2 Corinthians 7

Ika 2018 Bible

← Chapter 6 Jump to: Chapter 8 →

1Ndị nke m, hụnnị Osolobuẹ kwe ẹnyi nkwa ndịnị, nị ẹnyi chanpụ enwẹn ẹnyi ihiẹn ile e mẹrụ ẹhụ lẹ mmọn, gi egun Osolobuẹ a rịchanrịn nsọ.

2Shịapụnị nị ẹnyi ẹfọ, n'o nwọnni onyẹ ẹnyi mẹ eje-ihiẹn, onwọnni onyẹ ẹnyi wiwi, onwọnni onyẹ ẹnyi tụnarịn ihiẹn ẹ.

3Arị m e ku ihiẹnni nị m gi ma ụnụ ikpe; e kuọlẹ m'a mbụ nị ụnụ rị ẹnyi obi, hụn ẹnyi e gi sọn ụnụ nwụn mọbụ rị ndụn.

4Obi ru m alị banyeni ụnụ ọda-ọda; m'e gi ụnụ a dụ ẹka obi; ụnụ a gba m umẹ ọda-ọda; imẹ nsọngbu ẹnyi ile, m'e gi ufiri ụnụ a ghọghọ ọda-ọda.

5Makẹni, kẹ ogẹn ẹnyi gi rudẹ Masẹdonia, ẹnyi ezuni ikẹn kaka; wẹ kpokpo ẹnyi azụụn ile: oku-lẹ-ụka fihunmẹ ẹnyi, egun e jun ẹnyi obi.

6Kanị Osolobuẹ, hụn a kasị ndị ndụn gụ obi nọ gi ọbịbịa Taịtọsụ kasị ẹnyi obi.

7Ẹlẹdẹ ọbịbịa a sụọ kasị ẹnyi obi, kanị ọ gwaghọ ẹnyi kẹ ọnọdị ụnụ dọn kasị a obi — ọhụn kasịzị ẹnyi obi. Makẹni, ọ gwa ẹnyi kẹ m dọn rị a da ụnụ, gwa ẹnyi kẹ eje-ihiẹn hụ mẹni dọn wutẹ ụnụ, gwazị ẹnyi nị ụnụ egini oku m gu egu! Ya kẹ m nọ ghọghọ ọda-ọda.

8Ufiri ẹ, ọsụọn'a nị ihiẹn m de imẹ ẹhụhụọ-ozi ahụn a fụghọ ụnụ, akwanzịnị m nwan mmanị. E te kwanghọ m mmanị makẹni m hụn a nị e degụọ m ihiẹn fụ ụnụ ẹkẹrẹ ogẹn.

9M rị nwan a ghọghọ. Arị m a ghọghọ n'ọ fụghọ ụnụ, kanị, n'ọ fụghọ ụnụ hụn ụnụ gi rogharị — ya wụ nị ụnụ a nịghọ a fụ ụnụ ụdị hụn Osolobuẹ chọ. Ya wụ nị onwọnni nwan kẹ ẹnyi dọn rụ ụnụ ẹhụ.

10Makẹni, wẹ jụgbọ ịhịan nị hụnyẹ a nị a fụ a kẹ Osolobuẹ dọn chọ, o mẹ ẹ rohutọ — mmanị arịkọ a; kanị omẹni ize k'o ze hụnyẹ, ọnwụn k'o buhẹ.

11Makẹni ọ fụghọ ụnụ ụdị hụn Osolobuẹ chọ, ụnụ ahụnnị nwan kẹ imẹ-mma dọn rị a dụ ụnụ?! K'o dọn mẹ ụnụ kinrin ọnụ ụnụ! Kẹ eje-ihiẹn zehan ụnụ ize! K'o gbuhan ụnụ ẹhụ! Lee ihiẹn m rị a da ụnụ! Lee mbọ ile ụnụ gba! Lee afụnfụn ụnụ ye onyẹ hụn mẹfieni! Ụnụ a ghọsịchanrịngụọ nị ẹka ụnụ a rị ihiẹn mẹni.

12Ọsụọn'a nwan nị m deni ụnụ ẹhụhụọ-ozi hụ, ẹlẹ onyẹ mẹ eje-ihiẹn mọbụ onyẹ wẹ mẹ eje-ihiẹn haịn m gi de ẹ. M de ẹ kẹni Osolobuẹ gi okuni ghọsịchanrịn ụnụ nị ẹnyi rị ụnụ obi nke-esi.

13O mẹgụọ nwan ndụn ban ẹnyi. Ẹlẹdẹ ọhụn sụọ, ẹnyi rịzị a ghọghọ makẹni ịghọghọ jun Taịtọsụ obi nị ụnụ ile e mẹgụọ ihiẹn obi gi ru ẹ alị!

14Ẹghẹẹ, ụnụ anịnị ifẹnrẹn mẹ m m gi gi ụnụ nyan isi ebe ọ rị. Isi ẹnyi nyan ebe Taịtọsụ rị e mẹgụọ nwan ezioku nọkẹ kẹ ihiẹn ile ẹnyi gwa ụnụ mbụ dọn wụrụ ezioku.

15Ihiẹn ụnụ hụ a sụọ a nwan karị k'ọ sụọ a mbụ, ọ gha a nyanhan kẹ ụnụ ile dọn humẹ isi lẹ egun lẹ ẹhụ ọmụma-nni ụnụ gi nabanhan a.

16M rị nwan a ghọghọ, makẹni obi ru m alị banyeni ụnụ.

← Chapter 6 Jump to: Chapter 8 →