zɛdɛkia nam dibu yuun’ piniyini, gol’ so ŋun pahir’ anahi daba awɛi dali ka bɛ daa kabi Jɛrusalɛm goondaa luhi.

3Bɛ ni daa ŋme n-deei Jɛrusalɛm, ka Babilɔn naa kpambaliba zaa daa kana ti ʒini sunsuuni dunɔdal’ la gbini, bɛna n-daa nyɛ Nɛrigalisharɛza mini Samgarinɛbo ni Sarisɛkim ŋun daa nyɛ kpambal’ kpɛm’ la, ni Nɛrigalisharɛza so ŋun gba daa nyɛ kpambal’ kpɛm la, ni Babilɔn kpamba zaa bɛn pahi.

4Juda Naa Zɛdɛkia min’ o tɔbbihi zaa ni daa nya ba, ka bɛ zo n-kpe naa ʒiɛvari puu ni nti yi dunɔdali shɛli din daa be goma ayi sunsuuni la n-zaŋ bɛ zuɣuri ʒi Araba polo.

5Amaa ka Babilɔn tɔbbihi daa kari doli ba nti gbaai Zɛdɛkia Jɛriko bɔpiɛligu ni n-zaŋ o tahi ti ti Babilɔn Naa Nɛbukadnɛza Ribila din daa be Hamat tiŋgbɔŋ ni la. Ka o daa kar’ o saria nimaani.

6Ka Babilɔn naa daa ku Zɛdɛkia bidibisi o ninni Ribila maa; Babilɔn naa maa daa lan ku Juda kpambaliba zaa.

7Ka o daa chɛ ka bɛ fɔɣi Zɛdɛkia nina, ka ba o bandi ni bɛ zaŋ o kuli Babilɔn.

8Ka Babilɔnnim’ daa nyo nayili mini niriba yiya buɣim, ka daai Jɛrusalɛm goma luhi.

9Di nyaaŋa ka Nɛbuzaradan ŋun daa nyɛ yiliguliba sapashin’ kpɛm’ la daa zaŋ ninvuɣ’ shɛb’ bɛn daa kpalim tiŋ’ maa puuni ka nyɛ bɛn daa zo n-chaŋ o sani mini bɛn daa kpalim tiŋ’ maa ni la kuli Babilɔn.

10Nɛbuzaradan ŋun daa nyɛ yiliguliba sapashin’ kpɛm’ maa daa chɛla ninvuɣ’ shɛb’ bɛn nyɛ nandaamba ka ka binshɛli niŋ tiŋgbɔŋ maa ni. Di saha maa o daa ti ba wain tihi puri mini pu’ shɛŋa pahi.

11Ka Babilɔn Naa Nɛbukadnɛza daa bahi Nɛbuzaradan ŋun daa nyɛ yiliguliba sapashin’ kpɛm’ maa noli zaŋ chaŋ Jɛrimia polo yɛli,

12“Zaŋm’ o ti lih’ o viɛnyɛliŋga, ka miri ka a niŋ o zaɣ’ biɛɣu, amaa niŋm’ o ni yɛl’ a ni a niŋmi shɛli.”

13Lala zuɣu ka Nɛbuzaradan ŋun daa nyɛ yiliguliba sapashin’ kpɛm’ maa mini Nɛbushaziban ŋun daa nyɛ kpambal’ kpem’ la ni Nɛrigalisharɛza ni Babilɔn naa sapashin’ kpamba zaa

14daa tim ka bɛ chaŋ yiliguliba dundɔŋ ni ti zaŋ Jɛrimia na; ka bɛ daa zaŋ o niŋ Ahikam bia Gɛdalia ŋun daa nyɛ Shafan yaaŋa la nuu ni ni o zaŋ o kuli. Dimbɔŋɔ zuɣu daa chɛ ka o be omaŋmaŋ’ niriba sani.

15Saha shɛli Jɛrimia ni daa be yiliguliba dundɔŋ la ni ka Yawɛ daa yɛl’ o,

16“Cham’ ti yɛli Ɛbɛdimɛlɛk ŋun nyɛ Itiɔpia nir’ la ni Yawɛ ŋun nyɛ Tɔbbihi Naa ka nyɛ Izraɛlnim’ Naawuni ŋɔ ni yɛli shɛm m-bɔŋɔ: ‘N ni chɛ ka n ni daa yɛli yɛtɔɣ’ shɛŋa jɛndi tiŋ’ ŋɔ la niŋ pali. Di ti yɛn nyɛla zaɣ’ biɛɣu, ka pa zaɣ’ viɛlli. Di ni ti niŋ pali a ninni dindali maa.’ ”

17Amaa Yawɛ yɛliya, “Dindali maa n ni tilig’ a, ka bɛ ku zaŋ a niŋ a ni zɔri ninvuɣ’ shɛb’ la nuu ni.

18Dama n shiri ni tilig’ a, ka bɛ ku zaŋ takɔbi ku a, amaa a ni zaŋ a nyɛvili zo n-tiligi, a ni niŋ ma naani la zuɣu. Yawɛ n-yɛli lala maa.”

← Chapter 38 Jump to: Chapter 40 →