Jeremiah 7

Dagbani Bible (Naawuni Kundi Kasi)

← Chapter 6 Jump to: Chapter 8 →

1Yawɛ ni daa yɛli Jɛrimia yɛtɔɣ’ shɛŋa m-bɔŋɔ:

2Zanimi Yawɛ jɛmbu duu dunɔdali gbini n-yɛli ba nimaani, “Judanim’ zaa bɛn doli dunoya ŋɔ kpɛri ti jɛmdi Yawɛ, wummiya Yawɛ ni yɛli shɛm.

3Yawɛ ŋun nyɛ Tɔbbihi Naa ka nyɛ Izraɛlnim’ Naawuni ŋɔ ni yɛli shɛm m-bɔŋɔ: Taɣimiya yi biɛhigu mini yi tuma, ka n chɛ ka yi be kpe.

4Miriya ka yi dihi yɔhiŋgu yɛtɔɣa ŋɔ tabili. Dina n-nyɛ: ‘Yawɛ jɛmbu duu m-bɔŋɔ, Yawɛ jɛmbu duu m-bɔŋɔ, Yawɛ jɛmbu duu m-bɔŋɔ.’

5“Dama yi yi taɣi yi biɛhigu mini yi tuma ka be yɛlimaŋli biɛhigu zaŋ chaŋ tab’ sani,

6ka bi nahindi saamba mini kpibisi ni pakoya bee n-kuri bɛn ka taali kpe, ka bi jɛmdi buɣa din nyɛ barina zaŋ chaŋ yi sani ŋɔ,

7dindina n ni be yi sani kpe, n ni daa zaŋ tiŋgbɔn’ shɛli ti yi yaannim’ kurimbuni ha ni bɛ su li sahakam ŋɔ ni.

8Yi nyɛla bɛn kul deeri yɔhiŋgu yɛtɔɣa din ka buchi.

9Yi zura, ka kuri niriba, ka niŋdi zina, ka ŋmari ʒiri pɔri pɔri, ka maani maligu tiri Baal, ka jɛmdi buɣ’ shɛŋa yi ni daa pun bi mi.

10Di nyaaŋa ka yi kanna ti zaani n tooni du’ shɛli din nyɛ n jɛmbu duu ŋɔ ni yɛra, “Ti tiligiya.” Ka lan yi n-chaŋ ti tumdi din chihirinim’ ŋɔ yaha.

11N ni zaŋ n yuli boli jɛmbu du’ shɛli ŋɔ, yi pa leela ŋmɛnditoya duu yi sani? Yawɛ yɛliya, ‘N kul pala nina lihiri ya.’

12Pumpɔŋɔ chamiya m biɛhigu shee din be Shilo ka nyɛ luɣ’ shɛli n ni daa zaŋ leei n jɛmbu shee la nti nya n ni daa niŋ li shɛm n niriba Izraɛlnim’ tuumbiɛri zuɣu.

13Ka pumpɔŋɔ yi ni niŋ dimbɔŋɔnim’ zaa zuɣu, Yawɛ yɛliya, “N daa tɔɣisi ya yɛtɔɣa waawaayili ka yi zaɣisi wumbu, ka n daa boli ya ka yi zaɣisi ni yi ku saɣi.

14Dinzuɣu n ni niŋ n ni zaŋ n yuli boli jɛmbu du’ shɛli yi ni niŋ naani ŋɔ mini n ni daa zaŋ luɣ’ shɛli ti yi mini yi yaannim’ la kaman n ni daa niŋ Shilo shɛm maa.

15N ni kari ya n sani bahi kaman n ni daa kari yi mabihi bɛn nyɛ Ifriim zuliya la zaa bahi shɛm la.”

16Nyini, miri ka a suhi ma n-ti niriba ŋɔ. Miri ka a duh’ a yee n-suhi bɛ zuɣu, a mi miri ka a balim ma, n ku deeg’ a suhigu.

17A bi nya bɛ ni tumdi tuun’ shɛŋa Juda fɔntinsi ni mini Jɛrusalɛm pala zuɣu?

18Bihi kabirila dari, ka dɔbba maani buɣim, ka paɣiba mi ŋɔriti zim ni bɛ mali maha ti wuni so bɛ ni booni Zuɣusaa Paɣa ŋun nyɛ naa la, ka boori binnyura tiri wun’ shɛŋa ni bɛ chɛ ka n suhu yiɣisi.

