Psalms 105

Dagbani Bible (Naawuni Kundi Kasi)

← Chapter 104 Jump to: Chapter 106 →

1Bolimiya Yawɛ yuli m-puh’ o. Chɛliya ka zuliya kam zaa baŋ o ni tum tuun’ kar’ shɛŋa yɛla.

2Yilimiya yila niŋ o. Yilimiya yila paɣ’ o. Yɛlimiya o ni tum alahiziba tuun’ shɛŋa zaa yɛla.

3Timiya o yuli din be kasi ŋɔ jilima. Chɛliya ka bɛnkam zaa jɛmdi Yawɛ mali suhupiɛlli.

4Bomiya Yawɛ ni o kpiɔŋ; Doliya din ni chɛ ka yi kul be o sani sahakam.

5Teemiya o ni tum tuun’ kar’ shɛŋa yɛla, ka teei o ni tum alahiziba tuun’ shɛŋa min’ o ni daa kari saria shɛm yɛla.

6Yinima n-nyɛ o dabili Ibrahimma zuliya mini Yaakubu bihi bɛn nyɛ o ninvuɣ’ gahinda.

7Ŋuna n-nyɛ Yawɛ ŋun nyɛ ti Naawuni ŋɔ; o saria karibu la bela dunia ni zaa.

8O bi tamd’ o daalikauli yɛla, o mi bi tamd’ o ni yɛli yɛtɔɣ’ shɛŋa zali ʒiɛmana tuhili niriba yɛla.

9O ni daa lo Ibrahimma alikauli shɛl’ la, o daa pola pɔri pahi alikauli maa zuɣu ti Yisahaku.

10O daa po pɔri n-lo Yaakubu alikauli. O daa lo Izraɛl alikauli din ku vuui

11n-yɛra, “N ni zaŋ Keenan tiŋgbani ti a, ka di nyɛ a tarili ka a su li.”

12Saha shɛli bɛ ni daa bi galisi, ka nyɛ saamba di ni la,

13bɛ daa kul darimi gindi tinsi, ka dari gindi nam sulinsi tiŋgbana.

14O daa bi saɣi n-chɛ ka so nahim ba. O daa kpahi nanim’ zuɣu ni zaŋ chaŋ bɛ polo

15n-yɛra, “Miriya ka yi nahim n ninvuɣ’ gahinda maa; ka miriya ka yi niŋ n daanabinim’ zaɣ’ biɛɣu.”

16Yawɛ daa chɛ ka kum lu bɛ tiŋgbɔŋ ni, ka saɣim binshɛɣukam din tiri bindirigu.

17O daa pun daŋ timla ninvuɣ’ so ka o daŋ bɛ tooni. Dilana n-daa nyɛ Yisifu so bɛ ni daa zaŋ kɔhi ka o leei dabili la.

18Bɛ daa ba o bandi n-ti o naba biɛrim, ka zaŋ kuriti ga o nyiŋgol’ ni

19hal ka o ni daa yɛli shɛm ti niŋ pali; ka Yawɛ yɛligu daa wuhi ni o ka taali.

20Ka naa daa tim ti yih’ o na. Tiŋ’ maa niriba maa naa n-daa yih’ o.

21O daa zaŋ o leeg’ o yiŋ’ zuɣulana, ka chɛ ka o su o binshɛɣukam zaa fukumsi,

22ni o wuh’ o kpambaliba o ni bɔri shɛm, ka wuh’ o kpamba mi yɛm.

23Di nyaaŋa ka Yaakubu daa kuli Ijipti na. O daa nyɛla sana m-be nimaani luɣ’ shɛli din yuli daa booni Ham la.

24Ka Yawɛ daa chɛ ka o zuliya nab’ pam, ka chɛ ka bɛ mali yaa gari bɛ dimnima.

25O daa chɛ ka Ijiptinim’ suhuri je o niriba maa, ka chɛ ka bɛ doli yɛmbimbiɛri soli n-nahim’ o daba maa.

26Di saha ka Yawɛ daa tim o dabili Musa mini Aduna ŋun nyɛ o ni daa pii so la.

27Bɛ daa wuh’ o shihira bɛ sani, ka tum alahiziba tumtumsa Ham tiŋgbɔŋ ni.

28O daa chɛ ka zibisim zibigi bɛ tiŋgbɔŋ maa ni, bɛ ni daa zaɣis’ o yɛligu zuɣu.

29O daa chɛ ka bɛ kom leei ʒim, ka chɛ ka bɛ zahim kpi.

30O daa chɛ ka poloya waɣi pam bɛ tiŋgbɔŋ ni n-kpe m-pali bɛ nanim’ dugbɛra ni.

31O daa yaag’ o noli yɛli ka zɔhi mini nanviri waɣi pali bɛ tiŋgbɔŋ maa zaa.

32O daa chɛ ka sakuɣa m-miri ba ka pa ni saa, ka chɛ ka saa nyaɣisiri gindi bɛ tiŋgbɔŋ maa zaa ni.

33O daa saɣim bɛ wain tihi mini bɛ fiig tihi, ka chɛ ka bɛ tiŋgbɔŋ maa ni tihi zaa kab’ lu.

34O daa yaag’ o noli yɛli ka toli mini sakɔri bɛn ka kalinli waɣi yɛrigi.

35Ka bɛ daa ŋubi bɛ tiŋgbɔŋ maa ni vamahili kam, ka saɣim bɛ puri atam.

36O daa chɛ ka bɛ tiŋgbɔŋ maa ni bikpamba zaa kpi, bɛ ni daa tuui dɔɣi shɛba bɛ kpiɔŋ saha.

37Di nyaaŋa ka o daa yihi o niriba maa; ka bɛ daa ʒi anzinfa mini salima yi, bɛ ni so daa bi tuui.

38Ka Ijiptinim’ suhuri daa paligi pam, bɛ ni daa yi n-chaŋ maa zuɣu, dama bɛ daa kpalim zɔri ba mi.

39O daa zaŋ sagbana niŋ bɛ zuɣusaa, ka chɛ ka buɣim tiri neesim yuŋ.

40Bɛ daa suh’ o ka o ti ba kɔrinsi, ka ti ba bindir’ shɛli din yi zuɣusaa na pam.

41O daa chɛ ka tampiŋ bɔɣi ka kom yi di ni na n-zɔri chani tiŋgban’ nɛli zuɣu kaman mɔɣili la.

42Dama o daa teeg’ o daalikauli kasi la min’ o dabili Ibrahimma yɛla.

43Lala ka o daa yih’ o niriba bɛn nyɛ o ninvuɣ’ gahinda maa ni suhupiɛlli, ka bɛ daa yiini yila.

44O daa zaŋ zuliya shɛb’ tiŋgbɔna ti ba, ka bɛ daa deei niriba maa ni su shɛlikam zaa su

45ni lala chɛ ka bɛ dol’ o zalikpana, ka dol’ o zaligu shɛŋa din pahi la. Paɣimiya Yawɛ!

← Chapter 104 Jump to: Chapter 106 →