Jeremiah 13

Dagbani Bible (Naawuni Kundi Kasi)

← Chapter 12 Jump to: Chapter 14 →

1Yawɛ ni daa yɛli ma shɛm m-bɔŋɔ: “Cham’ ti da jinjɛŋŋma’ piɛlli n-zaŋ so, amaa di zaŋ li tim kom ni.”

2Dinzuɣu ka n daa da jinjɛŋŋmaa maa kaman Yawɛ ni daa yɛli ma shɛm maa n-zaŋ li so.

3Ka Yawɛ daa lan tɔɣisi ma yɛtɔɣa pahi buyi yɛli,

4“Zaŋm’ a ni daa da jinjɛŋŋma’ shɛli sɔri maa chaŋ Yufretiiz Mɔɣili ni pumpɔŋɔ nti zaŋ li pi tampiŋ lɔŋni.”

5Dinzuɣu ka n daa zaŋ li chaŋ Yufretiiz Mɔɣili maa ni ti pi kaman Yawɛ ni daa yɛli ma shɛm maa.

6Ka di daa ti niŋ daba ayi ka Yawɛ lan yɛli ma, “Cham’ Yufretiiz Mɔɣili ni pumpɔŋɔ nti yihi n ni daa yɛl’ a ni a zaŋ jinjɛŋŋma’ shɛli ti sɔɣi nimaani la na.”

7Di saha ka n daa chaŋ Yufretiiz Mɔɣili ni nti kurigi n ni daa zaŋ jinjɛŋŋmaa maa pi luɣ’ shɛli maa n-yihi li na. Amaa ka jinjɛŋŋmaa maa daa saɣim ka lan ka buchi.

8Di saha ka Yawɛ daa yɛli ma,

9“Lala ka n yɛn saɣim Judanim’ ni mali shɛli nyuri bara la mini Jɛrusalɛmnim’ ni mali shɛli nyuri bara pam la.

10Ninvuɣ’ biɛri bɛn zaɣisi ni bɛ ku wum n yɛligu, ka niŋ tipawumli n-doli bɛ suhuyubu soli ka jɛmdi wun’ shɛŋa la ni ti bemi kaman jinjɛŋŋmaa din lan ka buchi ŋɔ ni be shɛm ŋɔ.

11Kaman nira ni so jinjɛŋŋmaa ka di tab’ o niŋgbuŋ shɛm la, lala ka n daa chɛ ka Izraɛlnim’ zaa mini Judanim’ tabi ma din ni chɛ ka bɛ nyɛ n niriba, ka n yuli du, ka n nya paɣibu mini jilima, amaa ka bɛ zaɣisi wumbu.” Man’ Yawɛ n-yɛli lala maa.

12Yɛlim’ ba ni Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: “Niŋmiya wain pali wain duɣu kam.” Bɛ ni bɔh’ a, “A tɛhiya ni ti bi mi ni di simdi ni ti niŋ wain pali wain duɣu kam?”

13Di saha ka a yɛli ba, “Yawɛ ni yɛli shɛm m-bɔŋɔ: ‘N yɛn chɛmi ka tiŋgbɔŋ ŋɔ nim’ zaa mini na’ shɛb’ bɛn ʒi Dauda ʒiishee la ni maligumaaniba ni anabinima ni Jɛrusalɛmnim’ zaa nyu dam kuli.

14N ni ti daai bɛ ninkura mini bihi zaa to taba. N yi ti yɛn ku ba, n ku chɛ so bee n-zo so nambɔɣu.’ ” Man’ Yawɛ n-yɛli lala maa.

15Yawɛ yɛliya: Gbilisimiya tibili wum, chɛliya karimbaani.

16Timiya Yawɛ ŋun nyɛ yi Naawuni ŋɔ jilima din ni chɛ ka o ku tahi zibisim na, ka yi tuui zoya zuɣu wuntaŋ’ ni; yi yi ti bɔri neesim saha shɛli, o chɛrimi ka di niŋ zibisim titali, ka chɛ ka di niŋ bumbɔni.

17Amaa yi yi zaɣisi wumbu, n ni kum ashilɔni yi karimbaani maa zuɣu. N ni kum pam hal ka nintam ti zɔri n nina ni, bɛ ni gbahi Yawɛ niriba leei daba maa zuɣu.

18Yɛlim’ naa min’ o ma, “Ʒinimiya tariŋ ʒiishee, dama yi nam zuɣupila din viɛl’ la yi yi zuɣu ni lu tiŋa.

19Bɛ kpari Nɛgɛbinim’ niŋ bɛ fɔntinsi ni, ka so kani ŋun ni kparigi ba. Bɛ gbahi Judanim’ zaa chaŋ.”

20Kpuɣimiya yi zuɣuri lihi nya ninvuɣ’ shɛb’ bɛn yi nuzaa polo ŋɔ na. Bɛ ni daa zaŋ ninvuɣ’ shɛb’ tin ya ka yi nyuri bara bɛ zuɣu la lee be ya?

21Ka yi ni daa wuhi ninvuɣ’ shɛb’ ni bɛ ti leei yi zɔnim’ la yi ti leei yi zuɣulaannima, wula ka yi lee yɛn yɛli? Di biɛrim maa ku ŋmanila paɣ’ ni wolisiri ni o dɔɣi ka biɛrim shɛli mal’ o la?

22Ka yi yi yɛli yi suhuri ni, “Bɔzuɣu ka yɛla ŋɔ paai ti?” Di nyɛla yi tuumbiɛri ni galisi zuɣu ka bɛ darigi fuɣi yi situra, ka bili ya.

23Itiɔpianim’ ni tooi taɣi bɛ niŋgbuŋ gbaŋ biɛhigu bee jɛŋgbina ni tooi taɣi bɛ niŋgbuna bomaboma? Dinzuɣu yinim’ bɛn gba tum tuumbiɛri ka di mili ya ŋɔ, yi ku tooi lan tum tuun’ viɛla.

24N ni zaŋ ya bahi kaman pɔhim din yi tiŋgban’ nɛli polo na ni ʒiɛri wurigu bahiri shɛm la.

25“Din simdi ya m-bala. N ni lo ni n niŋ ya shɛm m-bala! Dama yi tam n yɛla, ka niŋla ʒiri naani.” Man’ Yawɛ n yɛli lala maa.

26Mmaŋmaŋ’ ni pirigi yi situra n-dihi ya vi.

27N nya yi ni tum din chihiri shɛŋa maa, yi ni niŋ zina shɛŋa mini yi ni kuhiri kaman wɔridibiga n-kuhiri bɔri wɔrinyaŋ la. Yi tum kavi pagɔrisigu mini dagɔrisigu tuma mɔɣu ni zoya zuɣu. Jɛrusalɛmnima, Mbusim be yi zuɣu! Bɔ saha ka yi yɛn yi daɣiri ni?

← Chapter 12 Jump to: Chapter 14 →