Psalms 106

Dagbani Bible (Naawuni Kundi Kasi)

← Chapter 105 Jump to: Chapter 107 →

1Paɣimiya Yawɛ! Puhimiya Yawɛ, dama o nyɛla ŋun viɛla, ka o yurilim maŋli bi naara.

2Ŋuni n-lee ni tooi wuhi Yawɛ ni pun tum tuun’ kar’ shɛŋa tariga? Ka ŋuni n-lee ni tooi puh’ o ka di saɣi?

3Ninvuɣ’ shɛb’ bɛn niŋdi din tuhi, ka tumdi wuntia tuma sahakam mali alibarika.

4Yawɛ, saha shɛli a yi ti niŋ a niriba nirilim, nyin’ teemi n yɛla; saha shɛli a yi ti tiligi ba, nyin’ sɔŋm’ ma,

5ka lala zuɣu chɛ ka m pah’ a ninvuɣ’ gahinda maa zuɣu tɔŋ, ka pah’ a zuliya zuɣu nya suhupiɛlli, ka pah’ a niriba zuɣu tibig’ a.

6Ti mini ti yaannim’ zaa tum alahichi. Ti nyɛla ninvuɣ’ biɛri, ka tum tuumbiɛri.

7Ti yaannim’ maa ni daa be Ijipti saha shɛl’ la, bɛ baɣa daa ka a daalahiziba tuma ni. Bɛ daa tam a yurilim maŋli din galisi la yɛla, ka daa taai duŋ niŋ nyin’ Kpiɔŋlan’ Naa ŋɔ Teeku Ʒiɛɣu ni.

8Amaa di zaa yoli, a daa tiligi ba a yuli zuɣu, ni lala chɛ ka a wuh’ a yiko tuma ni nyɛ shɛm.

9A daa tahi Teeku Ʒiɛɣu zuɣu ka di kom vuui; ka chɛ ka bɛ no tiŋkuŋ zuɣu kaman tiŋgban’ nɛl’ la du.

10A daa fa ba bɛn je ba nuu ni bahi; ka tiligi ba bɛ dimnim’ nuu ni.

11Kom daa lim bɛ dimnim’ maa, ka bɛ ni yino gba daa bi tiligi.

12Di saha ka bɛ daa niŋ a daalikaulinim’ yɛda, ka yili yila paɣ’ a.

13Amaa di daa bi yuui ka bɛ tam a tuma maa yɛla, ka daa bi guhi n-deeg’ a wuhibu.

14Bɛ daa dolila bɛ kɔribiɛri soli mɔɣu maa ni, ka daa buɣisi Naawuni ni bɛ nya tiŋgban’ nɛli maa ni.

15Ka o daa ti ba bɛ ni suhi shɛli, amaa ka daa chɛ ka dɔr’ biɛri gbahi ba.

16Bɛ daa zab’ Musa nyuli bɛ sansan’ ni, ka zab’ Aduna ŋun daa nyɛ Yawɛ ninvuɣ’ kasi la gba nyuli.

17Tiŋgbani daa bɔɣiya m-mum Datan, ka pi Abiram min’ o nyaandoliba.

18Ka buɣim daa taai bɛ salo maa sunsuuni n-di ninvuɣ’ biɛri.

19Bɛ daa mali salima naɣibila n-zali Sinai Zoli gbini; ka daa jɛm salima binnani.

20Bɛ daa zaŋ bɛ jilima n-taɣi naɣibil’ ŋun ŋubiri mɔri kɔtomsi.

21Bɛ daa tam Naawuni ŋun nyɛ bɛ tiligira, ka lan nyɛ ŋun daa tum tuun’ kara Ijipti la yɛla.

22O daa lan tum alahiziba tuma Ham tiŋgbɔŋ ni, ka daa lan tum tuun’ shɛŋa din mali dabiɛm Teeku Ʒiɛɣu ni.

23Dinzuɣu ka o daa yɛli ni o ni ku ba, ka Musa ŋun nyɛ o ninvuɣ’ gahindili daa zan’ o tooni n-taɣ’ o ni o maag’ o suhu; ka o ku ku ba.

