Hosea 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1“Kon luyag ko gani nga ayuhon ang akon mga tawo nga Israel kag pauswagon sila liwat, ang akon lamang makita amo ang ila kalautan, kag ang kalainan nga ila ginahimo. Nagapangdaya sila, nagasulod sila sa mga balay kag nagapangawat, nagapamangga kag nagapangawat sila sa mga tawo sa mga dalanon.

2Wala gid sila nagahunahuna nga dumdomon ko ang tanan nga mga kalautan nga ila ginahimo. Ang ila mga sala nagalibot sa ila kag indi ini matago sa akon mga mata.”

3Ang Ginoo nagasiling, “Ang mga tawo nagadaya sa hari kag sa iya mga opisyales paagi sa ila malaut nga mga plano.

4Tanan sila maluibon kag indi mainunongon. Kaangay sila sang pugon nga ginapainit sang panadero. Wala niya ginaukay ang kalayo samtang ang linamas nga iya ginhanda wala pa gid maghabok.

5Sa kaadlawan sang hari ginhubog nila sia kag ang iya mga opisyales kag nanginbuangbuang sila tungod sang bino.

6Nagsingkal sila kaangay sang pugon sa ila pagplano sing malaut. Sa bug-os nga gab-i ang ila kaakig nagabaga, kag pagkaaga nagadabdab ini.

7“Sa ila kaakig ginpamatay nila ang ila mga pangulo. Ang ila mga hari ginpamatay sing sunodsunod, pero wala gid sing isa nga nagpangayo sa akon sing bulig.”

8Ang Ginoo nagasiling, “Ang mga tawo sang Israel kaangay sang tinapay nga alang-alang ang pagkaluto. Nagasalig sila sa mga pungsod sa ila palibot.

9Ang ila pagsalig sa mga dumoluong nagkawat sang ila kusog, pero wala nila ini mahibaloi. Wala gani sila makahibalo nga ang ila buhok nag-ubanon na.

10Ang bugal sang mga tawo sang Israel nagasinggit batok sa ila. Pero wala sapayan sini tanan, wala sila magbalik sa akon, ang Ginoo nga ila Dios.

11Ang Israel kaangay sang langkalangka nga pating. Ang iya mga tawo nagapangayo sing bulig, nahauna sa Ehipto, dayon nagdangop sila sa Asiria!

12Iladlad ko ang pukot sa pagdakop sa ila samtang nagalakat sila, dakpon ko sila kaangay sang mga pispis. Silutan ko sila tungod sang malaut nga ila nahimo.

13“Tapos gid sila! Gintalikdan nila ako kag nagbato sila sa akon. Pagalaglagon sila. Luyag ko nga luwason sila, pero naghambal sila sing binutig nahanungod sa akon!

14Indi tudok sa tagipusoon ang ila pagpangamuyo sa akon, kundi nagaligid sila kag nagawangal kaangay sang mga pagano. Kon magpangamuyo sila nga hatagan sing trigo kag bino, ginapilasan nila ang ila kaugalingon subong sang mga pagano. Mga mabinatuon sila!

15Bisan ginsagod ko sila kag ginpadaku, nagplano sila batok sa akon.

16Nagpadayon sila sa pagbiya sa akon kag nagdangop sila sa mga dios nga wala sing gahom. Indi sila masaligan kaangay sang tiko nga pana. Tungod kay ang ila mga pangulo bugalon kon maghambal, magaagom sila sing mapait nga kamatayon, kag ang mga Ehiptohanon magakadlaw.”

← Chapter 6 Jump to: Chapter 8 →