Hosea 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Mga tawo sang Israel, untati ang paghiwat sang inyo mga piesta nga kaangay sang mga pagano. Nagtalikod kamo sa inyo Dios kag nagbiya sa iya. Sa bug-os nga duta ginbaligya ninyo ang inyo kaugalingon kay Baal kaangay sang malain nga mga babayi, kag ginpakamahal ninyo ang trigo nga abi ninyo ginbayad niya sa inyo!

2Pero kulangon kamo sing trigo kag lana sang olivo, kag mawad-an kamo sing bino.

3Ang mga tawo sang Israel indi magpadayon sa pag-estar sa duta sang Ginoo, kundi magabalik sila sa Ehipto kag magakaon sang di-matinlo nga kalan-on sang Asiria.

4Didto sa iban nga mga duta indi sila makadulot sing bino sa Ginoo, kag indi man makahalad sa iya. Ang ila pagkaon magadagta sang tanan nga magakaon sini, kaangay sang mga pagkaon nga ginakaon sa paglubong. Ang ila pagkaon para lamang sa pagbusog sa ila kagutom, kag wala sing bahin sini nga pagadalhon subong nga dulot sa Templo sang Ginoo.

5Kag kon mag-abot ang tion nga gintalana sa mga piesta sa pagpasidungog sa Ginoo, ano na lang ang pagahimuon nila?

6Kon ang kalalat-an mag-abot kag ang mga tawo maglalapta, ang mga Ehiptohanon magatipon sa ila agod ilubong didto sa Memfis! Ang ila mga pagkabutang nga nahimo sa pilak kag ang ila naguba nga mga balay pagatabunan sang mga hilamon kag sang tunokon nga mga tanom.

7Ang tion sa pagsilot nag-abot na, ang tion nga ang mga tawo magabaton sang nagakabagay sa ila. Ang Israel makahibalo sini kon ini mahanabo! Magasiling kamo, “Ini nga propeta buangbuang. Ini nga tawo nga may espiritu, malain sing ulo.” Kamo nga mga tawo nagakaakig gid sa akon tungod kay ang inyo sala tama gid kadako.

8Ang Dios nagpadala sa akon subong nga isa ka propeta sa pagpaandam sa iya mga tawo nga Israelinhon. Pero bisan diin ako magkadto nagatinguha kamo sa pagsiod sa akon kaangay sang isa ka pispis. Bisan sa Templo mismo sang Dios ang mga tawo amo ang kaaway sang propeta.

9Tama kalaut ang ila ginahimo kaangay sang ila ginhimo didto sa Gebeat. Pagadumdomon sang Dios ang ila mga sala kag pagasilutan sila.

10Ang Ginoo nagasiling, “Sang nahauna nga pagkakita ko sa Israel, daw nakakita ako sing ubas nga nagatubo sa desierto. Sang nahauna nga pagkakita ko sang inyo mga katigulangan, daw nakakita ako sang nahauna nga luto sang higos sa tion sang tigbulunga. Pero sang pagkadto nila sa Bukid sang Baal-peor, nagsugod sila sa pagsimba kay Baal, kag nanginmakangilil-ad sila subong sang mga diosdios nga ila ginhigugma.

11Ang kagamhanan sang Israel magalupad palayo kaangay sang isa ka pispis, kag ang ila mga babayi indi na magpamata, indi na magbusong, kag indi na magpanamkon.

12Kag bisan magsagod sila sang ila mga anak, pagakuhaon ko sila, kag indi ko pagbilinan sing bisan isa nga buhi. Kon akon patumbayaan ini nga mga tawo, makakulogmat nga mga butang ang matabo sa ila.”

13Sang-una nakita ko ang Israel, kaangay ini sang linghod nga palma nga natanom sa mapatubason nga duta. Pero karon, ang Israel magadala paggwa sang iya mga kaanakan agod pagapatyon.

14O Ginoo, ano bala ang pangayuon ko sa imo nga ihatag sa sini nga mga tawo? Hatagi ang ila mga kababayin-an sing mga tiyan nga indi magpamata kag mga suso nga wala sing gatas!

15Ang Ginoo nagasiling, “Ang tanan nila nga paghimo sing kalautan nagsugod sa Gilgal. Didto nagsugod ako sa pagkaakig sa ila. Tungod sang kalautan nga ila nahimo pagatabugon ko sila gikan sa akon duta. Indi ko na sila paghigugmaon, kay ang tanan nila nga mga pangulo nagbato sa akon.

16Ang mga tawo sang Israel kaangay sang tanom nga ang iya mga gamot nalaya kag wala na nagpamunga. Indi sila magpamata. Pero bisan magpamata sila, pamatyon ko ang mga kabataan nga ila gid ginapalangga.”

17Ang Dios nga akon ginaalagad magasikway sang iya mga tawo tungod kay wala sila magpamati sa iya. Manginlayaslayas sila sa mga pungsod.

← Chapter 8 Jump to: Chapter 10 →