Psalms 81

Dagbani Bible (Naawuni Kundi Kasi)

← Chapter 80 Jump to: Chapter 82 →

1Yilimiya yila pampam paɣi Naawuni ŋun nyɛ ti kpiɔŋ ŋɔ; duhimiya yi yee ni suhupiɛlli paɣi Yaakubu Naawuni ŋɔ!

2Yilimiya yila ka ŋmɛm’ guŋgombihi, ka ŋmɛm’ goonjɛnim’ mini mɔɣilɔnim’ din kumsi nyaɣisa.

3Piɛbimiya kikaa goli palli dali, ka piɛbimi li goli maa yi ti niŋ goli muni ni ti chuɣu puhibu dali.

4Dama di nyɛla zaligu Izraɛl; di nyɛla Yaakubu Naawuni zaligu.

5Yisifu saha ka o daa zali zaligu maa, saha shɛl’ o ni daa liri Ijipti tiŋgbɔŋ la. N wumla n ni ʒi kukol’ shɛli, ka di yɛra:

6“N suui ʒitibisi’ shɛŋa din yi tam yi bɔɣusapima zuɣu la; ka yihi ya piɛri ʒiya la ʒibu ni.

7Yi daa be muɣisigu ni ka kuhi boli ma, ka n tiligi ya. N daa bela n daashili biɛhigu shee din nyɛ saa tahibu la puuni, ka garigi ya. N daa zahim ya Mɛriba kom la shee.

8Yinim’ bɛn nyɛ n niriba ŋɔ, wummiya n saɣisigu; Izraɛlnima, n di yuya ni yi wum n yɛligu!

9Miriya ka yi jɛm wun’ so yaha; miriya ka yi gbani n-jɛm tinzunnim’ wuni.

10Mani n-nyɛ Yawɛ ŋun nyɛ yi Naawuni ŋun daa yihi ya Ijipti tiŋgbɔŋ ni na. Yaamiya yi noya ka n dihi ya.

11“Amaa ka n niriba zaɣisi ni bɛ ku wum n yɛligu; Izraɛlnim’ zaɣisiya ni bɛ kul ku deei n noli.

12Dinzuɣu ka n chɛ ba ka bɛ doli tipawumli soya n-tumdi bɛmaŋmaŋ’ ni yu shɛm.

13N di yuya ni n niriba maa wum n yɛligu; n di yuya ni Izraɛlnim’ doli n soya!

14Dindina n naan lu bɛ dimnim’ zuɣu pumpɔŋɔ; n naan filim bɛ dimnim’ maa zaa ti ba.

15Ninvuɣ’ shɛb’ bɛn je man’ Yawɛ ni ti kana ti gbani n tooni ka dabiɛm mali ba, ka bɛ tibidarigibo ti ku mali tariga.

16N ni zaŋ alikama zaɣ’ suma dihi ya, ka zaŋ tampiŋ ni shiri tin ya ka yi di n-tiɣi.”

← Chapter 80 Jump to: Chapter 82 →