2 Corinthians 1

Ika 2018 Bible

Jump to: Chapter 2 →

1Mmẹ wụ Pọlụ de Ẹkụkwọ-ozini. M wụ onyẹ-ozi pụ-ichẹn Kraịstị Jizọsị ghahanị uche Osolobuẹ. Mmẹ lẹ Timoti nwẹnẹ ẹnyi gba de Ẹkụkwọ-ozini. Ndị ụka Osolobuẹ rị alị Kọrẹntị kẹ ẹnyi rị e dejẹnn'ẹ, uwẹ lẹ ndị nsọ ile wẹ ile gba rị Ẹgbẹrẹ Akaya.

2Ẹfọma lẹ udọn hụn gha ẹka Osolobuẹ Nẹdi ẹnyi lẹ Di-nwọnni-ẹnyi wụ Jizọsị Kraịstị bịa ya rịnị ụnụ.

3Ọjịja-mma ya rịnị Chuku, Nẹdi Di-nwọnni-ẹnyi wụ Jizọs Kraịstị. Nẹdi omikẹn lẹ Chuku hụn a kasị ịhịan obi ọda-ọda k'ọ wụ;

4ọ kasị ẹnyi obi imẹ nsọngbu ẹnyi ile, kẹni ẹnyi saẹka e gi obi ọ kasị ẹnyi nwẹn a kasị ndị ọzọ rị imẹ nsọngbu ọwụlẹ obi.

5Makẹni, kẹ ẹnyi dọn a ta afụnfụn ọda-ọda makẹ Kraịstị, ẹrịra kẹ Osolobuẹ dọnzikwọ a kasị ẹnyi obi ọda-ọda ghahanị Kraịstị.

6Omẹni nsọngbu rị a bịanị ẹnyi, wẹ rị e gi ẹ a rụn ihiẹn wẹ gi a kasị ụnụ nwẹn obi lẹ ihiẹn wẹ gi a zụọpụha ụnụ; omẹni wẹ rị a kasị ẹnyi obi, wẹ rịzị e gi ẹ a kasị ụnụ nwẹn obi ebe ụnụ nọ e welụa obi alị e dingbu afụnfụn ohu hụ ẹnyi rị a ta.

7Ẹnyi egibehikwọn'a nwan dọn nị ụnụ k'e mẹ ọhụnma imẹ ihiẹn Osolobuẹ. Makẹni, ẹnyi a marịnghọ nị kẹ ụnụ dọn e sọn ẹnyi a ta afụnfụn, ẹrịra kẹ ụnụ dọnzi e sọn ẹnyi e nwọnhẹn nkasị-obi.

8Umunẹ m, ẹnyi chọ nị ụnụ marịn nị ẹnya hụn ẹnyi ihiẹn imẹ Ẹgbẹrẹ Eshịa: wẹ sọngbu ẹnyi ọda-ọda, karịdẹ hụn ẹnyi saẹka din, nke wụ nị ẹnyi erodẹni nị ẹnyi k'a hụn isi.

9Ezioku, ẹnyi te ro ni a magụọ wẹ ẹnyi ikpe-ọnwụn. Ihiẹnni mẹ amamgbe ẹnyi e gi enwẹn ẹnyi dọn ẹnya karị igi Osolobuẹ hụn e weli ndị nwụnnị dọn ẹnya.

10Ịya gbapụha ẹnyi eje-ọnọdị hụ te k'e gbuni ẹnyi. Ọ k'a rị a gbapụha ẹnyi. Ịya kẹ ẹnyi rị e lee ẹnya n'o k'a gbapụhazị ẹnyi —

11ụnụ gha e gi ekpere e yeni ẹnyi ẹka. Ogẹn ahụn, ndị bu ọda e gi ufiri ẹnyi a kpanmịn Osolobuẹ yeni ihiẹn o gi ẹfọma mẹni ẹnyi gi za ekpere ndị bu ọda.

