Hosea 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Ang mga tawo sang Israel kaangay sang balagon sang ubas nga may madamo sing bunga. Samtang nagabugana sila, nagadamo man ang ila mga altar nga ginapatindog. Samtang nagaayo ang patubas sang ila duta, ginapatahom pa gid nila ang balaan nga mga haligi nga ila ginasimba.

2Ang ila mga tagipusoon madaya, kag karon dapat sila mag-antos tungod sang ila mga sala. Ang Dios magaguba sang ila mga altar kag magatumba sang ila balaan nga mga haligi.

3Sa indi madugay ini nga mga tawo magasiling, “Wala kami sing hari, tungod kay wala kami magkahadlok sa Ginoo. Pero ano gid bala ang mahimo sang hari para sa amon”?

4Wala gid man, kundi hambal lang, kag magsaad sing indi matuod kag walay pulos nga mga kasugtanan. Ang katarungan nangin indi katarungan, kag nagalapta ini sa bug-os nga ulomhan nga naarado na kaangay sang makahililo nga mga hilamon.

5Ang mga tawo nga nagaestar sa siudad sang Samaria magakahadlok kag magalalaw tungod sang pagkadula sang toro nga baka nga bulawan sa Betaben. Sila kag ang mga pari nga nagaalagad sa diosdios magalalaw sini. Magahilibion sila kon makuhaan ini sang iya bulawanon nga katahom.

6Ang diosdios pagadalhon sa Asiria subong nga regalo sa gamhanan nga hari. Ang Israel pagapakahuy-an tungod sang laygay nga iya ginsunod.

7Ang iya hari pagaanuron, kaangay sang agsap sang kahoy sa tubig.

8Ang mga altar sa ibabaw sang bakulod sang Aben, sa diin ang mga tawo sang Israel nagasimba sa mga diosdios pagagub-on. Ang mga hilamon kag mga tanom nga tunokon magatubo sa ila mga altar. Ang mga tawo magasiling sa mga bukid, “Tagoa kami!” kag sa mga bakulod, “Tabuni kami!”

9Ang Ginoo nagasiling, “Ang mga tawo sang Israel wala mag-untat sa pagpakasala batok sa akon halin sang ila pagpakasala sa akon sa Gebeat. Gani maabtan sila sang gira sa Gebeat.

10Salakayon ko ining makasasala nga mga tawo kag silutan ko sila. Ang mga pungsod magatingob batok sa ila, kag pagasilutan sila tungod sang ila madamo nga mga sala.

11“Ang Israel kaangay sang namanso sing maayo nga bakiya nga baka nga luyag maglinas. Pero ginpakamaayo ko ang pagtakod sing gota kag sing gikos sa iya matahom nga liog. Ginpaarado ko si Juda kag ginpakaras ko si Israel.

12Nagsiling ako, ‘Magpanggas kamo sing katarungan para sa inyo kaugalingon kag mag-ani kamo sang mga kaayuhan nga ginpatubas sang inyo katutom sa akon. Magbungkag kamo sing bag-o nga duta para sa inyo kaugalingon, kay tion na ini nga magabalik kamo sa akon nga inyo Ginoo, kag magaabot ako kag hatagan ko kamo sang mga kaayuhan.’

13Pero sa baylo nagtanom kamo sing kalautan kag inyo naani ang iya patubas. Nakaon ninyo ang bunga nga ginpatubas sang inyo mga kabutigan. “Tungod kay nagsalig kamo sa inyo mga karwahi kag sa kadamuon sang inyo mga soldado,

14ang inaway magaabot sa inyo mga tawo, kag ang tanan ninyo nga mga pamakod pagagub-on. Manginkaangay ina sang adlaw sang pagguba ni Haring Salman sang siudad sang Betarbel sa tion sang inaway, kag nagkalamatay ang mga iloy kag ang ila mga kaanakan.

15Mga tawo sang Betel, amo ini ang matabo sa inyo tungod sang daku nga kalautan nga inyo nahimo. Sa pagsugod sang inaway ang hari sang Israel mapatay dayon.”

← Chapter 9 Jump to: Chapter 11 →