Hosea 13

Ilonggo (Maayong Balita nga Biblia (2012))

← Chapter 12 Jump to: Chapter 14 →

1Sang una kon maghambal gani ang tribo ni Efraim, ang iban nga mga tribo nahadlok. Ang iban nga mga tribo ni Israel naghangad kay Efraim. Pero ang mga tawo nakasala paagi sa pagsimba kay Baal, kag sila mapatay tungod sini.

2Nagapadayon sila sa pagpakasala paagi sa paghimo sing mga imahen nga tinunaw, mga diosdios gikan sa ila pilak agod ila simbahon. Ginplano ini kag ginhimo sang tawo. Dayon nagasiling sila, “Magdulot kamo sing mga halad sa ila!” Ano ang paghalok sang mga tawo sina nga mga diosdios nga ang ila dagway iya sang toro nga mga baka!

3Gani ini nga mga tawo madula kaangay sang alapuop sa aga, kaangay sang tun-og nga nagakadula sing aga pa. Manginkaangay sila sang upa nga ginapalid sang hangin gikan sa linasan, kag kaangay sang aso sa simboryo.

4Ang Ginoo nagasiling, “Ako ang Ginoo nga inyo Dios nga nagpangulo sa inyo pa gwa sa Ehipto. Wala kamo sing nakilala nga Dios kundi ako lamang. Ako lamang ang inyo manluluwas.

5Gin-atipan ko kamo sa mamala kag kigas nga duta.

6Pero sang pagsulod ninyo sa maayo nga duta, nag-ayo ang inyo pangabuhi, kag dayon nagbugalon kamo kag nagkalipat sa akon.

7Gani salakayon ko kamo kaangay sang leon. Subong ako sang leopardo nga nagahulat sa pagsalakay sa inyo kon kamo magpanglakaton.

8Kaangay ako sang uso nga nadulaan sang iya mga tutoy, nga magasalakay sa inyo, kag magagus-ab sa inyo. Kaangay ako sang leon nga magakaon sa inyo, kag magakusnit sa inyo kaangay sang talunon nga sapat.

9“Mga tawo sang Israel, pagalaglagon ko kamo! Karon sin-o bala ang makatabang sa inyo?

10Nagpangayo kamo sing isa ka hari kag mga pangulo, pero ano ang pagkaluwas nila sang pungsod?

11Sa akon kaakig ginhatagan ko kamo sing mga hari, kag sa akon kainit ginkuha ko sila sa inyo.

12“Ang sala sang Israel nalista, kag ang listahan sang ila mga sala natago sing maayo.

13Ang Israel may kahigayunan sa pagkabuhi, pero tama sia ka buang nga wala niya paghimusli ini nga kahigayunan. Kaangay sia sang bata nga daw matawo na, pero indi sia maggwa sa tiyan sang iya iloy.

14Indi ako magluwas sini nga mga tawo gikan sa kalibutan sang mga patay, ukon sa paghilway sa ila gikan sa gahom sang kamatayon. O kamatayon, dali ka upod sa imo kalalat-an! O kalibutan sang mga patay, dali ka upod sa imo kalaglagan! Wala na ako sing kaluoy sa sini nga mga tawo.

15Bisan nga ang Israel nagapanambok kaangay sang mga hilamon magapadala ako sing mainit nga salatan gikan sa desierto, kag magapahubas sang ila mga tuboran kag mga bubon. Magalaglag ini sang tanan nga mga pagkabutang nga malahalon.

16Ang Samaria dapat mag-antos sang bunga sang iya pagpakasala, tungod kay nagbato sia sa akon. Ang iya mga tawo magakalamatay sa inaway, ang iya mga bata nga magagmay ilampos sa duta, kag ang tiyan sang nagabusong nga mga babayi pagaririan.”

← Chapter 12 Jump to: Chapter 14 →