Psalms 78 — Dagbani Bible (Naawuni Kundi Kasi)

8Ka di chɛ ka bɛ ku be kaman bɛ yaannim’ bɛn daa nyɛ tipawumlinim’ mini duŋtaariba ʒiɛmani niriba la. Bɛ daa nyɛla ʒiɛman’ shɛli niriba bɛn bi ʒe yim bɛ suhuri ni. Bɛ daa lan nyɛla ninvuɣ’ shɛb’ bɛn bi ʒe Naawuni yim.

9Ifriim zuliya bɛn daa gbibi tɔbiri daa ŋmaligi guui tɔbu tuhibu dali.

10Bɛ daa bi gbibi Naawuni ni lo ba alikauli shɛl’ la, ka daa zaɣis’ o zaligu dolibu.

11Bɛ daa tam o ni pun tum shɛm min’ o ni daa tum alahiziba tuun’ shɛŋa wuhi ba la yɛla.

12Bɛ yaannim’ ninni ka o daa tum alahiziba tuma Zɔan bɔpiɛligu ni Ijipti tiŋgbɔŋ ni.

13O daa chɛ ka teeku pirigi ka chɛ ka bɛ siɣi di ni gari, o daa chɛ ka kom laɣim ti dɔni kaman kunkuni la.

14O daa chɛ ka sagbani n-wuhiri ba soli wuntaŋ’ ni, ka chɛ ka buɣim neesim mi wuhiri ba soli yuŋ hal ka biɛɣu ti neei.

15O daa chɛ ka tampima bɔɣi yɔɣu sunsuuni, ka o daa ti ba kom pam din be kaman teeku kɔbulli ni kom la, ka bɛ nyu.

16O daa chɛ ka kɔzɔrim yi tampiŋ ni na n-zɔri kaman mɔɣa kom la.

17Amaa ka bɛ daa na kul tumd’ alahichi zaŋ chaŋ o sani, ka kul taari duŋ niŋdi Zallakudura Naa mɔɣu maa ni.

18Bɛ daa buɣisi Naawuni bɛ suhuri ni ni bɛ nya, bɛ suhuri ni daa ye bindir’ shɛli zuɣu la ni.

19Bɛ daa tɔɣisi yɛtɔɣa jɛndi Naawuni ka bɔhi, “Naawuni ni tooi ti ti bindirigu tiŋgban’ nɛli ŋɔ ni?

20Hal o ni daa ŋme tampiŋ ka kom tɔhi yi di ni na zɔri maa, o ni tooi ti bindira gba bee n-ti o niriba nimdi?”

21Dinzuɣu Yawɛ ni daa wum yɛlli ŋɔ, o suhu daa yiɣisiya pam, ka o daa zaŋ buɣim lu Yaakubu zuliya zuɣu; ka o suhu daa yiɣisi pam bahi Izraɛlnim’ zuɣu.

22Bɛ ni daa bi niŋ Naawuni yɛda, ka bi lan niŋ o tiliginsim yiko naani la zuɣu.

23Amaa ka o daa zali sagbana din be zuɣusaa ŋɔ zaligu ka zuɣusaa dunoya daa yooi;

24ka o chɛ ka manna lu bɛ sanna ni bɛ di, ka o daa ti ba zuɣusaa bindirigu.

25Ninsalinim’ daa di malaikanim’ bindirigu. O daa ti ba li pam.

26O daa chɛ ka wulimpuhili polo pɔhim ʒiɛri zuɣusaa. O yiko puuni ka o daa chɛ ka nudirigu polo pɔhim ʒɛna;

27ka o chɛ ka noonsi yiɣina ti lu bɛ sani. Bɛ daa galisiya pam ŋ-ŋmanila teeku noli bihigu;

28ka o daa chɛ ka bɛ yiɣina ti lu bɛ sansani maa ni n-gili bɛ biɛhigu maa shee zaa.

