Hosea 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Gani tawga ninyo ang inyo pareho nga mga Israelinhon nga “Mga Tawo sang Dios” kag “Ginkaluoyan sang Ginoo!”

2Mga anak ko, magpakitluoy kamo sa inyo iloy, bisan nga indi ko na sia asawa, kag indi na niya ako bana. Magpakitluoy kamo sa iya nga untaton na niya ang iya pagpanginlalaki kag pagbaligya sang iya dungog.

3Kon indi sia mag-untat, ubahan ko sia kag manginhublas sia kaangay sadtong adlaw sang iya pagkatawo. Himuon ko sia subong sang kigas kag mamala nga duta, kag mapatay sia sa kauhaw.

4Indi ako magkaluoy sa iya mga kabataan kay natawo sila gikan sa pagpanginlalaki sang walay huya nga babayi nga nagabaligya sang iya dungog. Nagsiling sia, “Magasunod ako sa akon mga lalaki kay sila nagahatag sa akon sing pagkaon kag tubig, bayu nga delana kag lino, lana sang olivo kag bino.”

6Gani kudalan ko sia sing tunokon nga mga tanom. Patindugan ko sing mga pader sa palibot niya, agod nga indi sia makagwa.

7Magalagas sia sa iya mga lalaki pero indi sia makaabot sa ila. Magapangita sia sa ila, pero indi niya sila makita. Dayon magasiling sia, “Mabalik ako sa akon nahauna nga bana kay mas maayo pa ang akon kahimtangan sang una sang sa karon.”

8Wala niya ginkilala nga ako ang naghatag sa iya sing trigo, bino kag lana sang olivo. Ginhatagan ko man sia sing madamo nga pilak kag bulawan, nga gingamit niya sa pagsimba kay Baal.

9Gani, sa tig-alani bawion ko ang trigo, kag ang bino nga ginhatag ko sa iya, kag kuhaon ko ang delana kag ang lino nga bayu nga ginhatag ko sa iya.

10Dayon ubahan ko sia sa atubang sang iya mga lalaki, kag wala sing may makatabang sa iya gikan sa akon mga kamot.

11Pauntaton ko ang tanan niya nga pagkinasadya—ang iya mga piesta kada-tuig, ang iya Piesta sang mga Lati kag ang iya mga pagsaulog sang Adlaw nga Inugpahuway—ang iya tanan nga mga pagtililipon nga balaan.

12Laglagon ko ang iya katamnan sang ubas kag ang iya mga kahoy nga higera, nga siling niya ginhatag sang iya mga lalaki sa iya tungod sang paghatag niya sang iya kaugalingon sa ila. Himuon ko nga manginkatalunan ang iya katamnan sang ubas kag mga prutas, kag ang talunon nga mga sapat magalaglag sini.

13Pagasilutan ko sia tungod sang mga tion nga ginkalimtan niya ako, sang pagsunog niya sing insyenso kay Baal kag sang pagsuksok niya sang iya mga alahas sa paglagas sang iya mga lalaki. Ang Ginoo naghambal sini.

14Gani pagadalhon ko sia liwat sa desierto. Didto pangaluyagan ko sia liwat paagi sa mahigugmaon nga mga pulong.

15Iuli ko sa iya ang iya anay mga katamnan sang ubas, kag himuon ko ang Patag sang Kagamo nga pwerta sang paglaom. Magasabat sia sa akon didto subong sang iya ginhimo sang pamatan-on pa sia, sang pagpalagyo niya gikan sa Ehipto.

16Kag sa liwat pagatawgon niya ako nga iya bana, kag indi na niya ako pagtawgon nga iya Baal.

17Indi ko na gid sia pagpamitlangon liwat sang ngalan ni Baal.

18Sa sina nga tion magahimo ako sing kasugtanan sa tanan nga mga sapat nga talunon kag mga pispis, agod indi nila pag-anhon ang akon mga tawo. Pagakuhaon ko gikan sa duta ang tanan nga mga hinganiban para sa inaway, tanan nga mga espada kag mga pana kag ang akon mga tawo magakabuhi sa paghidait kag hilway sa katalagman.

19O Israel, pangasaw-on ko ikaw; himuon ko ang husto kag ang matarong, higugmaon ko ikaw kag kaluoyan sa gihapon, kag ikaw mangin-akon sa walay katubtoban.

20Magatuman ako sang akon saad kag ikaw mangin-akon, kag makilala mo nga ako amo ang Ginoo.

21Sa sadto nga tion sabton ko ang mga pangamuyo sang akon mga tawo nga Jezreel. Magapadala ako sing ulan sa duta, kag ang duta magapatubas sing trigo, kag ubas, kag mga olivo.

23Paestaron ko ang akon mga tawo sa duta kag pauswagon ko sila. Kaluoyan ko sila nga gintawag anay nga “Wala-Pagkaluoyi,” kag sa ila nga gintawag “Indi-Akon-Mga-Tawo,” magasiling ako, “Kamo akon mga tawo,” kag magasabat sila, “Ikaw amo ang amon Dios.”

← Chapter 1 Jump to: Chapter 3 →