2 Samuel 18

Ilonggo (Ang Biblia (1982))

← Chapter 17 Jump to: Chapter 19 →

1Niyan si David nag-isip sang katawohan nga nag-upud sa iya, kag nagbutang sing mga pangolo sang linibo kag mga pangolo sang ginatus.

2Kag ginpadala ni David ang katawohan, ang ikatlo nga bahin sa idalum sang kamut ni Joab, kag ang isa ka ikatlo nga bahin sa idalum sang kamut ni Abisai nga anak ni Sarvia, utud ni Joab, kag ang isa ka ikatlo nga bahin sa idalum sang kamut ni Itai nga Githanon. Kag ang hari nagsiling sa katawohan, “Ako gid magagowa man upud sa inyo.”

3Apang ang katawohan nagsiling, “Dili ka maggowa. Kay kon kami malagyo, indi sila magsapak sa amon. Kon ang katunga sa amon mapatay, indi sila magsapak sa amon. Apang ikaw timbang sing napulo ka libo sa amon; busa karon maayo pa nga maghanda ka sa pagbulig sa amon sa luwas sang banwa.”

4Ang hari nagsiling sa ila, “Himoon ko ang maayo gid sa inyo.” Gani nagtindug ang hari sa luyo sang gawang, samtang naggowa ang bug-os nga katawohan sa ginatus kag sa linibo.

5Kag ang hari nagsogo kay Joab kag kay Abisai kag kay Itai, “Dalhi ninyo sing kahumok tungud sa akon ang pamatan-on nga si Absalom.” Kag ang bug-os nga katawohan nakabati sang nagtugon ang hari sa tanan nga pangolo nahanungud kay Absalom.

6Gani naggowa ang katawohan sa latagon batok sa Israel; kag ang inaway yara sa kagulangan sang Efraim.

7Kag ang katawohan sang Israel ginlaglag didto sa atubang sang mga alagad ni David kag may daku nga pagpamatay didto sang duha ka pulo ka libo ka tawo sadto nga adlaw.

8Ang inaway didto naglapnag sa bug-os nga kadaygan sang duta; kag ang kagulangan naghalunhon sing madamu pa nga katawohan sang sa ginhalunhon sang espada.

9Kag natapangan ni Absalom ang mga alagad ni David. Si Absalom nagsakay sa iya mula kag ang mula nagsuhot sa masiot nga daku nga terebinto, kag nasangit ang olo ni Absalom sa terebinto, kag nagkabit sia sa tunga sang langit kag duta, kag ang mula nga iya ginasakyan nagpadayon.

10Kag nakita ini sang isa ka tawo, kag nagsugid kay Joab, “Yari karon, nakita ko si Absalom nga nagakabit sa terebinto.”

11Si Joab nagsiling sa tawo nga nagsugid sa iya, “Yari karon, nakita mo ini! Ngaa nga wala mo sia pagpatya didto nga maholog sa duta? Nahatagan ko ikaw kuntani sing napulo ka bilog nga pilak kag isa ka wagkus.”

12Apang ang tawo nagsiling kay Joab, “Bisan magbaton ako sing isa ka libo ka bilog nga pilak sa akon kamut, apang indi ko gid pag-untayon ang akon kamut batok sa anak sang hari; kay sa aton palamatin-an nagtugon ang hari sa imo kag kay Abisai kag kay Itai, ‘Mag-andam nga wala sing magtandug sa pamatan-on nga si Absalom.’

13Sa isa ka bagay, kon ako nagluib sa iya kabuhi (kag sa hari wala sing butang nga matago), niyan ikaw gid magsiling batok sa akon.”

14Si Joab nagsiling, “Indi ako magpaawat sing subong upud sa imo.” Kag nagdala sia sing tatlo ka bangkaw sa iya kamut, kag ginbuno ini sila sa tagiposoon ni Absalom, sang buhi pa sia sa tunga sang terebinto.

15Kag ginlibutan sia sang napulo ka pamatan-on, nga nagdala sang hinganib ni Joab, kag ginlabo si Absalom, kag ginpatay sia.

16Niyan si Joab nagpatonog sang budyong, kag ang katawohan nagbalik gikan sa paglagas sang Israel; kay si Joab nagpugung sang katawohan.

17Kag ginkuha nila si Absalom, kag ginholog sia sa daku nga boho sa kagulangan, kag tampokan sa ibabaw niya sing daku gid nga tinumpok nga mga bato; kag ang bug-os nga Israel nagpalagyo ang tagsatagsa sa iya layanglayang.

