Hosea 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Ang Ginoo nagasiling, “Sang bata pa si Israel, ginhigugma ko sia, kag gintawag ko ang akon anak paggwa sa Ehipto.

2Pero sa dalayon ko nga pagtawag sa iya kaangay sang isa ka anak, labi nga nagapalayo sia sa akon. Ang akon mga tawo naghalad kay Baal, nagsunog sila sing insyenso sa mga diosdios.

3Pero ako ang nagtudlo kay Israel sa paglakat. Ginkungkong ko ang akon mga tawo, pero wala nila ginkilala ang akon pag-atipan sa ila.

4Ginbutong ko sila pakadto sa akon nga may kalulo kag paghigugma. Ginhakwat ko sila kag ginkugos sing hugot, nagduko ako sa pagpakaon sa ila.

5“Indi sila luyag magbalik sa akon, gani dapat sila magbalik sa Ehipto kag ang Asiria magagahom sa ila.

6Ang inaway magaabot sa ila mga siudad kag magabungkal sang mga pwerta sang ila mga siudad. Ang inaway magapatay sang akon mga tawo, tungod kay ginsunod nila ang malain nga laygay.

7Nagpanikasog sila nga magbiya sa akon. Magasinggit sila tungod sang palas-anon nila, pero wala sing may makuha sini sa ila.

8“Ano bala ang pagsikway ko sa imo, O Israel? Ano bala ang pagpatumbaya ko sa imo? Malaglag ko bala ikaw pareho sa ginhimo ko sa Adma? Ukon mahimo ko bala sa imo ang ginhimo ko sa Zeboim? Ang akon tagipusoon indi magtugot nga himuon ko ini! Naluoy gid ako sa imo.

9Indi ko ikaw pagsilutan sa akon kaakig, indi ko paglaglagon liwat ang Israel kay Dios ako kag indi tawo. Ako, ang Balaan, nagaupod sa imo. Indi ako magkadto sa imo nga may kaakig.

10“Magangurob ako kaangay sang leon sa ila mga kaaway, kag ang akon mga tawo magasunod sa akon. Magadalidali sila pakadto sa akon gikan sa nakatundan.

11Magaabot sila gikan sa Ehipto pareho kadasig sang mga pispis, kag gikan sa Asiria, kaangay sang mga pating. Dalhon ko sila liwat sa ila mga ilistaran. Ako, ang Ginoo, ang naghambal sini.”

12Ang Ginoo nagasiling, “Ginpalibutan ako sang mga tawo sang Israel sang binutig kag dinaya. Ang mga tawo sang Juda nagpadayon sa pagbato sa akon, ang matutom kag ang balaan nga Dios.

← Chapter 10 Jump to: Chapter 12 →