2 Corinthians 9

Ika 2018 Bible

← Chapter 8 Jump to: Chapter 10 →

1Ọ rịkadẹni mkpa nị m deni ụnụ oku ihiẹn wẹ rị a tụnị ndị kwerini rị Jerusalẹm,

2makẹni a marịnghọ m n'ọ rịka ụnụ obi, e gigụọdẹ m ụnụ nyannị ndị Masẹdonia isi, sị wẹ nị “Ndị Akaya a kwademẹgụọlẹ kete akan-ahụn!” Oku ụnụ wẹ nụ a kpọtiẹngụọ imẹrinmẹ wẹ.

3Kanị m zilanị ụnụ umunẹ ẹnyi ndịnị, amamgbe isi ẹnyi gi ụnụ a nyan a wụrụ ihiẹn-mmaka ogẹnni. Kama, m chọ nị ụnụ kwademẹ, e che, kẹ m dọn gwa wẹ;

4amamgbe ndị Masẹdonia sọnhẹn m a hụn a nị ụnụ eke kwademẹ, ogẹn ahụn ifẹnrẹn e mẹgbu ẹnyi imẹ ihiẹnni, ọrịwụzị ụnụ lẹ enwẹn ụnụ!

5Ya haịn o gi rị m mkpa nị m zi umunẹ ẹnyi ndị hụ, nị wẹ bu ụzọ bịagụ d'e kunrun ụnụ, kwademẹchanrịn ihiẹn ile gbashịarị oyiyeni ụnụ kwe nkwa a, m kebe bịa; kẹni ọ wụrụ oyiye ụnụ gi ihiẹn ẹka ụnụ ye, ẹlẹni wẹ waye ụnụ ya olu.

6Lee k'ọ nọ: onyẹ kụnlẹni ọda jẹnkọ d'a ghọrị hụn bulẹni ọda; onyẹ kụn ọda jẹnkọ d'a ghọrị hụn bu ọda.

7Onyẹ-onyẹ ya ye ihiẹn rị a obi, y'e yelẹ bụ ẹlẹ obi ẹ; y'e yelẹ nọkẹ sị wẹ wa a ye ẹ olu — makẹni onyẹ a shịapụ ẹfọ e ye kẹ ihiẹn ẹ a sụọ Osolobuẹ.

8Osolobuẹ k'a saẹka gi ihiẹn ile gọzi ụnụ mmagi-mmagi, kẹni ụnụ hụn ụzọ e nwọnchanrịn ihiẹn ile rị ụnụ mkpa, e yezi ọda ogẹn ọwụlẹ ọrụn rị mma pụha.

9Ẹrịra kẹ Ẹkụkwọ-nsọ dọn ku ẹ, sị, “O yesọnmẹ ịhịan ihiẹn, o yesọnmẹ ndị-igbẹnnyẹ; o k'e mẹsọnmẹ ezi-omumẹ jẹnrin ejẹn.”

10Osolobuẹ hụn e ye ịhịan ihiẹn o k'a kụnye lẹ ihiẹn o k'e ri k'e ye ụnụ ihiẹn ụnụ jẹnkọ d'a kụn, o mẹ ẹ sue, mẹ ẹ mị ọda-ọda; o k'e mẹ ụnụ ghọrị ezi-omumẹ nọkẹ ihiẹn-ugbo, ghọrị a ọda-ọda.

11O k'e mẹ ụnụ wụrụ ịdanfịn ụzọ ile, kẹni ụnụ hụn ụzọ a ha ẹka ọda-ọda. Ihiẹnni ụnụ gha ẹka ẹnyi ye sikọ d'e wẹhẹni Osolobuẹ ẹregede ekele.

12Makẹni, ẹlẹdẹ nị eyemẹka ụnụ k'e ye ndị nke Osolobuẹ ihiẹn rị wẹ mkpa sụọ, o sikọ d'e mẹzi ndị bu ọda kele Osolobuẹ.

13Okukwe ụnụ gi ẹ ghọsị jẹnkọ d'e ye Osolobuẹ ọghọ, makẹni ọ ghọsị ndị bu ọda k'e rin'ẹ nị ụnụ e humẹni oziọma Kraịstị ụnụ kweri isi ebe ụnụ nọ ye wẹ lẹ ndị ọzọ ọda.

14Ogẹn ahụn, wẹ k'a gha e mẹni ụnụ ekpere, a nyanhan ụnụ ọda-ọda, makẹni ẹka Osolobuẹ a rịkẹnmẹkẹ imẹ ndụn ụnụ.

15Ekele ya rịnị Osolobuẹ o gi ye oyiye ọnụ ịhịan ghalẹni a saẹka a kọwa!

← Chapter 8 Jump to: Chapter 10 →