2 Samuel 14

Ilonggo (Ang Biblia (1982))

← Chapter 13 Jump to: Chapter 15 →

1Karon nahantup ni Joab nga anak ni Sarvia nga ang tagiposoon sang hari yara kay Absalom.

2Kag si Joab nagpadala sa Tekoa, kag nagpakuha didto sing isa ka babayi nga maalamon, kag nagsiling sa iya, “Magpakamanuglalaw ka, kag magsuklub sing panapton sa lalaw; dili ka magpanghaplas sing lana, kondi magpakasubong ka sang babayi nga naglalaw sing malawig nga tion tungud sa patay;

3kag magsulud ka sa hari, kag magpamolong sa iya sa sini nga bagay.” Gani ginbutang ni Joab ang mga polong sa iya baba.

4Sang nagpamolong sa hari ang babayi nga Tekoanhon, naghapa sia sa duta, kag nagyaub, kag nagsiling, “Tabang, O hari.”

5Kag ang hari nagsiling sa iya, “Ano bala ang ginabatyag mo?” Nagsabat sia, “Ako sa pagkamatuud balo; kag ang akon bana napatay.

6Kag ang imo ulipon may duha ka anak nga lalaki, kag sila nga duha nag-away sa latagon; wala sing bisan sin-o nga matambag sa ila, apang ginlabo sang isa ang isa kag ginpatay sia.

7Kag karon ang bug-os nga panimalay nagtindug batok sa imo ulipon, kag nagasiling sila, ‘Itugyan ang nagpatay sa iya utud, agud nga mapatay namon sia tungud sa kabuhi sang iya utud nga iya ginpatay’; kag sa amo laglagon ang kaliwat man. Sa sini palongon nila ang akon baga nga nabilin, kag indi magbilin sa akon bana sing ngalan ukon salin sa kadaygan sang duta.”

8Niyan ang hari nagsiling sa babayi, “Pauli ka sa imo balay, kay ako magatugon nahanungud sa imo.”

9Kag ang babayi nga Tekoanhon nagsiling sa hari, “Ginoo ko, O hari, ang kalautan maholog sa akon, kag sa panimalay sang akon amay; kag ang hari kag ang iya lingkoran nga harianon manginwala sing sala.”

10Ang hari nagsiling, “Ang bisan sin-o nga magsiling sing bisan ano sa imo, dalha sia sa akon, kag indi na sia makahilabut sa imo.”

11Niyan nagsiling sia, “Ginaampo ko sa imo ang hari magpanumdum sa Ginoo nga imo Dios, agud nga ang manugtimalus sang dugo indi na maglaglag, basi nga laglagon nila ang akon anak.” Nagsiling sia, “Sa nagakabuhi ang Ginoo, wala sing maholog sa duta nga bisan isa ka bohok sang olo sang imo anak.”

12Niyan ang babayi nagsiling, “Ginaampo ko sa imo pahambala ang imo ulipon sing isa ka polong sa akon ginoo nga hari.” Sia nagsiling, “Isiling.”

13Kag ang babayi nagsiling, “Ngaa bala niyan nga nagapahito ka sing amo nga butang batok sa katawohan sang Dios? Kay sa paghambal sini nga polong ang hari kasubong sang isa nga malinapason, nga ang hari wala magpapauli sang iya tinapok.

14Kita kinahanglan nga mapatay, kag subong sang tubig nga naula sa duta, nga indi na matipon liwat; apang ang Dios wala nagakuha sang kabuhi kondi nagapahito sing kalalangan nga sia nga tinapok indi manginsinikway gikan sa iya.

15Karon sa ginatan-aw nga ako nagkari sa pagpamolong sini nga polong sa akon ginoo nga hari ini bangud nga ang katawohan nagpahadluk sa akon; kag ang imo ulipon nagsiling, ‘Magapamolong ako karon sa hari; ayhan ang hari magahimo sang pangabay sang iya alagad.

16Kay ang hari magapamati, sa pagluwas sang iya alagad gikan sa kamut sang tawo nga buut maglaglag sa akon kag sa akon anak sing tingub gikan sa panublion sang Dios.’

17Niyan ang imo ulipon nagsiling, ‘Ginaampo ko sa imo ang polong sang akon ginoo nga hari manginkalinongan’; kay subong sang manugtunda sang Dios amo ini ang akon ginoo nga hari sa paghibalo sang maayo kag malain. Ang Ginoo nga imo Dios manginkaupud mo!”

18Niyan ang hari nagsabat sa babayi, “Indi pag-ilikum sa akon ang bisan ano nga butang nga akon ipamangkot sa imo.” Kag ang babayi nagsiling, “Magpamolong karon ang akon ginoo nga hari.”

19Ang hari nagsiling, “Upud bala sa imo ang kamut ni Joab sa sini tanan?” Ang babayi nagsabat kag nagsiling, “Sa nagakabuhi ang imo kalag, ginoo ko nga hari, wala sing makalipas sa too ukon sa wala sang bisan ano nga napamolong sang akon ginoo nga hari. Kay ang imo alagad nga si Joab sia nagpangabay sa akon; sia ang nagbutang sa baba sang imo ulipon sini tanan nga polong.

20Sa pagbaylo sang dagway sang butang ginhimo ini ni Joab nga imo alagad. Apang ang akon ginoo maalam sono sa kaalam sang manugtunda sang Dios sa pagkilala sang tanan nga butang nga yara sa duta.”

21Niyan ang hari nagsiling kay Joab, “Yari karon, ako naghimo sini nga butang; busa lakat ka, pabalika ang pamatan-on nga si Absalom.”

22Kag si Joab naghapa sa duta, kag nagyaub, kag nagpakamaayo sang hari; kag si Joab nagsiling, “Karon nga adlaw nakilala sang imo alagad nga ako nakapahamuut sa imo itololok, ginoo ko nga hari, nga ang hari naghimo sang pangabay sang iya alagad.”

23Gani si Joab nagtindug kag nagkadto sa Gesur, kag gindala si Absalom sa Jerusalem.

24Kag ang hari nagsiling, “Papauli-a sia sa iya kaugalingon nga balay; dili sia pagpatan-awa sang akon nawung.” Gani si Absalom nagpauli sa iya kaugalingon nga balay, kag wala makakita sang nawung sang hari.

25Karon sa bug-os nga Israel wala na sing dalayawon pa subong kay Absalom tungud sang iya kaayoayo; kutub sa dapadapa sang iya tiil tubtub sa alimpudwan sang iya olo wala kasawayan sa iya.

26Kag kon maggunting sia sang bohok sang iya olo (karon ginaguntingan niya ini sa katapusan sang tagsa ka tuig; bangud nga mabug-at ini sa iya, busa ginaguntingan niya ini), ang iya bohok gintimbang niya sa duha ka gatus ka siclo, sono sa itilimbang sang hari.

27Natawo kay Absalom ang tatlo ka lalaki, kag isa ka anak nga babayi nga ginhingalanan si Tamar; maayoayo sia sing dagway nga babayi.

28Gani nagpuyo si Absalom sa bug-os nga duha ka tuig sa Jerusalem, kag wala sia makakita sang nawung sang hari.

29Niyan ginpatawag ni Absalom si Joab, nga ipadala sia sa hari; apang si Joab indi magkadto sa iya. Kag nagsogo sia sa ikaduha, apang indi sia magkadto.

30Niyan nagsiling si Absalom sa iya mga alagad, “Tan-awa, ang uma ni Joab malapit sa akon, kag may sebada sia didto; lakat kamo kag tutdi ini sing kalayo.” Gani gintutdan sing kalayo sang mga alagad ni Absalom ang uma.

31Niyan nagtindug si Joab kag nagkadto kay Absalom sa iya balay, kag nagsiling sa iya, “Ngaa bala nga gintutdan sing kalayo sang imo mga alagad ang akon uma?”

32Si Absalom nagsabat kay Joab, “Yari karon, ginpakadtoan ko ikaw, ‘Kari diri, agud nga mapadala ko ikaw sa hari, sa pagsiling, “Ngaa bala nga nagkari ako gikan sa Gesur? Maayo pa sa akon nga didto ginhapon.” Busa karon patan-awa ako sang guya sang hari; kag kon may kalautan ako, patyon niya ako.’”

33Gani si Joab nagkadto sa hari, kag nagsugid sa iya; kag ginpatawag niya si Absalom. Gani nagkadto sia sa hari, kag naghapa sa duta sa atubang sang hari; kag ang hari naghaluk kay Absalom.

← Chapter 13 Jump to: Chapter 15 →