Hosea 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Ang Ginoo nagasiling, “Patunoga ang trumpeta sa pagpaandam! Ang mga kaaway nagasalakay sa akon duta kaangay sang nagasulip nga mga agila! Ang akon mga tawo wala magtuman sang kasugtanan nga akon ginhimo sa ila kag nagpamatok sila sa akon pagtudlo.

2Bisan nga nagatawag sila sa akon nga ila Dios kag nagasiling sila nga mga tawo ko sila kag nakilala nila ako,

3pero ginasikway nila ang maayo. Tungod sini ang ila mga kaaway magalagas sa ila.

4“Ang akon mga tawo nagpili sing mga hari nga wala sing pahanugot sa akon. Nagpili sila sing mga pangulo nga wala sang akon pagpakamaayo. Sa ila pilak kag bulawan naghimo sila sing mga diosdios para sa ila kalaglagan.

5Ginsikway ko ang bulawan nga baka nga ginsimba sang mga pumoluyo sang siudad sang Samaria. Nagasilabo ang akon kaakig sa ila. San-o pa bala nila bayaan ang ila pagsimba sa mga diosdios?

6Ang isa ka platero sa Israel naghimo sing diosdios, kag indi ini Dios! Ang diosdios nga baka nga ginasimba sang mga taga-Samaria pagadugmokon!

7Kon magpanggas sila sing hangin, magaani sila sing bagyo! Ang nagatindog nga trigo nga wala sing uhay indi makapatubas sing kalan-on. Pero kon makapatubas gid man ini, ang mga dumoluong magaubos sini kaon!

8Ang bug-os nga Israel pagalamunon. Bisan karon, ang mga pungsod nagakabig sa ila nga wala sing pulos kaangay sang buka nga kolon.

9Kaangay sila sang talunon nga asno nga nagapagusto lang kon diin makadto. Nagkadto sila sa Asiria sa pagpangayo sing bulig. Ang mga tawo sang Israel nagbaligya sang ila kaugalingon sa iban nga mga pungsod agod maapinan sila.

10Pero karon tipunon ko sila kag silutan. Sa indi madugay magalubid sila sa kasakit kon ang hari sang Asiria magpigos sa ila.

11“Samtang nagadamo ang mga altar sang mga tawo sang Israel sa pagkuha sang sala, nagadamo man ang mga lugar nga ila ginahimuan sang sala!

12Nagsulat ako sing madamo nga mga pagtulon-an para sa mga tawo, pero ginkabig nila ini nga iya sang mga dumoluong.

13Naluyag sila magdulot sing mga halad sa akon, kag naluyag sila magkaon sang nahalad nga mga karne. Pero ako, ang Ginoo, wala malipay sa ila, kag karon dumdomon ko ang ila sala kag silutan ko sila tungod sini. Pabalikon ko sila sa Ehipto!

14“Ang mga tawo sang Israel nagpatindog sing mga palasyo, pero nalipatan nila ang ila kaugalingon nga Manunuga. Ang mga tawo sang Juda nagpatindog sing mga siudad nga may pamakod. Pero magapadala ako sing kalayo sa pagsunog sang ila mga siudad kag sa pagguba sang ila mga palasyo.”

← Chapter 7 Jump to: Chapter 9 →