18Karon si Absalom sa iya pagkabuhi nagkuha kag nagpatindug nga sa iya sing haligi nga handumanan nga yara sa Nalupyakan sang Hari, kay nagsiling sia, “Ako wala sing anak nga magtipig sang handumanan sang akon ngalan”; gintawag niya ang haligi sa iya kaugalingon nga ngalan, kag gintawag ini nga monumento ni Absalom tubtub sini nga adlaw.

19Niyan si Ahimaaz nga anak ni Sadoc nagsiling, “Tuguti ako karon nga magdalagan, kag magdala sing mga balita sa hari kon paano nga ang Ginoo nagtimalus sa iya mga kaaway.”

20Kag si Joab nagsiling sa iya, “Sini nga adlaw dili ka magdala sing mga balita; kondi magdala ka sing mga balita sa iban nga adlaw, apang sini nga adlaw dili ka magdala sing mga balita, bangud nga ang anak sang hari napatay.”

21Niyan si Joab nagsiling sa Cushanon, “Lakat, sugiri ang hari sang nakita mo.” Ang Cushanon nagyaub kay Joab, kag nagdalagan.

22Niyan si Ahimaaz nga anak ni Sadoc nagsiling liwat kay Joab, “Bisan magkaano, padalagana man ako sa olihi sang Cushanon.” Kag si Joab nagsiling, “Anak ko, ngaa bala madalagan ka, sa ginatan-aw nga wala ka sing balus tungud sa mga balita?”

23“Bisan magkaano, ako magadalagan.” Gani sia nagsiling sa iya, “Dalagan.” Niyan nagdalagan si Ahimaaz sa dalanon sang kapatagan, kag nalumba-an ang Cushanon.

24Karon si David nagalingkod sa ulut sang duha ka gawang; kag ang manugbantay nagsaka sa atop sang gawang sa kuta, kag sang nagbayaw sang iya mga mata kag naglantaw, nakita niya ang tawo nagadalagan nga isa lamang.

25Kag ang manugbantay nagsinggit kag nagsugid sa hari. Kag ang hari nagsiling, “Kon isa lamang sia, may mga balita sa iya baba.” Kag nagdasigdasig sia, kag nagpalapit.

26Kag ang manugbantay nakakita sing isa pa ka tawo nga nagadalagan; kag ang manugbantay nagpanawag sa bantay sang gawang kag nagsiling, “Yari karon, isa pa ka tawo nga nagadalagan nga isa lamang!” Ang hari nagsiling, “Sia man nagadala sing mga balita.”

27Kag ang manugbantay nagsiling, “Banta ko ang pagdalagan sang nahauna kaangay sang pagdalagan ni Ahimaaz nga anak ni Sadoc.” Kag nagsiling ang hari, “Sia tawo nga maayo, kag nagaabut nga may maayo nga mga balita.”

28Niyan si Ahimaaz nagtawag sa hari, “Ang tanan maayo.” Kag nagyaub sia sa duta sa atubangan sang hari, kag nagsiling, “Dalayawon ang Ginoo nga imo Dios, nga nagtugyan sang mga tawo nga nagbayaw sang ila kamut batok sa akon ginoo nga hari.”

29Kag ang hari nagsiling, “Maayo bala sa pamatan-on nga si Absalom?” Si Ahimaaz nagsabat, “Sang si Joab nagpadala sang alagad sang hari, bisan ako nga imo alagad, nakita ko ang daku nga kinagubut, apang wala ako makahibalo kon ano yadto.”

30Kag ang hari nagsiling, “Pahigad ka, kag tindug diri.” Gani sia nagpahigad, kag nagpahimonong.

31Kag yari karon, ang Cushanon nag-abut; kag ang Cushanon nagsiling, “Mga balita tungud sa akon ginoo nga hari! Kay ang Ginoo nagtimalus nga sa imo sini nga adlaw sa tanan nga nagtindug batok sa imo.”

32Ang hari nagsiling sa Cushanon, “Maayo bala sa pamatan-on nga si Absalom?” Kag ang Cushanon nagsabat, “Ang mga kaaway sang akon ginoo nga hari, kag ang tanan nga nagtindug batok sa imo sa pagdaut sa imo, manginsubong sadto nga pamatan-on.”

33Kag ang hari natandug gid, kag nagsaka sa hulut sa ibabaw sang gawang, kag naghibi; kag sang naglakat sia, nagsiling sia, “O anak ko nga Absalom, anak ko, anak ko nga Absalom! Kabay pa kuntani nga ako napatay tungud sa imo, O Absalom, anak ko, anak ko!”

← Chapter 17 Jump to: Chapter 19 →