12Ihiẹn ẹnyi gi a nyan isi wụ ọnwan: nị ịhọrị ẹnyi rị a shịanị ẹnyi ẹri nị ẹnyi gi obi rị ọchan lẹ ezioku Osolobuẹ bi obibi ẹnyi imẹ ụwa, tụmadụ ẹgbata ẹnyi lẹ ụnụ; nị ẹnyi egini amamihiẹn ụwa bi, kanị eyemẹka Osolobuẹ.

13Makẹni, ẹnyi ara deni ụnụ ihiẹn ọwụlẹ karị hụn k'a nị ụnụ gụn lẹ hụn k'a nị ụnụ ghọta; m hụkwọ nwan e lee ẹnya nị ụnụ k'a ghọtachanrịn ẹnyi

14kẹ ụnụ dọn nwan ghọta ẹnyi ẹkẹrẹ. Ẹghẹẹ, makẹni ụnụ a ghọtagụọ nị ụnụ k'a saẹka gi ẹnyi nyan isi Ụhụọhịn Di-nwọnni-ẹnyi wụ Jizọsị nọkẹ kẹ ẹnyi nwẹn a dọn gi ụnụ nyan isi Ụhụọhịn ahụn.

15Ọhụn we m ẹnya haịn m te gi sị m k'a bịagụzị d'a hụn ụnụ, kẹni ọ wụrụnị ụnụ ngọzi nke mgbe ẹbụọ.

16M te chọ nị m bịa d'a hụn ụnụ m jẹnkọnị Masẹdonia lẹ m kinkọzịnị, mmẹ lẹ ụnụ nọdịgụ, ụnụ e du m ụla m jẹnkọnị Judia.

17Kẹ m ku ẹ nị m lala alala, m gidẹ nwan obi-ẹbụọ ku ẹ ra? Ra m'e mẹdẹ nwan kẹ ndị ụwa, a sị, “ẹghẹẹ” lẹ “mba,” mgbe ohu?

18Kaka! K'o dọn mẹni Osolobuẹ wụ onyẹ-ezioku, ẹrịra k'o dọn wụrụ ezioku nị oku ẹnyi a gwa ụnụ emẹtuni “ẹghẹẹ lẹ mba” nke onyẹ e ku ẹbụọ.

19Makẹni Nwa Osolobuẹ wụ Jesu Kristi hụn mmẹ lẹ Sivanọsụ wụ Saịlasị lẹ Timoti zi ụnụ ozi ẹ ẹlẹ onyẹ a sị “ẹghẹẹ,” a sị “Mba;” ihiẹn rị imẹ ẹ ogẹn ile wụ “ẹghẹẹ.”

20Makẹni, imẹ ẹ kẹ nkwa Osolobuẹ ile nọ e mẹzuchanrịn, a wụ “ẹghẹẹ.” Ya haịn ẹnyi gi a sị, “Isẹẹ” ghahanị Jesu Kristi, e gi ẹ e ye Osolobuẹ ọghọ.

21Osolobuẹ lẹ enwẹn ẹ wụ onyẹ e mẹ ẹnyi lẹ ụnụ e turu ọhụnma imẹ Kraịstị; ịya tumẹ ẹnyi,

22ye ẹnyi ahịma a ghahanị ibu Mmọn-nsọ a che imẹ obi ẹnyi, gi ẹ họnrin mbi ihiẹn ile o k'e mẹni ẹnyi.

23M rị a kpọ Osolobuẹ n'ọ shịagbu m ẹri omẹni ẹlẹ makẹ m gha a jụgbọka ụnụ haịn m gilẹni bịazị Kọrẹntị.

24Arị m e gi oku ọjụgbọnị m rị e ku e ku nị ẹnyi nwọn e ku ihiẹn ụnụ gi okukwe ụnụ e mẹ. Kama, m gi ẹ e ku nị ẹnyi lẹ ụnụ gba a rụn kẹni ụnụ hụn ụzọ e nwọn ịghọghọ nị ụnụ turu ọhụnma imẹ okukwe.

Jump to: Chapter 2 →