Psalms 104

Dagbani Bible (Naawuni Kundi Kasi)

← Chapter 103 Jump to: Chapter 105 →

1M paɣiri Yawɛ n suhu ni. Yawɛ ŋun nyɛ n Naawuni ŋɔ, a galisiya pam. A zaŋla jilima mini nam yiko ye kaman situra la.

2A zaŋla neesim ye kaman binyɛrigu la. A teela sagbana sɔŋ kaman tanti la.

3A me a yili tamla zuɣusaa kom zuɣu, ka zaŋ sagbana leeg’ a chɛchɛbuŋa, ka ba pɔhim kpiŋkpama.

4A zaŋ pɔhim leeg’ a tuumba, ka zaŋ buɣim mini buɣim niɛm leeg’ a tumtumdiba.

5A me dunia tamla di tanzaa zuɣu, ka shɛli kul ku tooi dam li sahakam.

6A teei teeku pa di zuɣu kaman binyɛrigu la, ka chɛ ka kom lim zoya.

7A yi tahi kom maa zuɣu, di guurimi, ka a yi chɛ ka saa tahi, kom maa zɔrimi chana.

8Di zɔrimi duri zoya, ka zɔri siɣiri vinvama ni n-chani ti dooni a ni zali ni di dɔni luɣ’ shɛli.

9A zali di tariga ni di di chaŋ yaɣi di zuɣu, ka lala chɛ ka di ku lan tooi zo n-tiɛli dunia ŋɔ yaha.

10A chɛ ka kɔbil’ nina kom puhiri yiri vinvama ni na n-zɔri gariti daboya sunsuuni.

11Ka di tiri mɔɣu ni biŋkɔbiri kom, ka mɔɣu ni bunsi nyuri li kuri kɔnyuri.

12Ka noonsi bɛn be zuɣusaa tɛri bɛ tɛri tihi din baɣi li zuɣu, ka be di wula zuɣu kumda.

13A bela a biɛhigu shee ka chɛ ka saa yiri zuɣusaa luri zoya zuɣu na, ka tiŋgbani diri a tuma nyɔri.

14A chɛ ka mɔri zoori ka biŋkɔbiri ŋubira, ka chɛ bindira bimbilima ti ninsalinim’ ni bɛ kɔri li ka di yihiri bindirigu tiŋgban’ ni na,

15ka yihiri wain na ka di tiri ninsalinim’ suhupiɛlli, ka yihiri olivi tihi kpam na ka di chɛ ka ninsalinim’ ninni nyɛlisira, ka chɛ ka ninsalinim’ nyari bindirigu diri ka di tiri ba kpiɔŋ.

16Saa miri niŋdi Yawɛ tihi pam, o ni biri Lɛbanɔn sida ti’ shɛŋa la.

17Ka noonsi tɛri bɛ tɛri di zuɣu, ka shinshingoorɔnim’ tɛri bɛ tɛri gɔhi tihi zuɣu.

18Yɔbuhi bela zoya din du pam zuɣu, ka sisirisi sɔɣiri di kuɣa lɔna ni.

19Nyini n-chɛ ka goli wuhiri saha, ka chɛ ka wuntaŋ’ mi o lubu saha.

20Nyini n-nam zibisim, ka di nyɛ yuŋ, ka biŋkɔbiri bɛn be yɔɣu ni yirina gɔra.

21Gbuɣimbihi yi bɔri bindirigu Naawuni sani, bɛ chanimi ŋumdi ginda.

22Ka wuntaŋ’ yi ti puhina, bɛ zɔrimi ti kpe bɛ biɛhigu shee.

23Niriba yi chaŋ bɛ tuma ni, bɛ tumdimi hal ni zaawuni.

24Yawɛ, a ni nam binshɛŋa galisiya pam. A yɛm puuni ka a nam di zaa. A binnɛma n-kul pali dunia ŋɔ zaa.

25Teeku n-doya ŋɔ, di galisiya ka yɛlim’ pam, biŋgbamda bɛn ka kalinli m-be di ni. Bɛ nyɛla binneen’ kara ni zaɣ’ bihi.

26Ŋariŋ kara pala di kom zuɣu chana, ka Lɛviatan be di ni diɛmda.

27Bɛmbɔŋɔ zaa lihirila a ninni ni a ti ba bɛ bindirigu di tibu saha.

28A yi ti ba bindirigu maa, bɛ laɣisiri li mi sɔŋ. A yi teeg’ a nuu, bɛ nyarila binsuŋ kam tiɣi.

29A yi ŋmalig’ a nini bahi kpaŋa ka chɛ ba, bɛ suhuri zɔhirimi. A yi deei bɛ vuhim, bɛ kpirimi n-lab’ taŋkpaɣu ni.

30Amaa nyini n-chɛ ka a shia kanna ti kpɛri bɛ ni, ka bɛ leeri a ni nam shɛba; ka a ti tiŋgbani nyɛvil’ palli.

31Yawɛ, chɛ ka a jilima kul be sahakam. Yawɛ, chɛ ka a suhu piɛl’ a tuma zuɣu.

32Nyini n-nyɛ ŋun lihiri tiŋgbani ka di sɔhiri ŋɔ. Nyini n-nyɛ ŋun shihi zoya, ka di tuɣiri nyɔhi.

33N ni yiini yila paɣiri Yawɛ hal ni n nyɛvili tariga; n ni kul be ŋɔ, n ni yiini yila paɣiri n Naawuni.

34Chɛ ka n jɛma tiɣ’ a nini, dama m mali suhupiɛlli Yawɛ zuɣu.

35Kpihimmi alahichinim’ birili dunia ni, ka chɛ ka ninvuɣ’ biɛri ku lan beni. M paɣiri Yawɛ n suhu ni! Paɣimiya Yawɛ!

← Chapter 103 Jump to: Chapter 105 →