2 Corinthians 5

Ika 2018 Bible

← Chapter 4 Jump to: Chapter 6 →

1Makẹni ẹnyi a marịnghọ nị wẹ tikpọ ẹhụ ẹnyini, ọdụnị ẹnyi bi imẹ ẹ imẹ ụwanị, ẹnyi e nwọnghọ ụlọ Osolobuẹ tụn, ụlọ wẹ gilẹni ẹka tụn hụn rị imẹ elu-igwee, ụlọ hụn k'a rị jẹnrin ejẹn.

2Imẹ ọdụnị ẹnyi rị kikẹnni, ẹnyi hụ a sụn udẹn, ọ hụ a gụn ẹnyi ọda-ọda nị wẹ yimẹ ẹnyi ẹhụ ẹnyi ahụn, ụlọ ẹnyi ahụn rị elu-igwee —

3ebe o mẹ ni ẹnyi yirigụ a, ẹnyi emẹkọ ndị gba ọtọ.

4Makẹni, hụnnị ẹnyi rịkwọ imẹ ẹhụnị, imẹ ọdụnị, ẹnyi hụ a sụn udẹn makẹni ibu rị a nyịn ẹnyi. Ẹlẹni ẹnyi chọ nị ẹnyi gba ọtọ, kama, ẹnyi chọ nị wẹ yimẹzi ẹnyi hụn-ẹbọ ahụn, kẹni ndụn luepụ hụn a nwụnhụnnị, weri ọnọdị a.

5Onyẹ rị a rụnnị ẹnyi ihiẹnni wụ Osolobuẹ. O yegụọ ẹnyi Mmọn-nsọ n'ọ wụrụ mbi o gi ghọsị n'o k'e mẹ ẹ.

6Obi e ru nwan ẹnyi alị ogẹn ile, ọsụọn'a nị ẹnyi a marịnghọ nị hụnnị ẹnyi rịkwọ ụlọnị wụ ẹhụ ẹnyi, ẹnyi arị ebe Di-nwọnni-ẹnyi rị,

7makẹni ihiẹn ẹnyi kweri imẹ Kraịstị kẹ ẹnyi gi e bi, ẹlẹ ihiẹn ẹnya ẹnyi rị e legha.

8Ẹghẹẹ, obi e ru ẹnyi alị, nke wụ nị ọ kadẹ ẹnyi mma nị ẹnyi gha imẹ ẹhụnị pụ, laburu Di-nwọnni-ẹnyi d'a nọdị ụlọ ẹnyi rị ebe ọ rị.

9Ufiri ẹ, ẹnyi a lịlịma nị ẹnyi e mẹ ihiẹn a sụọ a ụsụọ ogẹn ile, kẹ ẹnyi rị ndụn imẹ ẹhụnị wụ ụlọ ẹnyi kẹ ẹnyi arị.

10Makẹni ẹnyi ile k'a pụha ihun Oche okinkin-ikpe Kraịstị n'o kin ẹnyi ikpe, kẹni onyẹ-onyẹ narịn ụgwọ ihiẹn ọ rụn k'ọ rị imẹ ẹhụnị — kẹ mma kẹ njọ.

11Egun Di-nwọnni-ẹnyi haịnkwọ ẹnyi gi a rịọ ịhịan ile sọnmẹ ẹ. Osolobuẹ a marịnghọ ẹnyi ọhụnma-ọhụnma; e gighọ m'a dọn nị ụnụ nwẹn a marịnzịghọ ẹnyi imẹ obi ụnụ.

12Ẹlẹ ẹnyi rịzị a sị nị ẹnyi a rịka mma! Mba. Ẹnyi rị e ye ụnụ ihiẹn ụnụ e kwọndọn ẹka gi ẹnyi nyan isi, kẹni ụnụ saẹka shịarị ndị gi ihiẹn ẹnya e legha a nyan isi karị ihiẹn rị ịhịan obi.

13Makẹni, omẹni ẹnyi e mẹ kẹ ndị uche wẹ zulẹni, ufiri Osolobuẹ rọ; omẹni ẹnyi e mẹ kẹ ndị uche wẹ zu oke, ufiri ụnụ rọ.

14Ihiẹn-ọsụsụọ Kraịstị rị e nu ẹnyi, makẹni o wegụọ ẹnyi ẹnya nị, ebe o mẹ ni onyẹ ohu a nwụnhụngụọnị ịhịan ile ọnwụn, ya wụ nị ịhịan ile a nwụnhụngụọ.

15Ọ nwụnnị ịhịan ile ọnwụn kẹni ndị rị ndụn bibehini enwẹn wẹ, kama, nị wẹ e bini onyẹ hụ gi ufiri wẹ nwụnhụn, Osolobuẹ e gizi ufiri wẹ weli ẹ.

16Onwọnzini nwan onyẹ ẹnyi e gi ẹnya-ịhịan mmaka e lee. Ọsụọn'a nị ẹnyi te gi ẹnya-ịhịan mmaka e lee Kraịstị mbụ, ẹnyi ara gizi ẹnya-ịhịan mmaka e lee ẹ.

17Ya wụ, onyẹ rị imẹ Kraịstị a wụrụọlẹ onyẹ wẹ kedọnzi; ihiẹn akan a gharịgụọ; lee ẹ, ihiẹn ile e họnringụọ nke ọhụn!

18Ihiẹnni ile gha ẹka Osolobuẹ bịa, onyẹ hụn gi Kraịstị dọnzi ẹgbata ẹnyi lẹ ịya, we ọrụn idọnzi-ẹgbata ye ẹnyi.

19Ya wụ nị Osolobuẹ rị imẹ Kraịstị e dọnzi ẹgbata ya lẹ ụwa, ara gizi njọ wẹ e sọn wẹ, o we ozi idọnzi-ẹgbata ahụn che ẹnyi ẹka zisọnmẹ.

20Ndị-nnọkin ẹnya Kraịstị kẹ ẹnyi wụ nwan, Osolobuẹ gi ẹnyi a rịọ ụnụ; ẹnyi rị nwan a rịọdọnni Kraịstị: dodo ni, “Kinhẹn ni d'e kunrun Osolobuẹ!”

21Osolobuẹ gi ufiri ẹnyi gi Kraịstị mẹlẹni njọ họnrin onyẹ mẹ njọ, kẹni ẹnyi gha ẹka a họnrin ndị ezi-omumẹ ẹnya Osolobuẹ.

← Chapter 4 Jump to: Chapter 6 →