2 Corinthians 6

Ika 2018 Bible

← Chapter 5 Jump to: Chapter 7 →

1Makẹni ẹnyi lẹ Osolobuẹ gba a rụn, ẹnyi rị nwan a rịọ ụnụ: dodo ni, anịlẹ ni ẹfọma Osolobuẹ rugụ ụnụ ẹka la iwi.

2Makẹni Osolobuẹ sị, “K'o ru ogẹn furuni, e gọnghọ m ụnụ ntịn; k'o ru ụhụọhịn nzụọpụha, m yeni ụnụ ẹka.” Lee n'ẹ, kikẹnni wụ ogẹn hụ furuni! Lee n'ẹ, tannị wụ ụhụọhịn nzụọpụha!

3Onwọnni onyẹ ẹnyi e butọnị uke, amamgbe ịhịan a hụn ihiẹn w'e gi kọrịanị ọrụn ẹnyi rị a rụnnị Osolobuẹ.

4Mba. Imẹ ihiẹn ile, ẹnyi a ghọsịchanrịn nị ẹnyi wụ ndị-ọrụn Osolobuẹ: ghahanị idingbu ihiẹn ile, ghahanị nsọngbu lẹ afụnfụn lẹ eje-ọnọdị ichẹn-ichẹn e kunrunni ẹnyi;

5ghahanị ili lẹ mkpịnsịn wẹ e gbu ẹnyi; ghahanị ngan w'a tụ ẹnyi lẹ ọkpụkpụ w'a kpụ ẹnyi e gbu; ghahanị ọlụgbu ẹnyi a lụgbu enwẹn ẹnyi lẹ ụran ẹnyi e chu lẹ ẹgụn ẹnyi e din;

6ghahanị idọnmẹ obi ẹnyi ọchan lẹ amamihiẹn, ndidin lẹ igi ẹka rị mma e sọn ịhịan lẹ obibi Mmọn-nsọ rị a kị; ghahanị ihiẹn-ọsụsụọ gha akpakalị obi pụha;

7ghahanị iku ezioku lẹ ikẹn Osolobuẹ rị e sọnni ẹnyi lẹ ibu ihiẹn-ọgụn Osolobuẹ sụọ ẹka-nni lẹ ẹka-ekpẹn;

8ghahanị mgbaye w'e ye ẹnyi lẹ olegberi w'e legberi ẹnyi; ghahanị ikuja oku ẹnyi lẹ mma w'a ja ẹnyi; ghahanị iweri ẹnyi kẹ ndị-ndufie bụ ndị ezioku kẹ ẹnyi wụ;

9ghahanị ịwụ ndị wẹ marịnlẹni bụ a marịngụọ wẹ ẹnyi ọhụnma-ọhụnma; ghahanị ịrị kẹ ndị rị a nwụnhụnnị, ka lee ẹ nwan, ẹnyi hụ ndụn! Ẹghẹẹ, ẹnyi a ghọsị a ghahanị nị ẹnyi hụkwọ ndụn ọsụọn'a nị w'e ye ẹnyi afụnfụnnị ile a ta,

10ghahanị nị ẹnyi a ghọghọ ogẹn ile ọsụọn'a nị ihiẹn ẹkwan e mẹ ẹnyi ogẹn ile; ghahanị ịrị kẹ ndị igbẹnnyẹ bụ ẹnyi e mẹ ndị bu ọda a wụrụ ịdanfịn; ghahanị ịrị kẹ ndị nwọnlẹni ihiẹn ọwụlẹ bụ ihiẹn ile wụ nke ẹnyi.

11Ẹnyi a shịapụgụọ nị ụnụ ndị Kọrẹntị ẹfọ! Ụnụ a hụnchanrịngụọ k'ọ rị ẹnyi obi.

12Ẹnyi arị e zuemẹni ụnụ ẹfọ, kanị ụnụ e zuemẹ nke ụnụ.

13M rị nwan a rịọ ụnụ kẹ ụmụ m: mẹ ni ni m kẹ m dọn mẹni ụnụ: shịapụ nị nwan ẹfọ.

14Anịlẹ ni wẹ kpagbama ụnụ lẹ ndị kwerilẹni ntụtụ ohu. Elee mmẹkọ kẹ ezi-omumẹ lẹ eje-obibi nwọndẹ? Elee mmẹkọ kẹ ukpẹ lẹ ishi nwọn?

15Kị Kraịstị lẹ Ekwensụ gi? Kị onyẹ kwerini lẹ onyẹ kwerilẹni gi?

16Kị Ụlọ-nsọ Osolobuẹ lẹ mmọn gi? Ẹnyi wụ Ụlọ-nsọ Osolobuẹ, Chuku hụ rị ndụn, nọkẹ kẹ Osolobuẹ dọn ku ẹ, sị, “M k'e biri imẹ wẹ, e jẹnhunmẹ imẹ igunrun wẹ. M k'a wụrụ Chuku wẹ, a wụrụ wẹ ndị nke m.”

17Di-nwọnni-ẹnyi sị, “Gha nị nwan imẹ igunrun wẹ pụha, ụnụ a rị ichẹn; emẹtụkwọlẹ ni ihiẹn rụnị ẹka: ogẹn ahụn kẹ m'e gi nabanhan ụnụ;

18a wụrụ m nẹdi ụnụ, ụnụ a wụrụ ụmụ m ikẹnnyẹ lẹ ikpoho. Ịya kẹ Osolobuẹ nwọn ikẹn ile ku.”

← Chapter 5 Jump to: Chapter 7 →