Psalms 107

Dagbani Bible (Naawuni Kundi Kasi)

← Chapter 106 Jump to: Chapter 108 →

1“Paɣimiya Yawɛ, dama o nyɛla ŋun viɛla, ka o yurilim maŋli bi naara!”

2Chɛ ka Yawɛ ni tiligi ninvuɣ’ shɛb’ zaa yɛli lala, bɛna n-nyɛ o ni tiligi shɛb’ muɣisigu ni,

3ka yihi ba tiŋgbɔn’ shɛŋa ni, wulimpuhili polo mini wulinluhili polo ni nuzaa polo ni nudirigu polo na la.

4Shɛb’ daa bela tiŋgban’ nɛl’ ni n-dari ginda, ka bi nya tiŋ’ ʒiina.

5Kum mini kɔnyuri n-daa yɛn ku ba, hal ka bɛ daa ti yihi tahima.

6Bɛ wahala maa puuni ka bɛ daa suhi Yawɛ, ka o daa yihi ba bɛ nandahima maa ni.

7O daa zaŋ ba doli soli din tuhi hal ti paai bɛ ni yɛn ʒini tin’ shɛl’ ni.

8Chɛ ka bɛ paɣi Yawɛ o yurilim maŋli min’ o ni tumdi alahiziba tuun’ shɛŋa tiri daadamnim’ la zuɣu.

9O tiri kɔnyuri ni mali ninvuɣ’ shɛb’ kom, ka tiri kum ni mali ninvuɣ’ shɛb’ bindir’ suma.

10Shɛb’ daa ʒila zibisim mini bumbɔn’ ni, ka nyɛ sarikanima, ka bɛ ba ba bandi ʒili ka bɛ diri wahala,

11bɛ ni daa zaɣisi Naawuni yɛligu, ka lihi ʒiɛm ŋun’ Zallakudura Naa wuhibu la zuɣu.

12Ka o daa chɛ ka bɛ tum tuun’ kpɛma. Bɛ daa tuui lu ka kɔŋ ŋun ni sɔŋ ba.

13Di saha ka bɛ daa suhi Yawɛ bɛ wahala maa puuni, ka o daa tiligi ba bɛ nandahima maa ni.

14O daa yihi ba bumbɔni mini zibisim ni, ka kabi bɛ bandi.

15Chɛ ka bɛ paɣi Yawɛ o yurilim maŋli min’ o ni tumdi alahiziba tuun’ shɛŋa tiri daadamnim’ la zuɣu.

16O kabiri daanya dunoyɔriti ka kabiri kuriti dunokparitisi.

17Shɛb’ daa nyɛla jɛra n-tum tuumbiɛri, ka daa di wahala bɛ tuumbiɛri maa zuɣu.

18Bɛ daa je bindirigu kam; di daa chɛ biɛla ka bɛ kpi.

19Di saha ka bɛ daa suhi Yawɛ bɛ wahala maa puuni, ka o daa yihi ba bɛ nandahima maa ni.

20O daa tim o yɛligu na ti tib’ ba, ka daa yihi ba kum ni.

21Chɛ ka bɛ paɣi Yawɛ o yurilim maŋli min’ o ni tumdi alahiziba tuun’ shɛŋa tiri daadamnim’ la zuɣu.

22Chɛ ka bɛ mali wumpaɣibo sara, ka yili suhupiɛlli yila yɛl’ o tuma yɛla.

23Shɛb’ daa zaŋla ŋariŋ kara n-kpe teeku puuni nti tumdi daabiligu tuma ko’ titali maa ni.

24Bɛ nini daa nya Yawɛ tuma din nyɛ o daalahiziba tuma la teeku bulli maa ni.

25Dama o daa zali zaligu n-chɛ ka sanʒiɛɣu yiɣisi n-kpuɣi teeku kɔgbana zuɣusaa.

26Bɛ daa yiɣi du zuɣusaa ha n-lab’ ti lu bulli ni, ka dabiɛm daa kpe ba bɛ barina maa puuni.

27Bɛ daa ʒiɛhira ka jeeni kaman ninvuɣ’ shɛb’ bɛn nyu dam kuli, ka bɛ yɛm zaa daa naai la.

28Di saha ka bɛ daa suhi Yawɛ bɛ wahala maa puuni, ka Yawɛ daa yihi ba bɛ nandahima maa ni.

29O daa chɛ ka sanʒiɛɣu maa chɛ ʒiɛbu, ka teeku kɔgbana daa fo n-dɔni baalim.

30Ka bɛ suhuri daa paligi di ni daa fo n-dɔni baalim maa zuɣu, ka o daa zaŋ ba na ti zali bɛ ni bɔri ni bɛ zani kulino’ shɛl’ ni.

31Chɛ ka bɛ paɣi Yawɛ o yurilim maŋli min’ o ni tumdi alahiziba tuun’ shɛŋa tiri daadamnim’ la zuɣu.

32Chɛ ka bɛ tibig’ o niriba laɣiŋgu ni, ka paɣ’ o kpamba laɣiŋgu ni.

33O daa chɛ ka mɔɣa leei tiŋgban’ nɛli doya, ka chɛ ka kɔbil’ nina kuui.

34O daa chɛ ka tiŋgbani din vuhiri leei wubilim tiŋgbani, ninvuɣ’ shɛb’ bɛn be nimaani ninvuɣ’ biɛtali zuɣu.

35O daa chɛ ka kom puhigi zɔri tiŋgban’ nɛl’ ni, ka chɛ ka kom puhiri yiri tiŋgban’ kuŋ ni na.

36O daa chɛ ka kum ni mali ninvuɣ’ shɛb’ me bɛ tiŋ’ ʒini nimaani.

37Bɛ daa koya m-biri bimbira ka sa tihi, ka di daa niŋ, ka tihi maa gba daa wali pam.

38Ka o daa niŋ alibarika niŋ bɛ ni, ka bɛ nab’ pam, ka bi chɛ ka bɛ biŋkɔbiri filim.

39Ka nahiŋgu mini wahala ni suhugarigu daa ti chɛ ka bɛ filim,

40ka o daa dihi bɛn nahindi ba vi, ka chɛ ka bɛ dari gindi tiŋgban’ nɛl’ ni.

41Amaa ka o daa yihi nandaamba bɛ nandahima ni, ka chɛ ka bɛ malibu nabi kaman biŋkɔbbaligu la.

42Ka wuntizɔriba daa nya li ka bɛ suhuri paligi, amaa ka ninvuɣ’ biɛri daa fo bɛ noya.

43Ŋunkam mali yɛm, ŋun’ wummi dimbɔŋɔnim’ viɛnyɛliŋga, ka tɛhi Yawɛ yurilim maŋli ŋɔ yɛla.

← Chapter 106 Jump to: Chapter 108 →