Hosea 1

Ilonggo (Maayong Balita nga Biblia (2012))

Jump to: Chapter 2 →

1Amo ini ang mensahe nga ginhatag sang Ginoo kay Oseas nga anak ni Beri sa panahon sang paghari sa Juda nanday Uzias, Jotam, Acaz, kag Ezequias, kag sang paghari sa Israel ni Jeroboam nga anak ni Joas.

2Sang nahauna nga paghambal sang Ginoo sa Israel paagi kay Oseas, nagsiling sia kay Oseas, “Lakat ka kag magpangasawa. Ang imo asawa magaluib sa imo kag ang imo mga kabataan manginsubong man sa iya. Sa amo man nga bagay ang akon mga tawo nagbiya sa akon kag nagsimba sila sa iban nga mga dios.”

3Gani ginpangasawa ni Oseas si Gomer, ang anak ni Diblaim. Nagbusong sia kag nagbata sing lalaki.

4Ang Ginoo nagsiling kay Oseas, “Hingalani sia kay ‘Jezreel’, kay sa indi madugay akon pagasilutan ang hari sang Israel tungod sang mga pagpamatay sa Jezreel nga ginhimo ni Jehu nga isa sang iya mga katigulangan. Pukanon ko ang paghari sang mga kaliwat ni Jehu sa Israel.

5Kag sa sina nga tion, pagapamatyon ko ang mga hangaway sang Israel sa Kapatagan sang Jezreel.”

6Si Gomer nagbusong liwat kag nagbata sing babayi. Dayon ang Ginoo nagsiling kay Oseas, “Hingalani sia kay ‘Wala-Pagkaluoyi,’ tungod kay indi ko na pagkaluoyan ukon pagpatawaron ang mga tawo sang Israel.

7Pero kaluoyan ko ang mga tawo sang Juda. Ako, ang Ginoo nga ila Dios, magaluwas sa ila, pero indi paagi sa inaway—sa espada ukon pana, ukon paagi sa mga kabayo ukon mga soldado nga nagasakay sa kabayo.”

8Sa tapos malutas ni Gomer ang iya anak nga babayi, nagbusong sia liwat kag nagbata sing isa naman ka lalaki.

9Ang Ginoo nagsiling kay Oseas, “Hingalani sia kay ‘Indi-Akon-Mga-Tawo,’ tungod kay ang mga Israelinhon indi akon mga tawo, kag ako indi ila Dios.”

10Ang mga tawo sang Israel manginkaangay sang balas sa baybayon nga indi maisip ukon masukob. Karon ginasingganan sila sang Dios, “Indi kamo akon mga tawo,” pero sa ulihi pagasingganan sila, “Mga anak kamo sang buhi nga Dios!”

11Ang mga tawo sang Juda kag ang mga tawo sang Israel magatingob liwat. Magapili sila para sa ila kaugalingon sing isa lamang ka pangulo, kag sa liwat magadamo sila kag magauswag sa ila duta. Huo, ang adlaw ni Jezreel mangindaku nga adlaw!

Jump to: Chapter 2 →