2 Samuel 6

Ilonggo (Ang Biblia (1982))

← Chapter 5 Jump to: Chapter 7 →

1Si David nagtipon sing tingub liwat sang tanan nga tawo nga pinili sa Israel, katloan ka libo.

2Kag nagtindug si David kag nagkadto upud ang bug-os nga katawohan nga yara sa iya kutub sa Baale-juda, sa pagpataklad gikan didto sang kaban sang Dios, nga gintawag sa Ngalan, sa ngalan sang Ginoo sang mga kasoldadosan nga nagalingkod sa ibabaw sang mga querubin.

3Kag ginlulan nila ang kaban sang Dios sa bag-ong karo, kag gindala ini gikan sa balay ni Abinadab nga yara sa bakolod: kag si Uza kag si Ahio, ang mga anak ni Abinadab, nagpaguyud sang bag-ong karo,

4kag ginkuha nila ini sa balay ni Abinadab nga yara sa bakolod, upud ang kaban sang Dios; kag si Ahio nag-una sa kaban.

5Kag si David kag ang bug-os nga panimalay sang Israel naglanton sa atubangan sang Ginoo sang tanan nga bagay sang mga palatunggon nga kahoy nga abeto kag mga arpa kag mga salterio kag mga panderita kag mga kastanikas kag mga apiping.

6Kag sang pag-abut nila sa linasan ni Nacon, si Uza nag-untay sang iya kamut sa kaban sang Dios kag ginpunggan ini, kay ang mga baka naghublag.

7Kag ang kaakig sang Ginoo nagdabdab batok kay Uza; kag ginlaglag sia didto sang Dios tungud sang iya sayup; kag didto napatay sia sa luyo sang kaban sang Dios.

8Kag si David nagsingkal bangud nga ang Ginoo nagkirab kay Uza; kag ginhingalanan niya yadtong duug Perez-uza, tubtub sining adlaw.

9Kag si David nahadluk sa Ginoo sadtong adlaw; kag nagsiling sia, “Paano bala ang pagkari sa akon sang kaban sang Ginoo.”

10Gani si David indi buut magsaylo sang kaban sang Ginoo sa iya sa banwa ni David; apang ginpahapit ni David sa balay ni Obed-edom nga Githanon.

11Kag nabilin ang kaban sang Ginoo sa balay ni Obed-edom nga Githanon sing tatlo ka bulan; kag ginpakamaayo sang Ginoo si Obed-edom kag ang bug-os niyang panimalay.

12Kag ginsugid ini kay Haring David, “Ginpakamaayo sang Ginoo ang panimalay ni Obed-edom kag ang tanan nga iya, bangud sang kaban sang Dios.” Gani si David nagkadto kag ginpataklad ang kaban sang Dios gikan sa balay ni Obed-edom pakadto sa banwa ni David nga may kalipay;

13kag sang nakalakat sing anum ka tikang ang mga nagadala sang kaban sang Ginoo, naghalad sia sing isa ka baka kag isa ka pinatambok.

14Kag si David nagsaut sa bug-os niya nga kusug sa atubang sang Ginoo; kag si David nasukluban sing efod nga lino.

15Gani si David kag ang bug-os nga panimalay sang Israel nagpataklad sang kaban sang Ginoo nga may sininggit, kag may tonog sang budyong.

16Sang pag-abut sang kaban sang Ginoo sa banwa ni David, si Micol nga babaying anak ni Saul naggawa sa talambuan, kag nakita si Haring David nga nagatumbo kag nagasaut sa atubang sang Ginoo; kag gintamay niya sia sa iya tagiposoon.

17Kag ginpasulud nila ang kaban sang Ginoo, kag ginpahamtang ini sa iya duug, sa tunga sang layanglayang nga ginhumlad sa iya ni David; kag si David nagdolot sing mga halad-nga-sinonog kag mga halad-sa-paghidait sa atubang sang Ginoo.

18Kag sang nakatapus si David sa pagdolot sang mga halad-nga-sinonog kag sang mga halad-sa-paghidait, ginpakamaayo niya ang katawohan sa ngalan sang Ginoo sang mga kasoldadosan,

19kag nagpanagtag sia sa tanan nga katawohan, bisan sa bug-os nga kadam-an sang Israel, tingub ang mga lalaki kag ang mga babayi, sa tagsatagsa isa ka bilog nga tinapay, isa ka hiwa nga unud, kag kalan-onon nga pasas. Gani ang tanan nga katawohan nagpauli, ang tagsatagsa sa iya balay.

20Niyan si David nagpauli sa pagpakamaayo sang iya panimalay. Apang si Micol nga babayi nga anak ni Saul naggowa sa pagsugata kay David, kag nagsiling, “Daw ano kamahimayaon ang hari sang Israel karon nga adlaw, nga nag-uba sang iya kaugalingon karon nga adlaw sa mga mata sang mga ulipon nga babayi sang iya mga alagad, subong sang isa sang mga wala sing pulus nga mga tawo nga nagauba sa wala sing kahuya!”

21Kag si David nagsiling kay Micol, “Yadto sa atubang sang Ginoo, nga nagpili sa akon labaw sa imo amay, kag labaw sa bug-os niya nga panimalay, sa pagtangdo sa akon nga principe sa katawohan sang Ginoo sa Israel—busa magasayaw ako sa atubang sang Ginoo.

22Ako magamalaut pa sang sa sini, kag magakubus sa akon kaugalingon nga itololok; apang sa ulipon nga mga babayi nga ginpamolong mo, sa ila pagapasidunggan ako.”

23Kag si Micol nga babayi nga anak ni Saul wala sing anak tubtub sa adlaw sang iya kamatayon.

← Chapter 5 Jump to: Chapter 7 →