24Di nyaaŋa bɛ daa bi niŋ o daalikauli yɛda, ka daa ʒiɛm tiŋgbɔn viɛlli maa.

25Bɛ daa bela bɛ suɣa ni ŋ-ŋumdi bɛ kparima ni, ka zaɣisi Yawɛ yɛligu.

26Dinzuɣu ka o daa kpuɣ’ o nuu zuɣusaa, ka po ni o ni chɛ ka bɛ kpi yɔɣu maa ni,

27ka chɛ ka bɛ bihi kpi tinzun’ tinsi ni, ka wurim ba ka bɛ chaŋ ti be tinduya ni.

28Di saha ka bɛ daa zaŋ bɛmaŋ’ ti tabili Pɛɔr tiŋgbɔŋ ni Baal, ka diri kpiimba maligu nimdi.

29Bɛ daa chɛ ka bɛ tuma yiɣisi Yawɛ suhu, ka o daa chɛ ka alɔbo lu bɛ zuɣu.

30Di saha ka Finɛhas daa yiɣisi zani n-tim sandaani ka alɔbo maa chɛ.

31Ka di zuɣu daa chɛ ka bɛ wuhi ni o nyɛla wuntizɔra ʒiɛmani kam ni.

32Mɛriba kom la gbini bɛ daa chɛ ka Yawɛ suhu yiɣisi pam, ka yɛla daa paai Musa bɛ zuɣu.

33Dama bɛ daa chɛ ka o suhu miligi, ka o yɛli yɛtɔɣ’ shɛŋa din bi simdi.

34Bɛ daa bi ku niriba maa zaa kaman Yawɛ ni daa zali ba ni bɛ niŋ shɛm.

35Amaa bɛ daa zaŋla bɛmaŋ’ bali niriba maa ni n-niŋdi bɛ ni niŋdi shɛm.

36Bɛ daa jɛm bɛ wuna, ka di daa leei zana gbahi ba.

37Bɛ daa zaŋ bɛ bidibisi mini bɛ bipuɣinsi n-kɔri ba ti alizinnima.

38Bɛ daa yihi bɛ bidibisi mini bɛ bipuɣinsi bɛn bi tum taali ʒim, bɛ daa kɔri ba m-mal’ la Keenan wuna; ka bɛ ʒim maa daa ta tiŋgbɔŋ maa daɣiri.

39Lala ka bɛ daa niŋ ta bɛmaŋ’ daɣiri bɛ tumtumsa ni, ka bɛ tuma maa zuɣu daa chɛ ka bɛ bi ʒe yim.

40Dinzuɣu ka Yawɛ suhu daa yiɣisi pam bah’ o niriba maa zuɣu, ka o daa zaɣis’ o ni su ninvuɣ’ shɛb’ maa.

41O daa zaŋ ba niŋ zuliya shɛb’ nuu ni, ka ninvuɣ’ shɛb’ bɛn je ba su ba.

42Ka bɛ dimnim’ maa daa nahim ba pam, ka zaŋ bɛ yiko su ba.

43Siɣimsiɣim bushɛm ka o daa fa ba bahi, amaa ka bɛ daa yi o nyaaŋa, ka bɛ daalahichi daa chɛ ka bɛ nya filiŋ.

44Amaa ka o daa nya bɛ nandahima maa, ka wum bɛ fabila.

45Bɛ zuɣu ka o daa teeg’ o daalikauli la yɛla, ka daa taɣi o tɛha o yurilim maŋli la zuɣu.

46Ka o daa chɛ ka bɛ ni nyɛ daba ninvuɣ’ shɛb’ nuu ni zaa daa zo ba nambɔɣu.

47Yawɛ ŋun nyɛ ti Naawuni ŋɔ, tiligim ti, ka yihi ti zuliya kam ni na n-laɣim luɣ’ yini, ka ti paɣ’ a yuli din be kasi ŋɔ, ka ti a jilima ti paɣibu maa puuni.

48Paɣimiya Yawɛ ŋun nyɛ Izraɛl Naawuni ŋɔ, pumpɔŋɔ zaŋ hal ni saha din ka bahigu. Sokam yɛlima, Ami! Paɣimiya Yawɛ!

← Chapter 105 Jump to: Chapter 107 →