2 Samuel 7

Ilonggo (Ang Biblia (1982))

← Chapter 6 Jump to: Chapter 8 →

1Karon sang nagpuyo ang hari sa iya balay, kag ang Ginoo nakahatag sa iya sing pahuway gikan sa tanan niya nga mga kaaway palibut,

2ang hari nagsiling kay Natan nga manalagna, “Tan-awa karon, ako nagapuyo sa balay nga cedro, apang ang kaban sang Dios nagapuyo sa sulud sang mga kumbung.”

3Kag si Natan nagsiling sa hari, “Lakat, himoa ang tanan nga yara sa imo tagiposoon; kay ang Ginoo nagaupud sa imo.”

4Apang sa amo nga gab-i ang polong sang Ginoo nag-abut kay Natan,

5“Lakat kag silinga ang akon alagad nga si David, ‘Amo ini ang ginsiling sang Ginoo: Patindugan mo bala ako sing balay nga akon puy-an?

6Wala ako makapuyo sa balay kutub sang adlaw nga ginpataklad ko ang katawohan sang Israel gikan sa Egipto tubtub sini nga adlaw, kondi naglakat sa layanglayang kag sa kayangkayang.

7Sa tanan nga duug nga ginlaktan ko upud sang tanan nga katawohan sang Israel, nakapamolong ako bala sa bisan isa sang mga kabikahan sang Israel, nga akon ginsogo nga manginmanugpahalab sang akon katawohan nga Israel, nga nagasiling, “Ngaa bala nga wala ninyo ako patindugi sing balay nga cedro?” ’

8Busa karon amo ini ang isiling mo sa akon alagad nga si David, ‘Amo ini ang ginasiling sang Ginoo sang mga kasoldadosan, Ginkuha ko ikaw sa palasudlan sang carnero, gikan sa pagsonod sang mga carnero, agud nga manginprincipe ka sa akon katawohan nga Israel;

9kag nag-upud ako sa imo bisan diin ka magkadto, kag gin-utud ko ang tanan mo nga kaaway gikan sa atubangan mo; kag himoon ko ikaw nga daku nga ngalan, kaangay sa ngalan sang mga dalagku nga yara sa duta.

10Kag magatangdo ako sing duug nga sa akon katawohan nga Israel, kag ako magatanum sa ila, agud nga magpuyo sila sa ila kaugalingon nga duug, kag indi na paghalinon; ukon sakiton pa sila sang mga anak sang pagkamalaut, subong sang sa una,

11subong sang adlaw nga ginsogo ko ang mga hukom sa pagdumala sang akon katawohan nga Israel; kag papahuwayon ko ikaw gikan sa tanan mo nga kaaway. Labut pa ang Ginoo nagasiling sa imo nga himoon ka sang Ginoo nga panimalay.

12Kon ang imo mga adlaw matuman kag magtolog ka upud sa imo mga ginikanan, bangonon ko ang imo kaliwat sa olihi nimo, nga magagikan sa imo mga kasudlan, kag palig-onon ko ang iya ginharian.

13Sia magapatindug sing balay sa akon ngalan, kag palig-onon ko ang trono sang iya ginharian sing dayon.

14Ako mangin-amay niya, kag sia mangin-anak nakon. Kon maghimo sia sing kalautan, magasilot ako sa iya sa bilogon sang mga tawo, sa mga lapdus sang mga anak sang mga tawo;

15apang ang akon malig-on nga paghigugma indi magtaliwan sa iya, subong nga ginkuha ko ini kay Saul, nga ginsikway ko sa atubangan mo.

16Kag ang imo panimalay kag ang imo ginharian papag-onon sing dayon sa atubang mo; ang imo trono palig-onon sing dayon.’”

17Sono sa tanan sini nga polong, kag sono sa bug-os sini nga palanan-awon, amo ang ginpamolong ni Natan kay David.

18Niyan si David nga hari nagsulud kag naglingkod sa atubang sang Ginoo, kag nagsiling sia, “Sin-o bala ako, O Ginoong Dios, kag ano bala ang akon panimalay, nga gindala mo ako tubtub sa amo ini?

19Kag ini butang nga diotay pa sa imo mga mata, O Ginoong Dios; apang ikaw nagpamolong man nahanungud sang panimalay sang imo alagad sa malayo pa nga palaabuton, kag ini pa sono sa batasan sang mga tawo, O Ginoong Dios!

20Kag ano pa bala ang ikasiling ni David sa imo? Kay nakakilala ikaw sang imo alagad, O Ginoong Dios!

21Tungud sang imo polong, kag sono sa imo tagiposoon, nahimo mo ini nga bug-os nga pagkadaku, sa pagpakilala sang imo alagad sini.

22Busa daku ka, O Ginoong Dios; kay wala sing kaangay sa imo, ukon may iban nga Dios luwas sa imo, sono sa tanan nga amon nabatian sang amon mga idulungug.

23Ano bala nga isa ka pungsud sa duta ang kaangay sa imo katawohan nga Israel, nga ginkadtoan sang Dios sa pagtubus nga sa iya nga isa ka katawohan, sa paghimo sa iya sing ngalan, kag sa paghimo sini nga dalagku nga mga butang tungud sa imo kag makakulugmat nga mga butang tungud sa imo duta sa atubang sang imo katawohan nga imo gintubus sa imo gikan sa Egipto, gikan sa mga pungsud kag sa ila mga dios?

24Kag ikaw nagpalig-on sa imo sang imo katawohan nga Israel nga manginkatawohan nga sa imo sa gihapon; kag ikaw, O Ginoo, nangin-ila Dios.

25Kag karon, o Ginoong Dios, pamatud-i ini sing dayon ang polong nga imo napamolong nahanungud sa imo alagad kag nahanungud sa iya balay, kag himoa sono sa imo napamolong;

26kag pagpakadakuon ang imo ngalan sa gihapon, nga nagasiling, ‘Ang Ginoo sang mga kasoldadosan amo ang Dios sa ibabaw sang Israel,’ kag ang balay sang imo alagad nga si David manginmalig-on sa atubangan mo.

27Kay ikaw, O Ginoo sang mga kasoldadosan, ang Dios sang Israel, nagpahayag sa imo alagad, nga nagasiling, ‘Ako magapatindug sa imo sing balay’; busa ang imo alagad nakakita sa iya tagiposoon sa pagpangamuyo sini nga pangamuyo sa imo.

28Kag karon, O Ginoong Dios, ikaw ang Dios, kag ang imo mga polong kamatooran, kag ikaw nagsaad sa imo alagad sini nga maayo nga butang;

29busa karon mahamut-an mo ang pagpakamaayo sang balay sang imo alagad, agud nga magpadayon ini sa atubang mo sa gihapon; kay ikaw, O Ginoong Dios, nakapamolong sini, kag sa imo pagpakamaayo pagpakamaayohon ang balay sang imo alagad sa gihapon.”

← Chapter 6 Jump to: Chapter 8 →