Hosea 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Ang tanan nga ginahimo sang mga tawo sang Israel halin sa aga tubtob sa gab-i wala sing pulos kag makahalalit. Ang binutig kag pagpamintas nagadugang sa tunga nila. Nagahimo sila sing mga kasugtanan sa Asiria kag naganegosyo sila sa Ehipto.”

2Ang Ginoo may panumbongon batok sa mga pumoluyo sang Juda. Pagasilutan man niya ang Israel tungod sang ginahimo sang iya mga pumoluyo. Balusan niya sila tungod sang ila ginhimo.

3Ang isa sang ila mga katigulangan nga si Jacob nagdis-og sang iya utod nga si Esau samtang didto pa sila sa tiyan sang ila iloy, kag sang nagdaku na sia nagpakigdumog sia sa Dios—

4nagpakigdumog sia batok sa anghel kag nagdaog sia. Si Jacob naghibi kag nagpangayo sing bendisyon. Ang Dios nagkadto sa isa sang akon mga katigulangan nga si Jacob sa Betel, kag didto nagpakighambal sia sa iya.

5Amo yadto ang Ginoo nga Dios sang mga hangaway. Ang iya ngalan Ginoo, nga paagi sini dapat sia pagasimbahon.

6Gani, karon, kamo nga mga kaliwat ni Jacob, magsalig sa inyo Dios kag magbalik sa iya. Magmainunongon kamo kag magmatarong, kag maghulat nga may pagpailob sang pagahimuon sang inyo Dios.

7Ang Ginoo nagasiling, “Ang mga tawo sang Israel pareho kadaya sa mga Canaanhon. May mga timbangan sila nga indi husto kag luyag gid nila ang pagdaya sa mga manugbakal.

8Nagapabugal sila, ‘Manggaranon kami. Nagdamo ang amon pagkabutang, kag wala sing may makasumbong sa amon nga nagmanggaranon kami sa dinaya nga paagi.’

9Pero ako, ang Ginoo nga inyo Dios nagpangulo sa inyo pa gwa sa Ehipto. Paestaron ko kamo liwat sa mga tolda, subong sang inyo pag-estar sang pagkadto ko sa inyo sa desierto.

10“Naghambal ako sa mga propeta kag ginhatagan ko sila sing mga palanan-awon. Kag paagi sa mga propeta naghatag ako sing mga paandam sa akon mga katawhan.

11Pero ang mga diosdios ginasimba nila sa Galaad kag ang nagasimba sa ila mapatay. Ang toro nga mga baka ginahalad sa Gilgal, gani ang mga altar didto mangintinumpokan nga mga bato sa mga latagon.”

12Ang isa sang aton mga katigulangan nga si Jacob nagpalagyo pakadto sa duta sang Mesopotamia, sa diin nagbantay sia sang mga karnero sang isa ka tawo agod makapangasawa sia.

13Ang Ginoo nagpadala sing isa ka propeta sa paghilway sang mga tawo sang Israel gikan sa pagkaulipon sa Ehipto kag sa pag-atipan sa ila.

14Ginpaakig gid sang mga tawo sang Israel ang Ginoo. Bagay gid sila silutan sang kamatayon tungod sang ila mga sala. Silutan niya sila tungod sang kahuloy-an nga ila gindala sa iya.

← Chapter 11 Jump to: Chapter 13 →