2 Samuel 11

Ilonggo (Ang Biblia (1982))

← Chapter 10 Jump to: Chapter 12 →

1Sa pagsapul sang tuig, sa tion nga nagagowa ang mga hari sa pag-away, si David nagpadala kay Joab, kag sang iya mga alagad upud sa iya, kag sang bug-os nga Israel; kag ginlaglag nila ang mga anak ni Amon, kag ginlikupan ang Raba. Apang si David nagpabilin sa Jerusalem.

2Kag nahanabu sa kahaponon, nga si David nagbangon gikan sa iya higdaan kag nagdayandayan sa atop sang balay sang hari, kag kutub sa atop nakita niya ang babayi nga nagapaligos; kag ang babayi tama gid katahum tolokon.

3Kag si David nagpadala kag nagpamangkot nahanungud sa babayi. Kag ang isa nagsiling, “Indi bala ini si Bat-seba, ang babayi nga anak ni Eliam, ang asawa ni Urias nga Hethanon?”

4Gani si David nagpadala sing mga manugbalita, kag ginpakuha sia; kag nagpalapit sia sa iya, kag naghulid sia sa iya. (Karon nakapaninlo sia sa iya pagkahigko.) Niyan nagpauli sia sa iya balay.

5Kag ang babayi nanamkon; kag nagpadala sia kag nagsugid kay David, “Ako nagabusung.”

6Gani si David nagpadala kay Joab, “Ipadala sa akon si Urias nga Hethanon.” Kag ginpadala ni Joab si Urias kay David.

7Sang nag-abut si Urias sa iya, ginpamangkot sia ni David kon paano si Joab, kag kon maanoano ang katawohan, kag kon paano ang lakat sang inaway.

8Niyan si David nagsiling kay Urias, “Dulhog ka sa imo balay, kag hinawi ang imo mga tiil.” Kag nagtaliwan si Urias gikan sa balay sang hari, kag nagsonod sa iya ang isa ka dolot nga pagkaon gikan sa hari.

9Apang si Urias nagtolog sa ganhaan sang balay sang hari upud sang tanan nga alagad sang iya ginoo, kag wala magdulhog sa iya balay.

10Sang ginsugiran nila si David, “Si Urias wala magdulhog sa iya balay,” si David nagsiling kay Urias, “Wala ka bala maghalin sa panlakatan? Ngaa bala nga wala ka magdulhog sa imo balay?”

11Si Urias nagsiling kay David, “Ang kaban kag ang Israel kag ang Juda nagapuyo sa mga payag; kag ang akon ginoo nga si Joab kag ang mga alagad sang akon ginoo, nagpahamtang sing dologan sa wayang; magasulud ako bala sa akon balay, sa pagkaon kag pag-inum, kag sa paghulid sa akon asawa? Sa nagakabuhi ka, kag sa nagakabuhi ang imo kalag, indi ako maghimo sini nga butang.”

12Niyan si David nagsiling kay Urias, “Pabilin ka diri karon nga adlaw man, kag buwas palakton ko ikaw.” Gani nagpabilin si Urias sa Jerusalem sadto nga adlaw, kag sa madason nga adlaw.

13Kag sang ginpatawag sia ni David, nagkaon kag nag-inum sia sa atubang niya, kag ginhobog niya sia; kag sa pagkagab-i naggowa sia sa paghigda sa iya higdaan upud sang mga alagad sang iya ginoo, apang wala magdulhog sa iya balay.

14Sa pagkaaga nagsulat si David kay Joab sing sulat, kag ginpadala ini sa kamut ni Urias.

15Ginsulat niya sa sulat, “Ibutang ninyo si Urias sa atubang gid sang inaway nga malapuyot, kag bayaan ninyo sia, agud nga maigo sia, kag mapatay.”

16Kag sang si Joab nagbantay sang banwa, ginbutang niya si Urias sa duug nga nahibaloan niya didto ang mga tawo nga isganan.

17Kag naggowa ang mga tawo sang banwa kag nagpakig-away kay Joab; kag nagkalapukan ang iban sang mga tawo nga mga alagad ni David. Si Urias nga Hethanon napatay man.

18Niyan si Joab nagpadala kag nagsugid kay David sang tanan nga butang nahanungud sang inaway;

19kag nagtogon sia sa manugbalita, “Kon makatapus ka sa pagsugid sa hari sang tanan nga butang nahanungud sang inaway,

20niyan, kon mag-ibwal ang kaakig sang hari, kag magsiling sia sa imo, ‘Ngaa bala nga nagpalapit gid kamo sa banwa sa pagpakig-away? Wala bala kamo makahibalo nga magapana sila gikan sa kuta?

21Sin-o bala ang nagpatay kay Abimelec nga anak ni Jerubeset? Wala bala paghologi sia sang isa ka babayi gikan sa kuta sang naibabaw nga bato sang galingan, sa bagay nga napatay sia sa Tebez? Ngaa bala nga nagpalapit gid kamo sa kuta?’ niyan magsiling ka, ‘Ang imo alagad nga si Urias nga Hethanon napatay man.’”

22Gani naglakat ang manugbalita, kag nag-abut kag nagpahayag kay David sang tanan nga ginpadalhan sa iya ni Joab.

23Ang manugbalita nagsiling kay David, “Naglandas sa amon ang mga tawo, kag naggowa sa amon sa latagon; apang ginsalakay namon sila tubtub sa salamputan sang gawang.

24Niyan ang mga manugpana nagpana sa imo mga alagad kutub sa kuta; kag ang iban sang mga alagad sang hari napatay; kag ang imo alagad nga si Urias nga Hethanon napatay man.”

25Niyan si David nagsiling sa manugbalita, “Amo ini ang isiling mo kay Joab, ‘Indi ini magpaluya sa imo, kay ang espada nagalamon sang isa subong man sang isa; baskuga ang imo pag-away batok sa banwa, kag laglaga sia.’ Kag paisuga sia.”

26Sang nakabati ang asawa ni Urias nga ang iya bana nga si Urias napatay, naghaya sia tungud sang iya bana.

27Kag sang natapus ang lalaw, si David nagpasogo kag ginpakuha sia pauli sa iya balay, kag sia nangin-iya asawa, kag nag-anak sa iya sing lalaki. Apang ang butang nga nahimo ni David nagpaakig sa Ginoo.

← Chapter 10 Jump to: Chapter 12 →