2 Samuel 8

Ilonggo (Ang Biblia (1982))

← Chapter 7 Jump to: Chapter 9 →

1Sa tapus sini ginlaglag ni David ang mga Filistinhon kag ginpasakup sila, kag gin-agaw ni David ang busal sang iloy nga banwa gikan sa kamut sang mga Filistinhon.

2Kag gindaug niya ang Moab, kag gintakus sila sang inuglatid, nga ginpahigda sila sa duta; kag nagtakus sia sing duha ka latid nga palatyon, kag isa ka bug-os nga latid nga buhion. Kag ang mga Moabnon nangin-alagad kay David kag nagbuhis.

3Gindaug man ni David si Hadadezer nga anak ni Rehob, hari sang Soba, sang paglakat niya sa pagbawi sang iya ginsakpan sa Soba.

4Kag si David nag-agaw sa iya sing isa ka libo kag pito ka gatus ka mga manugkabayo, kag duha ka pulo ka libo ka hangaway nga nagalakat; kag ginkitinan ni David ang mga kabayo sa mga kangga, apang naghawid gikan sa ila nga sa isa ka gatus ka kangga.

5Kag sang nag-abut ang mga Sirianhon gikan sa Damasco sa pagtabang kay Hadadezer nga hari sang Soba, ginlaglag ni David sa mga Sirianhon ang duha ka pulo kag duha ka libo ka tawo.

6Niyan si David nagbutang sing mga pamakud nga balantayan sa Siria sang Damasco; kag ang mga Sirianhon nangin-alagad kay David kag nagbuhis. Kag ginpadaug sang Ginoo si David sa bisan diin magkadto sia.

7Kag ginkuha ni David ang mga taming nga bulawan nga yara sa mga alagad ni Hadadezer, kag gindala sila sa Jerusalem.

8Kag gikan sa Beta kag sa Berotai, mga banwa ni Hadadezer, nagkuha si Hari David sing lakas kadamu nga saway.

9Sang nakabati si Toi nga hari sang Hamat nga gindaug ni David ang bug-os nga kasoldadosan ni Hadadezer,

10niyan ginpadala ni Toi si Joram nga iya anak nga lalaki kay Hari David, sa pag-abiabi sa iya, kag sa pagpakamaayo sa iya bangud nga nagpakig-away sia kay Hadadezer kag gindaug sia; kay si Hadadezer may mga pagpakig-away kay Toi. Kag si Joram nagdala sing mga suludlan nga pilak, mga suludlan nga bulawan, kag mga suludlan nga saway;

11ini sila man ginhalad ni Hari David sa Ginoo, pati sang pilak kag bulawan nga ginhalad niya gikan sa tanan nga pungsud nga gindaug niya,

12gikan sa Siria, sa Moab, sa mga anak ni Amon, sa mga Filistinhon, sa Amalec, kag sa inagaw kay Hadadezer nga anak ni Rehob, hari sang Soba.

13Kag si David nakaagum nga sa iya sing ngalan. Sang pagbalik niya, ginpamatay niya sa Nalupyakan sang Asin ang napulo kag walo ka libo ka Edomnon.

14Kag nagbutang sia sing mga pamakud nga balantayan sa Edom; sa bug-os nga Edom nagbutang sia sing mga pamakud nga balantayan, kag ang bug-os nga Edomnon nangin-alagad kay David. Kag ginpadaug sang Ginoo si David bisan diin magkadto sia.

15Gani si David naghari sa bug-os nga Israel; kag si David naghimo sang katarungan kag pagkamatarung sa bug-os niya nga katawohan.

16Kag si Joab nga anak ni Sarvia nagpangolo sa kasoldadosan; kag si Josafat nga anak nga lalaki ni Ahilud amo ang manugpahanumdum;

17kag si Zadok nga anak ni Ahitub kag si Ahimelec nga anak ni Abiatar mga sacerdote; kag si Seraya escriba;

18kag si Benaya nga anak ni Joiada, naggahum sa mga Keretnon kag sa mga Peletnon; kag ang mga anak nga lalaki ni David mga sacerdote.

← Chapter 7 Jump to: Chapter 9 →