Judges 16

hadiyya

← Chapter 15 Jump to: Chapter 17 →

1Mat balla Somsoon Filisxee'm manni beero'i hee'u Gaaza'a marukko. Ee beero'onnem mat saa'aanchi meentichcho siidaa isenne gareena aagukko.

2Gaaza'i beero'i mannim Somsoon eekke'e yoo'isa macceesso'i bikkina ee beyyo kibbito'o; beero'i goocannem hiim hundoomam egettu'uuyyi gatto'o. Ixxuwwi «Soodeebe'e egellaa shinoommo» yita'a sawwimminne ee hiimo hundoomam maaxanta'a egetto'o.

3Ihukkaarem ee meentichchonne Somsoon hii'm kolli afeebe'e xale'e hee'ukko. Ee lasage iinse'u beyyiinsi ki'aa ee beero'i ooxxi goocika xufa, lamem gubanaa laqqo'uwwaa hundam xoqolaa ixxi gudumonne iyyaa Keebiroo'n illagenne yoo duun afeebe'e massukko.

4Ee lasage Somsoon Sooreeq cebbanne hee'llam mat Daliila yakkam meentichcho iittukko.

5Filisxee'm gassaan is beyyo waatta'a «Somsoon kaa'n malaayye mahiinsi siidooda'e neesem hinkid issinaa ixxo kallaa kaa'nneena xannoomda'e qawwiissaa xa'mme; neese annannichchim mat kumaa mat xibbi kin biraa kiina uwwinoommo» yito'o.

6Ee lasage Daliila Somsoonina «Keese kaa'nna qoxasookkok mada'e ihukkisaa odim mat manchi keese karaa kaa'eena xanookkok mahinneda'e ihukkisaa he'i kure» yito'o.

7Somsoonim isena «Lamar haareechchi aashaalli xafirinne eese karakko'aare an mulli mannisam hoogaanchi ihoommo» yukko.

8Ee lasage Filisxee'm gassaan lamar haareelli aashaalli xafilluwwa isena eebbo'aare isem eehanninne katto'o.

9Du'm woronne ihaa ixxo egeru manni hee'u bikkina «Somsoona! Filisxee'm manni ki hanenne waarukko» yita'a laatto'o. Ihukkaarem ixxi giir fatira muransoo'isa ee xafilluwwa muransaa ubbuusukko. Ee bikkina ixxi malaayyi mahiinsetda'i la'isukkoyyi hee'ukko.

10Daliilam Somsoonina «Macceese! At eese qawwiissoolla hanqi woshsham iina kuttittoyyo. Kabadem at karanteena xantoottok mahinneda'i ihukkisa he'i kure» yito'o.

11Ixxim isena «Illageen awwaaxxakkobee'i haareechchi ussinne karakko'aare mulli mannisam hoonganchi ihoommo» yaa dabarukko.

12Ee bikkina Daliila haareelli ussuwwinne ixxo katto'o. Du'm woronne maaxamaa egeraakkoo manni hee'u bikkina «Somsoona! Filisxee'm manni ki hanenne waatto'o» yita'a laatto'o. Ihukkaarem ixxi usooma fati'llisa murukko.

13Daliilam Somsoonina «Kabad afeebe'e at eese qawwiissitto; hanqi woshsham iina kuttittoyyo. Kabadem keese hinkid karimmi xansiisooda'e he'i iina kure» yito'o. Ixxim isena «Iikka lamarem horoo'l shogam fatirinne daddaa xiribbanne kattilas anim ayyi manchisam hoogaanchi ihoommo» yukko.

14Ee lasage Daliila, Somsoon diriirukkisa moo'lla'a ixxeka lamarem horo'l shogam fatira eddu'uuyyi dadda'a xiribbanne katta'a lasage «Somsoona! Fillisxee'm manni ki hanenne waatto'o!» yita'a laatto'o. Ixxim diriiriinsi baqaa ixxi horoor exxaa dadamu shogaa xiribbaa xoqolukko.

15Ee bikkina ise «Ki wodan iinninne ihoo'nmi hinkid ‹Keese iitoommo› yito'olla? Sas ammane eese qawwiissaa kabad afeebe'e kaa'n qoxallan hundam siiddittok mahiinseda'e iina kuttitto'oyyo» yito'o.

