Judges 21

hadiyya

← Chapter 20 Jump to:

1Isra'ee'l minaadab Misiphphanne wixxito'i ammane «Ni lambe'iinsi ayyi manchim Biiniyaam sullina landa ladiisoobee'isa» yita'a Waa'i illagenne hide'lla'a hee'llo'o.

2Ee bikkina Isra'ee'l minaadab Beeteela matta'a uulli hiimeebe'e Waa'i illagenne afuutta'a sagara iimaa'lla'a wi'llito'o.

3Ixxuwwim «Isra'ee'l I Moollanni Waa'a! Kaballa Isra'eeliinsi mat sulli bee'ukkok mahinatte? Kuk mahina Isra'eelanne ihukko?» yito'o.

4La'm balla daram minaadab Waa'ina kitima hincaa'akkam beyyo baxxa'a shokkiisakka'a hincaa'akkam kitimaa mateeyyoo'm kitimaa hincaa'llo'o.

5Isra'ee'l minaadab Waa'i illagenne Misiphphanne siidamubee'ek ayyim lehona hide'anta'a hee'llo'i bikkina «Isra'ee'l sulluwwiinsi Waa'i illagenne firubee'ek ayyette» yita'a xa'mmanto'o.

6Ixxuwwi abbaayyuwwi hee'llo'i Biiniyaam sulli bikkina Isra'ee'l minaadab kichche'lla'a hee'llo'i bikkina «Kaballa Isra'ee'l minaadabiinsi mat sullo hoongaammo.

7Neesa'i ixxuwwina ayyim landa uwwinoombee'isa hide'nnaammo; ixxuwwiinsi letoo'n gatto'i keenina meento siiddammisina maha issino?» yaqqanto'o.

8Ixxuwwim «Isra'ee'l sulluwwiinsi Waa'i illagenne Misiphpha waarubee'ek yoohonnihe?» yaqqanto'o. Yaabeesh Gala'aadiinsi matem manchim ee dummichcha waarukkoyyi hee'ukko.

9Gaadaano xigakkeena moollinne moollinne weeshakko'i ammanenne Yaabeesh manniinsi an yoommo yookkok matim hee'ukkoyyo.

10Ee bikkina oo dummichchi «Yaabeesh manni uulla mattakka'a meentii oosim gatoobee'isa Gala'aaxxi manna hundam shi'llehe» yita'a ixxuwwiinsi qoxar kee'nneka tommoo lam kum manna asse'llo'o.

11Ixxuwwim «Goonaa gooninne edamu meentoo hundam shi'llehe» yita'a ijaajjo'o.

12Ee Yaabeeshanne hee'llo'i Gala'aaxxi manniinsi soor xibbi baajaam landa siiddo'i bikkina Isra'ee'l minaadab yo'i Kana'aananne yoo Seelo yakkam beyyo amadda'a waatto'o.

13Ee lasage Isra'ee'l minaadab hundim Riimoon geejji kinanne yo'i Biiniyaam sulli beyyo manna asse'lla'a or uulloo'isina iittanto'o.

14Biiniyaam mannim daba'llita'a waatto'o; Isra'eel Yaabeesh manniinsi qeefadda'a eebbo'i landa ixxuwwina uwwito'o. Ihukkaarem ee landik xig ixxuwwina ihukkoyyo.

15Waa'i Isra'ee'l minaadabinne hee'u mateeyyooma muraa hee'u bikkina minaadab Biiniyaam sulli bikkina lobakata kichche'llo'o.

16Ee bikkina dummichchi «Biiniyaam sullonne kanniinsi eehid meenti bee'e; eehannah lehiinsi gatto'i Biiniyaam sulli goonina meento siindeena xannoommok hinkidette?

17«Isra'ee'l tommiinsii lamem sulliinsii mat sulli bi'aa gatoobee'isa Biiniyaam sulliinsi lago aa'ookkok hee'immi hasisookko.

18Ihukkaarem ni lambe'iinsi ayyi manchim Biiniyaam sullina landa uwwookkok duumamona hide'nnaammoo bikkina ni landa uwwineena xannoommoyyo» yito'o.

19Ee lasage «Hiinchonne hiinchonne Seelo'onne Waa'ina gudisakkam ugud hincaakko» yita'a sawwito'o. Seello'i beero'i Beeteeliinsi hanaa'n qarinnee Laabooniinsi woroo'n qarinnee ee'isam Beeteelaa Seekeemaa higakkam googiinsi eelliinchi firinnee hee'oo beero'i hee'ukko.

20Ee bikkina Biiniyaam sullina «Mattakka'a woyi'n kaashshi woronne maaxantakka'a egellehe!

21Ee uguxxi ayyaamonne Seelo'i landi kajjina waaroo ammane woyi'n kaashshi woriinsi fittakka'a annanchim ee landiinsi ki'nnuwwi gaqqi meenti issitakkeena gossakka'a Biiniyaam uulla amaddakka'a mallehe.

22Ixxuwwi anno'i te'im abbaayyuwwi ki'nnuwwi beyyo waatta'a ki'nnuwwinne wocanteena hassota'n ‹Ki'nnuwwi landa massinummok orinnetti ihubee'i bikkina he'i niina haafi'llehe; ki'nnuwwim niina iittitakka'a uwwitakkobee'i bikkina hidiro ginditakka'a bi'isaan ikkakkamoyyo› yitakka'a dabattakkeena xantakkamo» yito'o.

23Biiniyaam mannim ixxuwwi yito'isam issito'o; annannichchim ixxuwwi xiqqisannem Seelo'onne kaddam landiinsi gossa'a ammadda'a matto'o. Ixxuwwi uullam daba'llita'a matta'a beero'uwwa dabatta'a baxxa'a hee'llo.

24Ee ammanem mulli Isra'ee'l minaadab hundim binnito'o. Annannichchim ixxuwwi gaqqi sulli beyyoo moolli beyyoo ee'isam ixxuwwi gaqqi amaxxii minii yoo beyyoo daba'llito'o.

25Ee doollenne Isra'eelina adil hee'ukkoyyo. Manni hundim ixxena danaamo labaa moo'amu luwwi hundam issam hee'ukko.

← Chapter 20 Jump to: