2 Kings 9

Ewe 1913 (Biblia alo Ŋɔŋlɔ Kɔkɔe La Le Eʋegbe Me 1913)

← Chapter 8 Jump to: Chapter 10 →

1Eye nyagblɔɖila Elisa yɔ nyagblɔɖilawo ƒe nusrɔ̃viwo dometɔ ɖeka gblɔ nɛ bena: Bla wò ali dzi, eye natsɔ amigoe sia ɖe asi ayi Ramot-Gilead.

2Ne eɖo afima la akpɔ Yehu, Nimsi vi Yosafat ƒe vi, ge ɖe eme, eye nana wòatsi tre tso nɔviawo dome, eye kplɔe yi xogã me.

3Eye natsɔ amigoe la akɔ ɖe ta me nɛ agblɔ bena: Ale Yehowa gblɔ esi: Mesi ami na wò heɖo fia ɖe Israel dzi. Emegbe naʋu ʋɔa, eye nasi, megalala o.

4Tete nyagblɔɖilawo ƒe nusrɔ̃vi la yi Ramot-Gilead.

5Esi woge ɖe eme la, kpɔ ɖa, aʋakɔ la ƒe amegãwo ɖi anyi. Eye wògblɔ bena: Amegã, mehe gbea ɖe vɛ na wò! Yehu ɖo ŋu bena: Mí katã dometɔ kae? Eɖo ŋu bena: Amegã wòe!

6Tete wòtsi tre heyi xɔa me, eye wòka ami la ɖe eƒe ta me gblɔ nɛ bena: Ale Yehowa, Israel ƒe Mawu la, gblɔ esi: Mesi ami na wò heɖo fia wò ɖe Yehowa ƒe aƒe Israel dzi.

7Eye tsrɔ̃ wò aƒetɔ Axab ƒe aƒe la, ne mabia hlɔ̃ Izebel ɖe nye dɔla nyagblɔɖilawo ƒe ʋu kple Yehowa ƒe dɔlawo katã ƒe ʋu nu.

8Axab ƒe aƒe blibo la atsrɔ̃ gbidigbidi, eye matsrɔ̃ Axab ƒe ŋutsuwo, ɖeviwo kple ame tsitsiwo siaa.

9Mawo Axab ƒe aƒe la abe Yerobeam. Nebat vi ƒe aƒe kple Baesa, Axiya vi ƒe aƒe ene.

10Eye avũwo aɖu Izebel le Yezreel-gble me, eye amea ɖeke maɖii o. Tete woʋu ʋɔa hesi.

11Eye esi Yehu do va eƒe aƒetɔ ƒe dɔlawo gbɔ la, wobiae bena: Eme nyoa? Nya ka ta aɖaʋatɔ sia va gbɔwò ɖo? Eɖo ŋu na wo bena: Mienya ŋutsu la kple eƒe nuwɔwɔ tso!

12Ke wogblɔ bena: Aʋa tsoe, gblɔe na mí dzro! Tete wògblɔ bena: Ale kple ale wògblɔ nam enye si be: Ale Yehowa gblɔ esi: Mesi ami na wò heɖo fia wò ɖe Israel dzi.

13Tete wowɔ kaba, eye wo dome amesiame tsɔ eƒe avɔ ɖo ete le atrakpuifɔflɔ la dzi, eye woku kpẽ gblɔ bena: Yehu zu ha!

14Ale Yehu, Nimsi vi Yosafat ƒe vi, bia nu ɖe Yoram ŋu. Ke Yoram kple Israel blibo la wonɔ ŋudzɔ na Aram-fia Xazael le Ramot-Gilead.

15Emegbe fia Yoram gbugbɔ yi aƒe, be woada gbe le abi, siwo Aramtɔwo de eŋu, esime wòwɔ aʋa kple Aram-fia Xazael la ŋu ne. Eye Yehu gblɔ bena: Ne edze mia ŋu la, ekema amea ɖeke megasi tso dua me ayi aɖagblɔe le Yezreel o.

16Tete Yehu ɖo tasiaɖam heyi Yezreel, elabena Yoram le aba dzi le afima, eye Yuda-fia Axazya yi, be yeakpɔ Yoram ɖa.

17Eye esi dzɔla le mɔ̃ ta me le Yezreel kpɔ Yehu ƒe amehawo gbɔna la, egblɔ be: Mekpɔ amehaa ɖe! Tete Yoram gblɔ bena: Ɖe sɔdola ɖeka ɖo ɖa, ne wòaɖakpe wo abia bena: Ŋutifafaea?

18Eye sɔdola la do sɔ yi ɖakpee gblɔ bena: Ale fía la gblɔ esi: Ŋutifafaea? Yehu gblɔ bena: Ŋutifafanya kae tsɔ gbɔwò? Trɔ va yi megbenye! Eye dzɔla la yi ɖagblɔ bena: Dɔla la yi ɖaɖo wo gbɔ, ke megatrɔ gbɔ o.

19Eye wòdɔ sɔdola evelia wòdo sɔ yi wo gbɔ gblɔ bena: Ale fia la gblɔ esi: Ŋutifafaea? Yehu gblɔ be: Ŋutifafanya kae tsɔ gbɔwò? Trɔ va yi megbenye!

20Eye dzɔla la yi ɖagblɔ bena: Eyi ɖaɖo wo gbɔ, gake megatrɔ gbɔ o. Nuwɔwɔ la le abe Yehu, Nimsi vi ƒe nuwɔwɔ ene, elabena ele nu wɔm abe aɖaʋatɔ ene.

21Tete Yoram gblɔ bena: Tsi sɔ ɖe tasiaɖam ŋu! Eye wotsii ɖe tasiaɖam ŋu, eye Israel-fia Yoram kple Yuda-fia Axazya dome amesiame ɖe eƒe tasiaɖam me, eye woyi Yehu kpe ge: eve wokpɔe Yezreeltɔ Nabot ƒe agble me.

22Esi Yoram kpɔ Yehu la, egblɔ bena: Yehu, ŋutifafaea? Eɖo ŋu bena: Ŋutifafa ka? Esi dawo Izebel ƒe ahasiwɔwɔ kple dzosasa ta le agbɔ sɔm ɖaa ko laa?

23Tete Yoram trɔ hesi, eye wogblɔ na Axazya bena: Axazya, nugbeɖoɖoe!

24Ke Yehu vu ete da me, eye wote megbe na Yoram, eye aŋutrɔ la ŋɔ eƒe dzi ɖi go, eye wòmũ dze eƒe tasiaɖam me.

25Eye wògblɔ na fia ŋu me Bidekar bena: Kɔe ƒu gbe ɖe Yezreeltɔ Nabot ƒe agble me, elabena esi mía kple eve mieɖo sɔ nɔ fofoa Axab yome la, eya Yehowa gblɔ nya sia ɖe eŋu

26Ale Yehowa gblɔ esi Mekpɔ Nabot kple viawo ƒe ʋu etso tso! Yehowa ƒe gbe enye si; Maɖo eteƒe na wò le agble sia me. Eyata kɔe ƒu gbe ɖe agble la me le Yehowa ƒe nya la nu!

27Ke esi Yuda-fia Axazya kpɔe la, esi to abɔ me xɔ ƒe mɔ, eye Yehu ti eyome gblɔ bena: Mité eya hã! Eye wotée ɖe tasiaɖam la me le Gur-togbɛ, si le Yibleam gbɔ la dzi, eye wòsi yi Megido heku ɖe afima.

28Eye eƒe dɔlawo kɔe yi Yerusalem, eye woɖii ɖe eƒe yɔdo me ɖe fofoawo gbɔ le Dawid ƒe du la me.

29Axazya zu fia ɖe Yuda dzi le Axab vi Yoram ƒe ƒe wuiɖekɛlia me.

30Emegbe Yehu va Yezreel. Esi Izebel see la, eɖo tu ɖe ŋku, eye wòwɔ leke na eƒe ta, eye wòdo mo ɖe fesre nu.

31Eye esi Yehu va agboa me la, tete wògblɔ be: Zimri, eƒe aƒetɔ wula doa?

32Wòfɔ ka dzi kpo fesre nu gblɔ bena: Ameka le dzinye, amekae? Tete aƒemenuwo dzikpɔla eve alo etɔ̃ do mo ɖe fesre nu.

33Eye wògblɔ bena: Mitu asii ƒu anyi! Tete wotu asii ƒu anyi, eye eƒe ʋu hlẽ ɖe gli kple sɔwo ŋu, eye wofanyae.

34Eye esi woge ɖe eme ɖu nu no nu la, egblɔ bena: Miyi ɖakpɔ fiƒodeme sia ɖa, ne miaɖii, elabena fia vinyɔnue.

35Ke esi woyi, be yewoaɖii la, womekpɔ eƒe afia ɖeke o, negbe eƒe takoli, afɔbaya kple asibayawo ko.

36Eye wogbugbɔ va gblɔ̃e nɛ; tete wògblɔ be: Esia nye nya, si Yehowa gblɔ to eƒe dɔla Eliya, Tisbitɔ la dzi bena: Avũwo aɖu Izebel ƒe lã le Yezreel-gble me.

37Eye Izebel ƒe kukua ano abe mi ene anɔ gbe me le Yezreel-gble me, ale be amea ɖeke mate ŋu agble be: Izebel enye si o.

← Chapter 8 Jump to: Chapter 10 →

Recommended Reading

Commentary 2 Kings Commentaries → Devotional 2 Kings Devotional Guide → Get This Bible Ewe (Biblia alo Ŋɔŋlɔ Kɔkɔe La Le Eʋegbe Me ) Study Bible →