2 Samuel 24

Ilonggo (Ang Biblia (1982))

← Chapter 23 Jump to:

1Liwat ang kaakig sang Ginoo nagdabdab batok sa Israel, kag gintandug niya si David batok sa ila, nga nagasiling, “Lakat ka, isipa ang Israel kag Juda.”

2Gani nagsiling ang hari kay Joab nga pangolo sang kasoldadosan, nga nag-upud sa iya, “Libura karon ang tanan nga kabikahan sang Israel, kutub sa Dan tubtub sa Beer-seba, kag isipa ninyo ang katawohan, agud nga ako makahibalo sang kabilogan sang katawohan.”

3Apang si Joab nagsiling sa hari, “Ang Ginoo nga imo Dios magadugang sa imo katawohan bisan daw ano kadamu sila sing isa ka gatus ka pilo, kag kabay nga makita ini sang mga mata sang akon ginoo nga hari; apang ngaa bala nga ang akon ginoo nga hari nahamuut sini nga butang?”

4Apang ang polong sang hari naglandas batok kay Joab kag batok sa mga pangolo sang kasoldadosan. Gani si Joab kag ang mga pangolo sang kasoldadosan naggowa gikan sa atubang sang hari sa pag-isip sang katawohan sang Israel.

5Nagtabok sila sang Jordan, kag nagpahamtang sing dologan sa Aroer, sa too sang banwa nga yara sa tunga sang nalupyakan sang Gad kag tubtub sa Jazer.

6Niyan nag-abut sila sa Galaad, kag sa duta sang Tatim-hodsi; kag nag-abut sila sa Dan-jaan, kag palibut pa Sidon,

7kag nag-abut sa pamakud sang Tiro kag sa tanan nga banwa sang mga Hevhanon kag sang mga Canaanhon; kag naggowa sila sa bagatnan sang Juda sa Beer-seba.

8Gani sang nalibud nila ang bug-os nga duta, nag-abut sila sa Jerusalem sa tapus sang siam ka bulan kag duha ka pulo ka adlaw.

9Kag si Joab nagtugyan sang kabilogan sang pag-isip sang katawohan sa hari: sa Israel may walo ka gatus ka libo ka lalaki nga isganan nga naggabut sang espada, kag ang mga tawo sang Juda lima ka gatus ka libo ka lalaki.

10Apang sang naisip na ni David ang katawohan ginsuntok sia sang iya tagiposoon. Kag si David nagsiling sa Ginoo, “Ako nakasala sing daku sang nahimo ko. Apang karon, O Ginoo, nagapakilooy ako sa imo, isikway ang kalautan sang imo alagad; kay ako nakahimo sing binuang gid.”

11Kag sang nagbangon si David sang pagkaaga, nag-abut ang polong sang Ginoo kay Gad nga manalagna, nga manugpanan-aw ni David, nga nagasiling,

12“Lakat kag magpamolong kay David, ‘Amo ini ang ginasiling sang Ginoo, Tatlo ka butang ang ginatanyag ko sa imo; magpili ka sing isa sa ila, nga akon himoon sa imo.’”

13Gani nagkadto si Gad kay David kag nagsugid sa iya, kag nagsiling sa iya, “Magaabut bala sa imo ang pito ka tuig nga gutum sa imo duta? Ukon magapalagyo ka sa atubang sang imo kaaway sing tatlo ka bulan samtang sila nagalagas sa imo? Ukon may tatlo bala ka adlaw nga kamatay sa imo duta? Karon binagbinagon mo, kag patugsilingan kon ano nga sabat ang ibalik ko sa nagpadala sa akon.”

14Niyan si David nagsiling kay Gad, “Yari ako sa daku nga ital-ital; itugut nga kami maholog karon sa kamut sang Ginoo, kay ang iya mga kalooy dalagku; apang indi pag-itugut nga ako maholog sa kamut sang tawo.”

15Gani ang Ginoo nagpadala sing kamatay sa Israel kutub sa aga tubtub sa tion nga pinat-ud; kag may nagkalamatay sa katawohan kutub sa Dan tubtub sa Beer-seba nga kapitoan ka libo ka tawo.

16Kag sang pag-untay sang manugtunda sang iya kamut nayon sa Jerusalem sa paglaglag sini, ang Ginoo nagpangalisud sang malaut, kag nagsiling sa manugtunda nga naglaglag sang katawohan, “Tuman na; karon idolog ang imo kamut.” Kag ang manugtunda sang Ginoo yara sa luyo sang linasan ni Arauna nga Jebusnon.

17Niyan si David nagpamolong sa Ginoo sang nakita niya ang manugtunda nga nagpamatay sang katawohan, kag nagsiling, “Yari karon, ako nakasala, kag nakahimo sing binalingag; apang ining mga carnero, ano bala ang nahimo nila? Ginaampo ko sa imo, manginbatok sa akon ang imo kamut kag batok sa balay sang akon amay.”

18Kag si Gad nag-abut kay David sadtong adlaw, kag nagsiling sa iya, “Taklad ka, patindug sing halaran sa Ginoo sa linasan ni Arauna nga Jebusnon.”

19Gani nagtaklad si David sono sa ginasiling ni Gad, subong sang ginsogo sang Ginoo.

20Kag naglantaw si Arauna, kag nakita ang hari kag ang iya mga alagad nga nagapakara sa iya; kag naggowa si Arauna, kag nagyaub sia nga nagahapa sa duta sa atubang sang hari.

21Kag si Arauna nagsiling, “Ngaa bala nagkari ang akon ginoong hari sa iya alagad?” Kag si David nagsiling, “Sa pagbakal sa imo sing linasan, nga patindugan sing halaran sa Ginoo, agud nga ang kamatay magtonong gikan sa katawohan.”

22Niyan si Arauna nagsiling kay David, “Magkuha kag magdolot ang akon ginoong hari sang maayo sa iya; yari ang mga baka nga sa halad-nga-sinonog, kag ang mga gamit sa paglinas kag ang mga gota sang mga baka nga sa gatong.

23Ini tanan, O hari, ginahatag ni Arauna sa hari.” Kag si Arauna nagsiling sa hari, “Ang Ginoo nga imo Dios magkahamuut sa imo.”

24Apang ang hari nagsiling kay Arauna, “Indi, kondi sa pagkamatuud baklon ko ini sa imo sa bili; indi ako magdolot sa Ginoo nga akon Dios sing halad-nga-sinonog nga walay bili sa akon.” Gani ginbakal ni David ang linasan kag ang mga baka sa kalim-an ka siklo nga pilak.

25Kag nagpatindug didto si David sing halaran sa Ginoo, kag nagdolot sing mga halad-nga-sinonog kag mga halad-sa-paghidait. Gani ang Ginoo napakilooyan tungud sa duta, kag nagtonong ang kamatay gikan sa Israel.

← Chapter 23 Jump to: