Psalms 139

Dagbani Bible (Naawuni Kundi Kasi)

← Chapter 138 Jump to: Chapter 140 →

1Yawɛ, a vihi ma m-baŋ ma zaa.

2A mi n ʒinibu saha, ka mi n yiɣisibu saha. Hal n yi tɛhi ni m bela katiŋa, a mi n tɛha ni nyɛ shɛm.

3A mi n yibu saha ni n dɔnibu saha, ka mi n soya zaa.

4Yawɛ, yɛtɔɣili ti yɛn yi n nol’ ni na, ka a pun mi li zaa.

5A bela n tooni ni n nyaaŋa, ka zaŋ a nuu pa n zuɣu.

6Baŋsim ŋɔ tatabo mali ma alahiziba pam. Di galisiya yaɣi ka n ku tooi baŋ li.

7Luɣ’ dini ka n lee yɛn zo n-chaŋ ka chɛ a Shia? Bee ya ka n lee yɛn zo n-kuli n-yi a sani?

8N yi zo n-du zuɣusaa, a be nimaani, ka n yi yɛrigi m bindoo sɔŋ kpiimba biɛhigu shee, a be nimaani.

9N yi bili kpiŋkpama yiɣi kpa wulimpuhili polo n-chaŋ ti be teeku tariga,

10hal nimaani gba n yɛn bela a nuu ni, ka a nudirigu gbib’ ma kirikiri.

11N yi yɛli ni zibisim sɔɣim’ ma, ka neesim din gili ma zaa leei zibisim.

12Hal zibisim pala zibisim a sani; yuŋ kul nɛmi kaman wuntaŋ’ ni la, dama zibisim bemi kaman neesim la a sani.

13Nyini n-daa nam n niŋgbuŋ luɣilikam zaa; nyini n-daa zaŋ ma tuɣi taba m ma pul’ ni.

14M paɣir’ a, dama a nam ma, ka n yɛla mali dabiɛm mini alahiziba. M mi viɛnyɛliŋga ni a tuma zaa mali alahiziba.

15N ni daa be shɛm daa pala din sɔɣi a sani. Bɛ ni daa nam ma ashilɔni saha shɛli, bɛ daa zaŋ ma tuɣila tab’ alahizibu tuɣibu tiŋgbani puuni ha.

16A nini daa nya ma n nambu saha. N dabisa zaa daa pun sabila a litaafi ni pɔi ka di naanyi piligi.

17Naawuni, a tɛha nyɛla din viɛli pam n sani, di galisiya.

18N yi yɛn kal’ li, di galisi gari bihigu. N yi gbihi nti neei, n kul bela a sani.

19Naawuni, n suhir’ a, chɛ ka ninvuɣ’ biɛri kpi, ka chɛ ka ninvuɣ’ biɛri zo ka chɛ ma.

20Bɛ yɛri yɛtɔɣ’ biɛri zaŋ chaŋ a polo, ka ŋmari ʒiri zaŋ chaŋ a polo.

21Yawɛ, n je ninvuɣ’ shɛb’ bɛn je a. N ʒiɛm ninvuɣ’ shɛb’ bɛn kpɛhir’ a nini.

22N kul je ba la jɛri’ maŋli; n zaŋ ba leela n dimnima.

23N Duuma Naawuni, vihim’ ma m-baŋ n suhu biɛhigu. Buɣisim’ ma baŋ n tɛha.

24Nyama, ninvuɣ’ biɛtali yi be n ni, nyin’ wuhim’ ma so’ shɛli din tuhi, ka nyɛ din ni beni hal ni saha din ka bahigu.

← Chapter 138 Jump to: Chapter 140 →

Recommended Reading

Commentary Psalms Commentaries → Devotional Psalms Devotional Guide → Get This Bible Dagbani Bible (Naawuni Kundi Kasi) Study Bible →