29Ka niriba maa daa ŋubi ba tiɣi; dama o daa ti ba bɛ suhuri ni ye shɛli zuɣu.

30Amaa bɛ daa na bi di bɛ suhuri ni ye shɛli zuɣu maa tiɣi; bindirigu maa ni daa na kul be bɛ noya ni saha shɛli maa,

31ka Naawuni suhu daa yiɣisi bahi bɛ zuɣu, ka o ku bɛ ni bɛn mali kpiɔŋ. O daa booi Izraɛl nachimbihi gahinda kalinli.

32Amaa dimbɔŋɔnim’ zaa yoli, ka bɛ daa na kul tumd’ alahichi; o daalahiziba tuma la zaa yoli, bɛ daa bi niŋ o yɛda.

33Dinzuɣu ka o daa chɛ ka bɛ nyɛviya zan’ tariga kaman nir’ ni yi vuhi pɔhim bahi la; ka chɛ ka dabiɛm mali ba bɛ ni be yuun’ shɛŋa ni.

34O daa yi ti chɛ ka bɛ kpira, bɛ ŋmaligirimi lab’ o sani ti niŋ tuuba, ka jɛmd’ o ni nimmoo.

35Bɛ daa teeri ni Naawuni n-nyɛ bɛ Tampiŋ Kpiɔŋ ŋun tiligiri ba, ka lan teeri ni Zallakudura Naa n-nyɛ ŋun fari ba bahira.

36Amaa naŋgbammalisim ka bɛ daa kul niŋd’ o, bɛ daa ŋmar’ o la ʒiri.

37Bɛ suhuri daa bi ʒe yim zaŋ chaŋ o sani; ka bɛ mi daa bi dol’ o ni lo ba alikauli shɛl’ la soli.

38Amaa Naawuni daa zo o niriba maa nambɔɣu, ka chɛ bɛ daalahichi maa, ka bi chɛ ka bɛ bahi yoli. O gbaar’ omaŋa o sujee puuni waawaayili, ka bi chɛ ka o suhuyiɣisili dii chani tooni.

39O teeya ni bɛ kul nyɛla ninsalinima, ka ŋmani pɔhim din ʒe n-gari ka ku lan tooi labina.

40Siɣimsiɣim bushɛm ka bɛ daa taai duŋ niŋ o tiŋgban’ nɛl’ la ni, ka daa saɣim’ o suhu pam!

41Bɛ daa buɣisi Naawuni siɣimsiɣim bushɛm ni bɛ nya, ka daa chɛ ka Izraɛl Naawuni ŋun be kasi ŋɔ suhu yiɣisi.

42Bɛ daa tam o yiko yɛla, ka tam o ni daa tiligi ba bɛ dimnim’ nuu ni dahin shɛl’ la yɛla;

43ka tam o ni daa wuhi shihir’ shɛŋa Ijipti la mini alahiziba tuun’ shɛŋa o ni daa tum Zɔan mɔɣu ni la gba yɛla.

44O daa chɛ ka bɛ mɔɣa kom leei ʒim, ka bɛ ku tooi lan nyu bɛ kulibɔna kom.

45O daa chɛ ka zɔhi waɣi pam muɣisi ba, ka chɛ ka poloya gba waɣi n-saɣim bɛ tiŋgbɔŋ.

46O daa chɛ ka zunzuya kana ti ŋub’ bɛ bindira, ka chɛ ka toli kana ti saɣim bɛ puri atam.

47O daa chɛ ka sakuɣa luna ku bɛ wain tihi, ka chɛ ka maligim din leeri sakuɣa luna saɣim bɛ fiig tihi wala zaa.

48O daa chɛ ka sakuɣa luna ku bɛ niɣi, ka chɛ ka saa tahi ku bɛ biŋkɔbbaligu.

49O daa chɛ ka o suli min’ o sujee ni o suhuyiɣisili ni nandahima paai ba, ka di ŋmanila malaika bɔbili bɛn kuri niriba.

