2 Samuel 17

Ilonggo (Ang Biblia (1982))

← Chapter 16 Jump to: Chapter 18 →

1Labut pa si Ahitofel nagsiling kay Absalom, “Tuguti ako nga magpili karon sing napulog duha ka libo ka tawo, kag magtindug ako kag maglagas kay David sini nga gab-i.

2Malambut ko sia samtang sia lapyo kag maluya sing mga kamut, kag pahadlukon sia; kag ang bug-os nga katawohan nga nagaupud sa iya magapalagyo. Patyon ko ang hari lamang,

3kag pabalikon ko ang bug-os nga katawohan sa imo. Ang tawo nga imo ginapangita subong nga daw nagbalik sila tanan, gani ang bug-os nga katawohan magalinong.

4Kag ang pinamolong nagpahamuut sing maayo kay Absalom kag sa tanan nga tigulang sang Israel.

5Niyan si Absalom nagsiling, “Tawga man karon si Husai nga Arquinhon, kag mamati man kita sang iya ginasiling.”

6Kag sang pag-abut ni Husai kay Absalom, nagpamolong si Absalom sa iya, “Si Ahitofel nagpamolong sono sini nga bagay; magahimo kita bala sono sa iya ginasiling? Kon indi, pamolong ka.”

7Niyan si Husai nagsiling kay Absalom, “Ang laygay nga ginhatag ni Ahitofel sini nga tion indi maayo.”

8Labut pa nagsiling si Husai, “Ikaw nakahibalo nga ang imo amay kag ang iya mga tawo mga tawo nga gamhanan, kag mapait sa kalag, subong sang oso nga ginkuhaan sang iya mga totoy sa latagon. Labut pa, ang imo amay tawo sa inaway; indi magpabilin sa katawohan.

9Yari karon, sia nagapanago karon sa isa ka boho, ukon sa iban nga duug. Kag kon ang iban sa ila mapukan sa kamunoan, ang bisan sin-o nga makabati sini magasiling, ‘May pagpamatay sa mga tawo nga nagasonod kay Absalom.’

10Niyan bisan ang maisug, nga ang iya tagiposoon subong sang tagiposoon sang leon, magakatunaw sing bug-os; kay ang bug-os nga Israel nakahibalo nga ang imo amay tawo nga gamhanan, kag ang mga nagaupud sa iya mga tawo nga isganan.

11Apang nagalaygay ako nga ang bug-os nga Israel magtipon sa imo, kutub sa Dan tubtub sa Beer-seba, sa kadamuon subong sang balas nga yara sa baybayon sang dagat, kag nga ikaw imo sa kaugalingon magkadto sa inaway.

12Gani magalambut kita sa iya sa duug diin sia masapwan, kag magatupa kita sa iya subong sang pagtolo sang ton-og sa duta; kag sa iya kag sa tanan nga tawo nga nagaupud sa iya wala kita sing ibilin bisan isa lamang.

13Kon magdangup sia sa isa ka banwa, niyan ang bug-os nga Israel magadala sing mga kalat sa sadto nga banwa, kag guyuron naton ini pakadto sa suba, tubtub nga wala sing makita didto bisan isa ka diotay nga bato.”

14Kag si Absalom kag ang tanan nga tawo sang Israel nagsiling, “Ang laygay ni Husai nga Arquinhon maayo pa sang laygay ni Ahitofel.” Kay ang Ginoo nagtangdo sa paglutus sang maayo nga laygay ni Ahitofel, sa katuyoan nga ang Ginoo makadala sing malaut kay Absalom.

15Niyan si Husai nagsiling kay Sadoc kag kay Abiatar nga mga sacerdote, “Amo ini kag amo ini ang ginlaygay ni Ahitofel kay Absalom kag sa mga tigulang sang Israel; kag amo ini kag amo ini ang ginlaygay ko.

16Busa karon padala ka sa madali kag sugiri si David, ‘Dili ka magpabilin sini nga gab-i sa mga obogan sang kamingawan, kondi magtabok ka gid nga mas-a; basi nga ang hari lamonon kag ang bug-os nga katawohan nga nagaupud sa iya.’”

17Karon si Jonatan kag si Ahimaaz yara sila sa En-rogel; ang isa ka alagad nga babayi nagkadto kag nagasugid sa ila sing masami, kag nagkadto sila kag nagsugid kay Hari David; kay indi sila dapat makita sa pagsulud sa banwa.

18Apang nakita sila sang isa ka bata nga lalaki, kag nagsugid kay Absalom; gani naglakat sila nga duha sing dali-dali, kag nag-abut sa balay sang isa ka tawo sa Bahurim, nga may bobon sa iya luwang; kag nagpanaug sila didto.

19Kag ang babayi nagkuha kag naghumlad sing italabon sa ibabaw sang baba sang bobon, kag ginkay-agan sa ibabaw sing uyas nga ginuma; kag wala mahibaloi.

20Sang nag-abut ang mga alagad ni Absalom sa babayi sa balay, nagsiling sila, “Diin bala si Ahimaaz kag si Jonatan?” Kag ang babayi nagsiling sa ila, “Nakatabok na sila sa sapa sang tubig.” Kag sang ginpangita sila kag wala makita sila, nagpauli sila sa Jerusalem.

21Sang nakataliwan na sila, naggowa ang mga tawo sa bobon, kag naglakat kag nagsugid kay Hari David. Nagsiling sila kay David, “Tindug kamo, kag magdalidali sa pagtabok sa tubig; kay amo ini ang ginlaygay ni Ahitofel batok sa inyo.”

22Niyan si David nagtindug, kag ang bug-os nga katawohan nga nagaupud sa iya, kag nagtabok sila sa Jordan; sang pagpamanagbanag wala sing bisan isa nga nakulang sa ila nga wala makatabok sa Jordan.

23Sang nakita ni Ahitofel nga wala pagsonda ang iya laygay, nagsiya sia sang iya asno, kag nagtindug kag nagpauli sa iya balay sa iya kaugalingon nga banwa. Kag ginpahamtang niya sing nagakaigo ang iya panimalay, kag nagbitay sang iya kaugalingon; kag napatay sia, kag ginlubung sa lulubngan sang iya amay.

24Niyan si David nag-abut sa Mahanaim. Kag si Absalom nagtabok sa Jordan sia kag ang tanan nga tawo sang Israel upud sa iya.

25Karon si Absalom nagpadumala kay Amasa sa kasoldadosan sa tal-us ni Joab. Si Amasa anak sang tawo nga ginhingalanan Itra nga Israelnon, nga naghiusa kay Abigal nga babayi nga anak ni Nahas, babayi nga utud ni Sarvia, iloy ni Joab.

26Kag ang Israel kag si Absalom nagpahamtang sing dologan sa duta sang Galaad.

27Sang pag-abut ni David sa Mahanaim, si Sobi nga anak ni Nahas sang Raba gikan sa mga anak ni Amon, kag si Maquir nga anak ni Ameil sang Lo-debar, kag si Barsilai nga Galaadnon sang Rogelim,

28nagdala sing mga higdaan, mga batiya, kag mga suludlan nga daga, trigo, sebada, binukbuk, uyas nga sinanlag, mga liso nga kulusiparon kag mga lentejas kag mga sinanlag,

29dugus kag latab kag mga carnero kag keso gikan sa kabakahan, nga kaonon ni David kag sang katawohan nga nag-upud sa iya; kay nagsiling sila, “Ang katawohan nagutum kag lapyo kag nauhaw sa kamingawan.”

← Chapter 16 Jump to: Chapter 18 →