16Ballina ballina xa'mmitu'uuyyi leho mixeebe'i afeebe'e hawwisso'o

17Ixxim lasaanchonne isena «An iyyummi godabiinsi qaramummaanniinsim Waa'ina annanni ihaammoo Naaziraawekkichchi ihummi bikkina i horoor hogoossamukkoyyo. I horoor hogoossamulas malaayyi annanni ihaa mulli mansammi hoogaanchi ihoommo» yaa hanqa kurukko.

18Daliila ixxi isena hanqa kurukkisa laqqa'a «Iina kaba hanqi woshsha kuru bikkina mataagge daba'llitakka'a waallehe» yita'a Filisxee'm gassaa'n beyyo asse'llo'o. Ixxuwwim diinate amadda'a waatto'o.

19Daliila Somsoona ise gubeedonne iinsiissa'a diriiroo'isa issito'o; ee lasge mat mancho weeshsha'a ixxi hooroo'l lamarem shogam hogoossiisso'o. Ixxi malaayyim ixxeensi annanni ihukko. Isem ixxo u'nnisimma asheetto'o.

20Ee lasage ise «Somsoona! Filisxee'm manni ki hanenne waatto'o!» yito'o. Ixxim diriiriinsi baqaa «Erallisam muransaa maroommo» yaa sawwukko. Waa'i ixxeensi annanni ihukkisa la'ukkoyyi hee'ukko.

21Filisxee'm mannim ixxo qeefadda'a lasage lamem illem fissito'o. Ixxom Gaza'a massita'a naas chimchiminne katta'a karamu beyyonnem hurbaata liitoo'isa issito'o.

22Ihukkaarem hogoossamaa hee'u ixxi horoor odim li'imma asheerukko.

23Ee ammane Filisxee'm gassaan «Ni waa'i Daagoon niina diinakkichchi Somsoona ni anganne higisaa uwwaakko» yita'a liiranchi uguda issiteenaa ixxuwwi waa'i Daagooninam lophphaakkoo kitimmo hincaa'lleenaa wixxitto'o.

24Minaadabim Somsoon moo'lla'a «Ni uulla bi'isukkokaa niinniinsim dut manna sh ni diinakkichchoo ni waa'i ni anganne higisaa uwwukko» yitu'uuyyi ixxuwwi waa'a galaxxito'o.

25Lobakatam liiranta'a «Neese wossooroo'isina Somsoona keyye wollehe» yito'o. Ee bikkina Somsoona karaxxi miniinsi fissita'a wotto'o. Ixxim ixxuwwi illagenne kadukko. Ixxom lam utuphphi lambe'enne uullisso'o.

26Somsoonim ixxi anga amadaa awwonsam hee'u beetina «Ka mine bakkiisaa amadu utubbuwwa i anganne amadiise; anim ixxuwwa bakke'aa uulloommo» yukko.

27Ee mi'n woronnem dut goonii meentii ee'isam Filisxee'm gassaan hundimii hee'llo'o. Ee mi'n fooqannem Somsoon wossoorukkuuyyi moo'llam sas kum goonii meentii hee'llo'o.

28Ee lasage Somsoon «Moollanni Waa'a! He'i eese sawwihe. I Moollanna! Odim mexxo'i mataagge iina malaayye uwwitaa Filisxee'm manni i ille qooqisso'i bikkina baado miqisoommisa isse» yaa uunxukko.

29Ee lasage Somsoon mine bakkiisaa amadu lambe'i lamem utubbuwwam ammadukko. Makki anginne mato qeddi anginnem mulleka hincaa amadukko.

30Ixxim «An ka Filisxee'm manninne maqirem lehoommo» yaa laaraa yoo qax malaayyi hundinnem gafe'u ammanenne min Filisxee'm gassaanonnee ee minenne hee'llo'i keen hundannemii toroshamukko. Somsoon foorinne hee'ukkuuyyi shukkaanniinsi lehukkuuyyi shukkok lobane.

31Ixxi abbaayyuwwii gatto'i qarmannii hundim waatta'a ixxi leesha massito'o. Massita'ahim Xoora'inaa Eshtaa'oolinaa lambe'enne yoo ixxi anni Maanuhe waammanne waammito'o. Somsoon lamiyyi hiincho hundoomam Isra'ee'l minaadaba awwonsaa hee'ukko.

← Chapter 15 Jump to: Chapter 17 →