Hosea 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1“Kamo nga mga pari, magpamati kamo sini! Talupangda ninyo, mga tawo sang Israel! Magpamati kamo, mga katapo sang panimalay sang hari! Kamo nga dapat kuntani maghukom sing matarong sa iban amo ang pagahukman! Nangintugalbong kamo sa Mispa, nanginsiod kamo sa Bukid sang Tabor,

2nanginmadalom kamo nga buho sa Sitim, kag pagasilutan ko kamo tanan.

3Nahibaluan ko kon ano ang Israel. Indi sia makapanago sa akon. Nangindi-matutom sia sa akon, kag ang iya mga tawo nadagtaan.”

4Ang malaut nga nahimo sang mga tawo nagaupang sa ila sa pagbalik sa ila Dios. Nabuyo na sila sa pagsimba sa mga diosdios, kag wala na nila ginakilala ang Ginoo.

5Ang bugal sang mga Israelinhon nagasinggit batok sa ila. Ang ila mga sala nagapasandad kag nagapukan sa ila, kag ang mga pumoluyo sang Juda nagakapukan upod sa ila.

6Ginadala nila ang ila mga karnero kag mga baka nga ihalad sa Ginoo, pero wala ini sing pulos. Indi nila sia makita kay ginbayaan niya sila.

7Ginluiban nila ang Ginoo; ang ila mga anak indi iya. Gani karon sila kag ang ila mga duta pagalaglagon sa gilayon.

8Pahuniha ang mga trumpeta para sa inaway sa Gebeat! Patunoga ang budyong sa pagpaandam sa Rama! Ipabati ang singgit sang inaway sa Betaben! Lakat sa pakig-awayan, mga lalaki sang Benjamin!

9Ang Israel pagalaglagon sa adlaw nga mag-abot ang silot. Ginapahibalo ko sa mga tribo sang Israel ang isa ka butang nga pat-od gid nga magaabot!

10Ang Ginoo nagasiling, “Naakig ako tungod kay ang mga pangulo sang Juda nagsalakay sang Israel kag naglaksam sang ila duta, gani padalhan ko sila sing silot kaangay sang baha.

11Ang Israel ginapigos. Nadula niya ang iya kaugalingon nga duta, tungod kay nagpangayo sia sing bulig sa mga tawo nga indi makabulig sa iya.

12Gani padalhan ko sing kahalitan ang Israel, kag kalaglagan ang mga tawo sang Juda.

13“Sang makita ni Israel kon daw ano kalubha sang iya balatian, kag sang makita ni Juda ang iya mga pilas, dayon ang Israel nagkadto sa Asiria sa pagpangayo sing bulig sa gamhanan nga hari, pero indi sia makaayo sa ila ukon makabulong sang ila mga pilas.

14Pagasalakayon ko ang mga tawo sang Israel kag sang Juda kaangay sang mabangis nga leon. Ako mismo ang magagus-ab sa ila kag dayon magalakat ako. Pagatabanon ko sila kag wala sing may makaluwas sa ila.

15“Pagabayaan ko ang akon mga tawo tubtob makaantos sila tungod sang ila mga sala kag magapalapit sila sa pagpangita sa akon. Ayhan sa ila pag-antos magatinguha sila sa pagpangita sa akon.”

← Chapter 4 Jump to: Chapter 6 →