19Yawɛ yɛliya, “N suhu ka bɛ bɔri ni bɛ yiɣisi maa? Pa bɛmaŋmaŋ’ ka bɛ niŋ lala ni di ŋmaligi di ba maa?”

20Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni yiɣisi n suhu pam bahi kpe ŋɔ mini ninsalinim’ ni biŋkɔbiri ni puri ni tihi ni tiŋgbani atam zuɣu. N suhuyiɣisili maa ni bemi kaman buɣim la, ka so ku tooi kpihi li.

21Yawɛ ŋun nyɛ Tɔbbihi Naa ka nyɛ Izraɛlnim’ Naawuni ŋɔ ni yɛli shɛm m-bɔŋɔ: Zaŋmiya yi ni zaŋdi sara shɛli nyɔri buɣim la nimdi pahi yi sara maligunim’ nimdi zuɣu ŋubi.

22Dama n ni daa yihi yi yaannim’ Ijipti tiŋgbɔŋ ni na dahin shɛl’ la, n daa bi yɛli ba shɛli bee n-zali ba zaligu zaŋ chaŋ bɛ ni zaŋdi sara shɛli nyɔri buɣim la mini sara maligunim’ polo.

23Amaa zaligu ŋɔ ka n daa naɣ’ zali ba, “Deemiya n noli, ka n nyɛ yi Naawuni, ka yi mi nyɛ n niriba, ka yi tumdi n ni zali ya ni yi tummi shɛm, ka biɛhigu niŋ viɛnyɛliŋga yi sani.”

24Amaa ka bɛ daa zaɣisi n yɛligu maa wumbu, ka bi deei li, ka niŋ tipawumli bɛ ni daa lo zaɣ’ biɛɣu tumbu zuɣu, ka bɛ daa dolila bɛ suhuri ni bɔri shɛm, ka lihirila bɛ nyaaŋa, ka bi lihiri bɛ tooni.

25Yi yaannim’ ni daa yi Ijipti tiŋgbɔŋ ni dahin’ shɛl’ la hal ni zuŋɔ n kul timdila n daba zaa bɛn nyɛ anabinim’ la yi sanna dabisili kam.

26Amaa ka yi niŋ tipawumli, ka zaɣisi bɛ yɛligu wumbu, ka zaŋ li niŋ yi baɣaka. Yi tum tuumbiɛri pam n-gari yi yaannim’ ni daa tum shɛm.

27Dinzuɣu yɛlim’ ba dimbɔŋɔnim’ zaa, amaa bɛ ku wum a yɛligu. A ni boli ba, amaa bɛ ku garig’ a.

28Yɛlim’ ba, “Zuliya ŋɔ nyɛla bɛn bi deei Yawɛ ŋun nyɛ bɛ Naawuni ŋɔ noli, ka zaɣisi saɣisigu; yɛlimaŋli vuuya, di lan ka bɛ noya ni.”

29“Pinimiya yi zabiri bahi, ka kumiya kuyila zoya zuɣu, dama Yawɛ zaɣisi ya, ka zaŋ ya bahi, yinim’ zuliya shɛb’ bɛn chɛ ka o suhu yiɣisi ŋɔ.”

30Yawɛ yɛliya, “Judanim’ tum alahichi n ninni. Bɛ zaŋ din chihiri kpe n ni zaŋ n yuli boli jɛmbu du’ shɛl’ la ni n-ta li daɣiri.

31Bɛ kul mɛrila buɣili Tɔfɛt din be Hinnom Vinvamli ni la jɛmbu shee ni bɛ zaŋdi bɛ bidibisi mini bɛ bipuɣinsi nyɔri buɣim, ka di pala n ni zali shɛli, ka mi pala din yi n tɛha ni na.”

32Dinzuɣu Yawɛ yɛliya, “Dahin’ shɛli kanna, ka bɛ ti ku lan bol’ li Tɔfɛt bee Hinnom Vinvamli, amaa bɛ ni ti booni li la Ninvuɣ’ kubo Vinvamli. Dama bɛ ni ti sɔɣi ba Tɔfɛt hal ka palo ti lan kani.

33Bɛ kpiimba ni ti nyɛla juri mini mɔɣu ni biŋkɔbiri bindira, ka so ti ku kari ba.

34Ka so ti ku lan wum suhupiɛlli diɛma vuri. Bɛ ti ku wum amiliya mini aŋgo kukoya Juda fɔntinsi ni mini Jɛrusalɛm solɔri zuɣu. Dama tiŋgbɔŋ maa ni ti zani dabari.”

← Chapter 6 Jump to: Chapter 8 →