50O daa bi gbaag’ omaŋa o sujee ni, o mi daa bi tiligi bɛ nyɛviya, amaa ka daa chɛ ka alɔbo di ba.

51O daa ku Ijiptinim’ bidib’ kpamba zaa bɛn daa nyɛ bɛ ni tuui dɔɣi bi’ shɛba Ham suɣa ni la.

52Di nyaaŋa ka o daa zaŋ o niriba maa kaman piɛri la chaŋ, ka wuhi ba soli mɔɣu ni kaman biŋkɔbbaligu n-nyɛ ba la.

53O daa zaŋ ba chaŋ ni alaafee, ka dabiɛm bi mali ba, ka teeku daa zaŋ bɛ dimnim’ la vali.

54O daa zaŋ ba tah’ o tiŋgbɔn kasi ni zoya tiŋgbɔn’ shɛŋa o ni daa zaŋ o nudirigu tuhi fa la ni.

55O daa kari zuliya shɛba, ka piri bɛ tiŋgbɔŋ ti Izraɛl zuliya, ka deei bɛ yinsi ti ba ka bɛ kpe m-beni.

56Amaa ka bɛ daa buɣisi Naawuni ŋun nyɛ Zallakudura Naa ŋɔ ni bɛ nya, ka daa taai duŋ niŋ o, ka bi dol’ o zaligunima, amaa ka bɛ daa ti ŋmaligi n-leei bɛn bi ʒe yim,

57kaman bɛ yaannim’ la, bɛ daa bemi kaman tɔb’ shɛli din naɣilimnaɣilim.

58Dama bɛ daa ku o suli bɛ buɣa jɛmbu ni, ka daa chɛ ka nyuli gbaag’ o bɛ binnana jɛmbu zuɣu.

59Naawuni ni daa wum li, ka o suhu yiɣisi pam, ka o daa zaɣisi Izraɛlnim’ zaa di zuɣu.

60O daa zaɣis’ o biɛhigu shee din be Shilo ka nyɛ tanti du’ shɛl’ ni o ni daa be ninsalinim’ sunsuuni la,

61ka zaŋ o yiko niŋ dabitim ni, ka chɛ o jilima ti ti dimnima.

62Ka o suhu daa yiɣisi bah’ o niriba maa zuɣu, ka chɛ ka bɛ dimnim’ zaŋ takɔbiri ku ba.

63Buɣim daa di n-ku bɛ nachimbihi, ka paɣisara daa kɔŋ amiliya lɔbu yila.

64Bɛ daa zaŋ takɔbiri ku bɛ maligumaaniba, ka bɛ pakoya daa bi tooi kum bɛ zuɣu.

65Di saha ka ti Duuma daa vaai yiɣisi kaman o neela gom ni la bee m-be kaman tɔbutuhira ni yi nyu wain buɣi n-tahiri shɛm la.

66Ka o daa kar’ o dimnim’ maa bahi; ka chɛ ka bɛ di vi din ku naai.

67O daa zaɣisi Yisifu zuliya, o daa bi pii Ifriim zuliya.

68Amaa ka daa naɣ’ piila Juda zuliya mini Ziɔn Zoli din nyɛ o ni yuri shɛl’ la.

69O daa me o jɛmbu duu ka di be kaman alizanda la, ka be kaman o ni daa nam dunia ŋɔ ka di kul beni sahakam shɛm la.

70O daa piila o dabili Dauda, o daa yih’ o la piɛgulibo ni

71luɣ’ shɛli o ni daa be n-lihir’ o piɛ’ shɛb’ bɛn mali bihi la ni o ti leei ŋun su Yaakubu zuliya bɛn nyɛ ŋun’ Naawuni niriba Izraɛlnim’ la.

72Ka o daa zaŋ suhuyini n-gbib’ ba, ka daa doli yɛm soli wuhi ba din tuhi.