2 Samuel 16

Ilonggo (Ang Biblia (1982))

← Chapter 15 Jump to: Chapter 17 →

1Sang si David nakaligad sing diotay sa putokputokan sang taklaran, si Siba nga alagad ni Mefiboset nagsugata sa iya, upud sang duha ka asno nga nasiyahan, nga sa ila may duha ka gatus ka bilog nga tinapay, isa ka gatus ka pinungpung nga pasas, isa ka gatus nga bunga sa tingadlaw, kag isa ka suludlan nga panit nga alak.

2Kag ang hari nagsiling kay Siba, “Ano bala ang buut mo isiling sini?” Si Siba nagsabat, “Ang mga asno salakyan sang panimalay sang hari, ang tinapay kag ang mga bunga sa tingadlaw kalan-on sang mga pamatan-on nga lalaki, kag ang alak agud nga mainum sang mga napunaw sa kamingawan.”

3Kag ang hari nagsiling, “Kag diin bala ang anak nga lalaki sang imo agalon?” Si Siba nagsiling sa hari, “Yari karon, nagapabilin sia sa Jerusalem; kay nagsiling sia, ‘Karon nga adlaw igauli sa akon sang panimalay sang Israel ang ginharian sang akon amay.’”

4Niyan ang hari nagsiling kay Siba, “Yari karon, mangin-imo ang tanan nga naigo kay Mefiboset.” Kag si Siba nagsiling, “Ako nagayaub; manginkalahamut-an ako sa imo itololok, O hari nga akon ginoo.”

5Sang nag-abut si Hari David sa Bahurim, naggowa gikan didto ang isa ka tawo sang panimalay sang balay ni Saul, nga ginhingalanan Simei, ang anak ni Gera; kag nagpakamalaut sia sing dalayon sa pag-abut niya.

6Kag naghaboy sia sing mga bato kay David, kag sa tanan nga alagad ni Hari David; kag ang tanan nga katawohan kag ang tanan nga gamhanan nga tawo yara sa iya too kag sa iya wala.

7Kag amo ini ang ginsiling ni Simei sang nagpakamalaut sia, “Palayo, palayo, ikaw nga lalaki nga dugoon, hanginon nga tawo!

8Ang Ginoo nagpabalik sa imo sang tanan nga dugo sa balay ni Saul, nga naghari ka sa tal-us niya; kag ang Ginoo nagtugyan sang ginharian sa kamut sang imo anak nga si Absalom. Yari karon, nadakup ka sa imo kaugalingon nga kalain; bangud nga tawo ka nga dugoon.”

9Niyan si Abisai nga anak ni Sarvia nagsiling sa hari, “Ngaa bala nga magpakamalaut ini nga patay nga ido sa akon ginoo nga hari? Pakadto-a ako kag punggolon ko ang iya olo.”

10Apang ang hari nagsiling, “Ano bala ang labut ko sa inyo, kamo nga mga anak ni Sarvia? Kon nagapakamalaut sia bangud nga ang Ginoo nagsiling sa iya, ‘Pakamalauta si David,’ sin-o bala niyan ang magasiling, ‘Ngaa bala ginhimo mo ang subong?’”

11Kag si David nagsiling kay Abisai kag sa tanan niya nga alagad, “Yari karon, ang akon anak, nga naggowa sa akon mga kasudlan nagatinguha sang akon kabuhi; daw ano pa gid bala karon ang himoon sini nga Benjaminhon! Pabayai sia, kag papakamalauta sia; kay ang Ginoo nagsogo sa iya.

12Ayhan ang Ginoo magtamud sa sayup nga ginhimo sa akon, kag balusan ako sang Ginoo sing maayo tungud sang pagpakamalaut sa akon ni Simei sini nga adlaw.”

13Gani si David kag ang iya mga tawo naglakat sa dalanon, samtang si Simei nag-ubay sa kilid sang bakolod sa atubang nila kag sang naglakat nagpakamalaut, kag naghaboy sing mga bato sa iya kag nagsabwag sing yab-ok.

14Kag ang hari, kag ang bug-os nga katawohan nga upud niya, nag-abut nga lapyo; kag nagpaumpaw sia iya didto.

15Karon si Absalom kag ang bug-os nga katawohan, ang mga lalaki sang Israel, nagsulud sa Jerusalem, kag upud sa iya si Ahitofel.

16Kag sang si Husai nga Aquinhon, abyan ni David, nag-abut kay Absalom, nagsiling si Husai kay Absalom, “Mabuhi ang hari! Mabuhi ang hari!”

17Kag si Absalom nagsiling kay Husai, “Kalolo mo bala ini sa imo abyan? Ngaa bala nga wala ka mag-upud sa imo abyan?”

18Kag si Husai nagsiling kay Absalom, “Indi; kay ang ginpili sang Ginoo kag sini nga katawohan kag sang tanan nga tawo sang Israel, mangin-iya ako, kag sa iya magapabilin ako.

19Kag liwat, sin-o bala ang akon alagdon? Indi bala sa atubang sang iya anak? Subong nga nakaalagad ako sa atubang sang imo amay, manginsubong ako sa imo atubang.”

20Niyan si Absalom nagsiling kay Ahitofel, “Ihatag ang imo laygay; ano ang aton himoon?”

21Si Ahitofel nagsiling kay Absalom, “Hiusa ka sa mga babayi sang imo amay, nga ginbilin niya sa pagbantay sang balay; kag ang bug-os nga Israel makabati nga ginkangil-aran ka sang imo amay, niyan magabakud ang mga kamut sang tanan nga nagaupud sa imo.”

22Gani naghumlad sila sing layanglayang nga kay Absalom sa ibabaw sang atop; kag si Absalom naghiusa sa mga babayi sang iya amay sa itololok sang bug-os nga Israel.

23Karon ang laygay ni Ahitofel nga ginhatag niya sadto nga mga adlaw subong nga nagapamangkot ang tawo sa polong sang Dios; amo ini ang tanan nga laygay ni Ahitofel, kay David kag kay Absalom.

← Chapter 15 Jump to: Chapter 17 →